Satish Jarkiholi: ಪಕ್ಷ ಸಂಘಟನಾ ಶಕ್ತಿ ಇದ್ದವರ ಬಳಸಿಕೊಳ್ಳಿ: ಸತೀಶ್‌ ಜಾರಕಿಹೊಳಿ

Team Udayavani, Nov 27, 2024, 10:55 PM IST

ಬೆಂಗಳೂರು: ಪಕ್ಷ ಸಂಘಟನೆಯ ಕೆಲಸ ಮಾಡಲು ಅನೇಕರು ಆಸಕ್ತರಿದ್ದಾರೆ. ಅಂತಹ ಆಸಕ್ತರು ನಮ್ಮ ಪಕ್ಷದ ಶಕ್ತಿ. ನಮ್ಮ ಶಕ್ತಿ ಅಲ್ಲೇ ಉಳಿಯಬಾರದು. ಅಂತಹವರನ್ನು ಬಳಸಿಕೊಳ್ಳಲು ಚಿಂತನೆ ಆಗಬೇಕು ಎಂದು ಲೋಕೋಪಯೋಗಿ ಸಚಿವ ಸತೀಶ್‌ ಜಾರಕಿಹೊಳಿ ಹೇಳಿದರು.

ಬುಧವಾರ ಬೆಂಗಳೂರಿನಲ್ಲಿ ಸುದ್ದಿಗಾರರ ಪ್ರಶ್ನೆಗೆ ಉತ್ತರಿಸಿದ ಅವರು, ಈಗಷ್ಟೇ 3 ಕ್ಷೇತ್ರಗಳ ಫ‌ಲಿತಾಂಶ ಬಂದಿದೆ. ಪಕ್ಷದ ಕೆಲಸ ಮಾಡಲು, ಸಂಘಟನೆಗಾಗಿ ಕೆಲಸ ಮಾಡಲು ಯಾರು ಆಸಕ್ತರಿದ್ದಾರೋ ಅವರ ಬಗ್ಗೆ ಚಿಂತನೆ ನಡೆಯಬೇಕು ಎಂದರು.

ಕೆಲಸ ಮಾಡಲು ಆಸಕ್ತರಿದ್ದಾರೆ. ಸಂಘಟನೆ ಉಳ್ಳವರಿದ್ದಾರೆ. ಪಕ್ಷಕ್ಕೆ ಬಳಸಿಕೊಳ್ಳಲು ಚಿಂತನೆ ಆಗಬೇಕು. ನಮ್ಮ ಶಕ್ತಿ ಹಾಗೇ ಅಲ್ಲೇ ಉಳಿದರೆ ಏನೂ ಪ್ರಯೋಜನ ಆಗದು. ನಮ್ಮಂತಹವರು ಬಹಳ ಜನ ಪಕ್ಷದಲ್ಲಿದ್ದಾರೆ. ಕೆಲವರು ಶಾಸಕರಿದ್ದಾರೆ. ಕೆಲವರು ಏನೂ ಇಲ್ಲ. ರಾಜ್ಯದಲ್ಲಿ ಎಲ್ಲ ಜಿಲ್ಲೆಯಲ್ಲಿ ನಮ್ಮಷ್ಟೇ ಸಾಮರ್ಥ್ಯ ಇದ್ದವರಿದ್ದಾರೆ. ಅಂತಹವರನ್ನು ಗುರುತಿಸಿ ಬಳಸಿಕೊಳ್ಳುವುದು ಮುಂದಿನ ದಿನಗಳಲ್ಲಿ ಪಕ್ಷಕ್ಕೆ ಒಳ್ಳೆಯದು ಎಂದು ಪ್ರತಿಪಾದಿಸಿದರು.

ಸಂಸತ್‌ ಅಧಿವೇಶನ ನಡೆಯುತ್ತಿರುವುದರಿಂದ ಕೇಂದ್ರ ಸಚಿವರೆಲ್ಲರೂ ಈ ಸಂದರ್ಭದಲ್ಲಿ ಸಿಗುತ್ತಾರೆ. ರಾಜ್ಯದ ರೈಲ್ವೆ ಯೋಜನೆಗಳು ಸೇರಿದಂತೆ ಹಲವು ಇಲಾಖೆಗಳ ಕೆಲಸ ಬಾಕಿ ಇದೆ. ಹೀಗಾಗಿ ಶೀಘ್ರವೇ ದೆಹಲಿಗೂ ಹೋಗುತ್ತೇನೆ. ಸಹಜವಾಗಿ ನಮ್ಮ ಹೈಕಮಾಂಡ್‌ ನಾಯಕರನ್ನೂ ಭೇಟಿ ಮಾಡುವುದಿದೆ. ಈ ಸಂದರ್ಭದಲ್ಲಿ ಪಕ್ಷ, ಸಂಘಟನೆಯಲ್ಲಿ ಆಸಕ್ತರನ್ನು ಬಳಸಿಕೊಳ್ಳುವ ವಿಚಾರವನ್ನೂ ಗಮನಕ್ಕೆ ತರುತ್ತೇನೆ.