Belagavi: ನಾನು ಕಾಂಗ್ರೆಸ್ ಬಿಡಲು ಒಬ್ಬ ಮನುಷ್ಯ ಕಾರಣ: ರಮೇಶ್‌ ಜಾರಕಿಹೊಳಿ

Team Udayavani, Nov 30, 2024, 3:13 PM IST

One man is the reason I left Congress: Ramesh Jarkiholi taunts DK Shivakumar

ಬೆಳಗಾವಿ: ನಾನು ಅನಿವಾರ್ಯ ಕಾರಣದಿಂದ ಬಿಜೆಪಿಗೆ ಸೇರಿದ್ದೇನೆ. ನಾನು ಕಾಂಗ್ರೆಸ್ ನಿಂದ ಐದು ಬಾರಿ ಶಾಸಕನಾಗಿದ್ದೆ. ಈಗ ಎರಡು ಬಾರಿ ಬಿಜೆಪಿಯಿಂದ ಶಾಸಕನಾಗಿದ್ದೇನೆ. ನನಗೆ ಕಾಂಗ್ರೆಸ್ ಪಕ್ಷ ‌ಕೆಟ್ಟದ್ದು ಮಾಡಿರಲಿಲ್ಲ. ಆದರೆ ನಾನು ಕಾಂಗ್ರೆಸ್ ಬಿಡಲು ಒಬ್ಬ ಮನುಷ್ಯ ಕಾರಣ ಎಂದು ಶಾಸಕ ರಮೇಶ್ ಜಾರಕಿಹೊಳಿ ಅವರು ಪರೋಕ್ಷವಾಗಿ ಡಿಕೆಶಿವಕುಮಾರ್‌ ಗೆ ಟಾಂಗ್ ನೀಡಿದರು.

ಶನಿವಾರ (ನ.30) ಗೋಕಾಕ ತಾಲೂಕಿನ ಮಾಲದಿನ್ನಿ ಕ್ರಾಸ್ ಬಳಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಕೆಲವೊಂದು ಜನ ಸೇರಿ ನನ್ನ ವಿರುದ್ಧ ಷಡ್ಯಂತ್ರ ಮಾಡಿದ್ದರು. ಬಿಜೆಪಿಗೆ ಬಂದ‌ ನಂತರ ಇಲ್ಲೂ ಒಂದು ಷಡ್ಯಂತ್ರ ಮಾಡಿದ್ದರು. ಅದಕ್ಕೂ ನಾನು ‌ಹೆದರಲಿಲ್ಲ. ಏಳೆಂಟು ಜನ ಸ್ವಾಮೀಜಿಗಳು ನನಗೆ ಸಮಾಧಾನ ಮಾಡಿದರು. ಇಂತಹ ನೂರು ಸಿಡಿ ಬಂದರೂ ಅಂಜುವುದಿಲ್ಲವೆಂದು ಹೇಳಿದ್ದೆ. ವೈಯಕ್ತಿಕ ಷಡ್ಯಂತ್ರ ಮಾಡಿದ್ದರೆ ಅದಕ್ಕೆ ನಾನು ಹೆದರುವುದಿಲ್ಲ. ದೇವರಿದ್ದಾನೆ, ತಂದೆ ತಾಯಿ ಆಶೀರ್ವಾದವಿದೆ, ಜನರ ಆಶೀರ್ವಾದ ಇದೆ ಎಂದರು.

ಸದ್ಯ ಯತ್ನಾಳ್‌ ಮತ್ತು ನಾನು ಪ್ರವಾಸ ಮಾಡುತ್ತಿದ್ದೇವೆ. ಟೂರ್ ಮುಗಿದ ನಂತರ ದಾವಣಗೆರೆಯಲ್ಲಿ ಸಮಾವೇಶ ಮಾಡುತ್ತೇವೆ. ಐದರಿಂದ ಹತ್ತು ಲಕ್ಷ ಜನರನ್ನು ಸೇರಿಸಿ ಪೂರ್ತಿ ಕಹಳೆಯನ್ನು ಊದಿಯೇ ಬಿಡುತ್ತೇವೆ. ಯತ್ನಾಳ ಸಿಎಂ ಆಗ್ತಾರೋ ಬಿಡ್ತಾರೋ, ಯಾರು ಸಿಎಂ ಆಗ್ತಾರೋ ಗೊತ್ತಿಲ್ಲ. ಆದರೆ 74 ಪರ್ಸಂಟ್ ಜನಕ್ಕೆ ನ್ಯಾಯ ಸಿಗಬೇಕು. ಸಮಾಜಗಳಿಗೆ ಪಕ್ಷಾತೀತವಾಗಿ ನ್ಯಾಯ ಸಿಗಬೇಕು. ಒಳ್ಳೆಯ ರೀತಿಯಲ್ಲಿ ಹೋರಾಟ ಮಾಡುತ್ತೇವೆ. ಇಲ್ಲಿಯವರೆಗೆ ನಾವು ವಿಫಲರಾಗಿಲ್ಲ. ನಮ್ಮ‌ಜನಕ್ಕೆ ನ್ಯಾಯ ಕೊಡಬೇಕು ಎಂದು ನಾವು ಪ್ರತಿಜ್ಞೆ ಮಾಡಿದ್ದೇವೆ ಎಂದು ರಮೇಶ‌ ಜಾರಕಿಹೊಳಿ ಹೇಳಿದರು.