Pushpa 2: ಕಿಸಿಕ್‌ ಎಂದು ಕುಣಿದ ಶ್ರೀಲೀಲಾ

Team Udayavani, Nov 26, 2024, 10:17 AM IST

ಯಾವುದೇ ಸಿನಿಮಾ ಇರಲಿ, ಅದರ ಹಾಡು ತಕ್ಕ ಮಟ್ಟಿಗೆ ಹಿಟ್‌ ಆದರೆ, ಚಿತ್ರತಂಡದಲ್ಲಿ ವಿಶ್ವಾಸ ಹೆಚ್ಚಾಗುತ್ತದೆ. ಪ್ರೇಕ್ಷಕರಿಗೂ ಸಿನಿಮಾ ನೋಡಬೇಕೆಂಬ ಬಯಕೆ ಹೆಚ್ಚಾಗುತ್ತದೆ.

ಸದ್ಯ ನಟ ಅಲ್ಲು ಅರ್ಜುನ್‌ ಅವರ ಬಹು ನಿರೀಕ್ಷಿತ ಪುಷ್ಪ 2 ಪ್ಯಾನ್‌ ಇಂಡಿಯಾ ಸಿನಿಮಾದ ಹಾಡೊಂದು ಬಿಡುಗಡೆಯಾಗಿ ಹಿಟ್‌ ಎನಿಸಿಕೊಳ್ಳುತ್ತಿದೆ. ಈ ಹಾಡಿನಲ್ಲಿ ಕನ್ನಡದ ನಟಿ ಶ್ರೀಲೀಲಾ ಭರ್ಜರಿಯಾಗಿ ಹೆಜ್ಜೆ ಹಾಕಿರುವುದೇ ಪ್ರಮುಖ ಆಕರ್ಷಣೆಯಾಗಿದೆ.

“ಕಿಸಿಕ್‌’ ಎಂಬ ಹಾಡಿನಲ್ಲಿ ಅಲ್ಲು ಅರ್ಜುನ್‌ ಜೊತೆ ಶ್ರೀಲೀಲಾ ಅವರ ಕುಣಿತದ ದೃಶ್ಯಗಳಿಗೆ ಸದ್ಯ ಅವರ ಅಭಿಮಾನಿಗಳು ಫಿದಾ ಆಗಿದ್ದಾರೆ. ಅದ್ದೂರಿ ಸೆಟ್‌ನಲ್ಲಿ ಈ ಹಾಡಿನ ಚಿತ್ರೀಕರಣ ನಡೆದಿದೆ. ಲೋತಿಕಾ ಹಾಗೂ ಸುಬ್ಲಾಷಿನಿ ಈ ಹಾಡಿಗೆ ಧ್ವನಿಯಾಗಿದ್ದಾರೆ.

ರಕೀಬ್‌ ಅಲಂ ಅವರ ಸಾಹಿತ್ಯ, ದೇವಿ ಶ್ರೀಪ್ರಸಾದ್‌ ಅವರ ಸಂಗೀತ ಸಂಯೋಜನೆ ಈ ಹಾಡಿಗಿದೆ. ಸದ್ಯ ಈ ಹಾಡಿನ ವಿಡಿಯೋ ಸೊಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.

ಪುಷ್ಪ 1 ಚಿತ್ರದ “ಊಂ ಅಂತಿಯಾ ಊಹೂಂ ಅಂತಿಯಾ’ ಹಾಡಿನಲ್ಲಿ ನಟಿ ಸಮಂತಾ ವಿಶೇಷವಾಗಿ ಕಾಣಿಸಿಕೊಂಡು ಸಖತ್‌ ಆಗಿ ಹೆಜ್ಜೆ ಹಾಕಿದ್ದರು.

ಈಗ ಪುಷ್ಪ 2ನಲ್ಲಿ ಶ್ರೀಲೀಲಾ ನೃತ್ಯ ಮಾಡುವ ಮೂಲಕ ಚಿತ್ರದ ಮೇಲಿರುವ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದ್ದಾರೆ. ಮೂಲ ತೆಲುಗು ಚಿತ್ರ ಇದಾದರೂ, ಕನ್ನಡ ನಟಿಯರಾದ ರಶ್ಮಿಕಾ ಹಾಗೂ ಶ್ರೀಲೀಲಾ ಇದರಲ್ಲಿ ಮಿಂಚುತ್ತಿರುವುದು ವಿಶೇಷ.