1st Test: ತಂಡಕ್ಕೆ ಪಡಿಕ್ಕಲ್‌ ಸೇರ್ಪಡೆ, ದಯಾಳ್‌ ಮೀಸಲು ಕ್ರಿಕೆಟಿಗ

Team Udayavani, Nov 21, 2024, 7:50 AM IST

ಪರ್ತ್‌: ಆಸ್ಟ್ರೇಲಿಯದಲ್ಲಿರುವ ಭಾರತದ ಟೆಸ್ಟ್‌ ತಂಡಕ್ಕೆ ಕರ್ನಾಟಕದ ಬ್ಯಾಟರ್‌ ದೇವದತ್ತ ಪಡಿಕ್ಕಲ್‌ ಅವರನ್ನು ಸೇರಿಸಿಕೊಳ್ಳಲಾಗಿದೆ. ಶುಭಮನ್‌ ಗಿಲ್‌ ಗಾಯಾಳಾಗಿರುವ ಕಾರಣ ಈ ಪರಿವರ್ತನೆ ಮಾಡಲಾಗಿದೆ.

“ಎ’ ತಂಡದೊಂದಿಗೆ ಪ್ರವಾಸಕ್ಕೆ ಬಂದಿದ್ದ ಪಡಿಕ್ಕಲ್‌ ಅವರನ್ನು ಆಸ್ಟ್ರೇಲಿಯದಲ್ಲೇ ಉಳಿಸಿಕೊಳ್ಳಲಾಗಿತ್ತು. ಅವರೀಗ ಪರ್ತ್‌ ಟೆಸ್ಟ್‌ ಪಂದ್ಯದಲ್ಲಿ 3ನೇ ಕ್ರಮಾಂಕದಲ್ಲಿ ಆಡುವ ಸಾಧ್ಯತೆಯೊಂದು ಗೋಚರಿಸಿದೆ.

ಮೀಸಲು ಆಟಗಾರ ಖಲೀಲ್‌ ಅಹ್ಮದ್‌ ಗಾಯಾಳಾಗಿದ್ದು, ತವರಿಗೆ ವಾಪಸಾಗಲಿದ್ದಾರೆ. ಇವರ ಸ್ಥಾನಕ್ಕೆ ಯಶ್‌ ದಯಾಳ್‌ ಅವರನ್ನು ಸೇರಿಸಿಕೊಳ್ಳಲಾಗಿದೆ.

ಯಶ್‌ ದಯಾಳ್‌ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್‌ ಸರಣಿ ವೇಳೆ ಭಾರತ ತಂಡದಲ್ಲಿದ್ದರು. ಅನಂತರ ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ20 ಸರಣಿಗೆ ಆಯ್ಕೆಯಾದರು.

ಎಡಗೈ ವೇಗಿ ಮಿಚೆಲ್‌ ಸ್ಟಾರ್ಕ್‌ ಅವರನ್ನು ಎದುರಿಸುವ ಸಲುವಾಗಿ ನೆಟ್ಸ್‌ನಲ್ಲಿ ಭಾರತಕ್ಕೆ ಅದೇ ಶೈಲಿಯ ಬೌಲರ್‌ನ ಅಗತ್ಯವಿರುವುದನ್ನು ಮನಗಂಡು ಯಶ್‌ ದಯಾಳ್‌ ಅವರನ್ನು ಆರಿಸಲಾಗಿದೆ.

ಜೈಸ್ವಾಲ್‌ಗೆ ಪೆಟ್ಟು
ಇದೇ ವೇಳೆ ಭಾರತ ತಂಡಕ್ಕೆ ಮತ್ತೂಂದು ಆಘಾತ ಎದುರಾಗಿದೆ. ಮಂಗಳವಾರದ ಅಭ್ಯಾಸದ ವೇಳೆ ಆರಂಭಕಾರ ಯಶಸ್ವಿ ಜೈಸ್ವಾಲ್‌ ಭುಜದ ಉಳುಕಿನಿಂದಾಗಿ ವೈದ್ಯಕೀಯ ಚಿಕಿತ್ಸೆಗೆ ಒಳಗಾದರು. ಬುಧವಾರ ಅಭ್ಯಾಸಕ್ಕೆ ಇಳಿಯುವ ಮೂಲಕ ತಂಡದ ಆತಂಕವನ್ನು ದೂರ ಮಾಡಿದ್ದಾರೆ.