Mulleria: ಚಿರತೆ ದಾಳಿ; ಸಾಕು ನಾಯಿಗೆ ಗಂಭೀರ ಗಾಯ

Team Udayavani, Nov 30, 2024, 8:03 PM IST

ಮುಳ್ಳೇರಿಯ: ಕಾರಡ್ಕ ಕೊಟ್ಟಂಗುಳಿಯಲ್ಲಿ ನ.29 ರಂದು ರಾತ್ರಿ 12.30 ಕ್ಕೆ ಚಿರತೆಯೊಂದು ರಾಮಕೃಷ್ಣನ್‌ ಅವರ ಮನೆ ಅಂಗಳದಲ್ಲಿ ಸಾಕು ನಾಯಿ ಮೇಲೆ ದಾಳಿ ನಡೆಸಿ ಗಂಭೀರ ಗಾಯಗೊಳಿಸಿದ ಘಟನೆ ನಡೆದಿದೆ.

ನಾಯಿಯ ಕುತ್ತಿಗೆ ಕಡಿದು ಗಂಭೀರ ಗಾಯಗೊಳಿಸಿದೆ. ಕಚ್ಚಿದ ಭಾಗದಲ್ಲಿ ಹಲ್ಲಿನ ಗುರುತು ಕಂಡು ಬಂದಿದ್ದು, ಕುತ್ತಿಗೆ ಊದಿಕೊಂಡಿದೆ ಎಂದು ರಾಮಕೃಷ್ಣನ್‌ ತಿಳಿಸಿದ್ದಾರೆ. ವಿಷಯ ತಿಳಿದು ಅರಣ್ಯ ಅಧಿಕಾರಿಗಳು ಸ್ಥಳಕ್ಕೆ ತಲುಪಿದ್ದಾರೆ. ತಿಂಗಳ ಹಿಂದೆಯಷ್ಟೇ ಕೊಟ್ಟಂಗುಳಿ ಹಾಗು ಪರಿಸರ ಪ್ರದೇಶಗಳಲ್ಲಿ ಎರಡು ಬಾರಿ ಚಿರತೆ ಕಂಡು ಬಂದಿದ್ದು, ಒಯಕ್ಕೋರನ್‌ ವಿನೋದ್‌, ಗೋಪಾಲನ್‌ ಅವರ ಮನೆಯಂಗಳದಲ್ಲಿ ಚಿರತೆ ಕಂಡು ಬಂದಿತ್ತು.

ಮುಳಿಯಾರು ಮೀಸಲು ಅರಣ್ಯ ಸಮೀಪದ ಜನವಾಸ ಕೇಂದ್ರಗಳಲ್ಲಿ ಪದೇ ಪದೇ ಚಿರತೆ ಕಂಡು ಬರುತ್ತಿರುವುದರಿಂದ ಸ್ಥಳೀಯರು ಆತಂಕಕ್ಕೀಡಾಗಿದ್ದಾರೆ. ಅರಣ್ಯ ಇಲಾಖೆ ಅಧಿಕಾರಿಗಳು ಸ್ಥಾಪಿಸಿದ್ದ ಸಿಸಿ ಟಿವಿಗಳಲ್ಲಿ ಚಿರತೆ ದೃಶ್ಯ ಸೆರೆಯಾಗಿತ್ತು. ಈ ಹಿನ್ನೆಲೆಯಲ್ಲಿ ಗೂಡನ್ನಿರಿಸಿ ಚಿರತೆಯನ್ನು ಹಿಡಿಯುವ ಯತ್ನ ನಡೆದಿದ್ದರೂ ಸಾಧ್ಯವಾಗಲಿಲ್ಲ. ಆದ್ದರಿಂದ ತಜ್ಞರ ನಿರ್ದೇಶ ಪ್ರಕಾರ ಪಟಾಕಿ ಸಿಡಿಸಿ, ಚೆಂಡೆ ಬಾರಿಸಿ ಚಿರತೆಯನ್ನು ಅರಣ್ಯಕ್ಕೆ ಓಡಿಸಲು ಪ್ರಯತ್ನ ನಡೆಸಲಾಗಿತ್ತು.