Hockey: ಜೂನಿಯರ್‌ ಏಷ್ಯಾ ಕಪ್‌ ಹಾಕಿ: ಭಾರತ-ಪಾಕಿಸ್ಥಾನ ಫೈನಲ್‌

Team Udayavani, Dec 4, 2024, 1:18 AM IST

ಮಸ್ಕತ್‌: ಬುಧವಾರ ರಾತ್ರಿ ನಡೆಯಲಿರುವ ಜೂನಿಯರ್‌ (ಅಂಡರ್‌-21) ಏಷ್ಯಾ ಕಪ್‌ ಪುರುಷರ ಹಾಕಿ ಪಂದ್ಯಾವಳಿಯ ಫೈನಲ್‌ನಲ್ಲಿ ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ- ಪಾಕಿಸ್ಥಾನ ಮುಖಾಮುಖಿ ಆಗಲಿವೆ.

ಮಂಗಳವಾರ ನಡೆದ ಸೆಮಿಫೈನಲ್‌ನಲ್ಲಿ ಭಾರತ 3-1 ಅಂತರದಿಂದ ಮಲೇಷ್ಯಾವನ್ನು ಮಣಿಸಿತು. ಮೊದಲ ಉಪಾಂತ್ಯದಲ್ಲಿ ಪಾಕಿಸ್ಥಾನ 4-2 ಗೋಲುಗಳಿಂದ
ಜಪಾನ್‌ಗೆ ಆಘಾತವಿಕ್ಕಿತು. ಭಾರತ ತೀವ್ರ ಎಚ್ಚರಿಕೆಯ ಹಾಗೂ ಅಷ್ಟೇ ಆಕ್ರಮಣಕಾರಿ ಆಟದ ಮೂಲಕ ಮಲೇಷ್ಯಾವನ್ನು ತಡೆದು ನಿಲ್ಲಿಸಿತು. ಮೊದಲ ಗೋಲನ್ನು 10ನೇ ನಿಮಿಷದಲ್ಲಿ ದಿಲ್‌ರಾಜ್‌ ಸಿಂಗ್‌ ಬಾರಿಸಿದರು. ಬಳಿಕ 45ನೇ ನಿಮಿಷದಲ್ಲಿ ರೋಹಿತ್‌ ಪೆನಾಲ್ಟಿ ಕಾರ್ನರ್‌ ಮೂಲಕ ಗೋಲು ಬಾರಿಸಿ ಮುನ್ನಡೆಯನ್ನು ವಿಸ್ತರಿಸಿದರು.

52ನೇ ನಿಮಿಷದಲ್ಲಿ ಮಲೇಷ್ಯಾ ಪೆನಾಲ್ಟಿ ಕಾರ್ನರ್‌ ಒಂದನ್ನು ತಡೆದ ಬಳಿಕ, ರೀಬೌಂಡ್‌ ಆಗಿ ಬಂದ ಚೆಂಡನ್ನು ಶಾರದಾನಂದ ತಿವಾರಿ ಗೋಲುಪೆಟ್ಟಿಗೆಗೆ ತಳ್ಳುವಲ್ಲಿ ಯಶಸ್ವಿಯಾದರು. ಪಂದ್ಯದ ಮುಕ್ತಾಯಕ್ಕೆ ಇನ್ನೇನು 3 ನಿಮಿಷ ಉಳಿದಿರುವಾಗ ಕಮರುದ್ದೀನ್‌ ಗೋಲೊಂದನ್ನು ಬಾರಿಸಿ ಮಲೇಷ್ಯಾಕ್ಕೆ ಒಂದಿಷ್ಟು ಸಮಾಧಾನ ತಂದಿತ್ತರು.