Kasaragodu ವಿಭಾಗದ ಅಪರಾಧ ಸುದ್ದಿಗಳು

Team Udayavani, Dec 10, 2024, 8:26 PM IST

ಗೂಡ್ಸ್‌ ಟೆಂಪೋ-ಬೈಕ್‌ ಢಿಕ್ಕಿ; ಇಬ್ಬರು ವಿದ್ಯಾರ್ಥಿಗಳಿಗೆ ಗಾಯ

ಮಂಜೇಶ್ವರ: ಬುಲೆಟ್‌ ಬೈಕ್‌ ಹಾಗೂ ಗೂಡ್ಸ್‌ ಟೆಂಪೋ ಢಿಕ್ಕಿ ಹೊಡೆದು ಬೈಕ್‌ನಲ್ಲಿ ಸಂಚರಿಸುತ್ತಿದ್ದ ಮಂಗಳೂರು ಖಾಸಗಿ ಕಾಲೇಜಿನ ವಿದ್ಯಾರ್ಥಿಗಳಾದ ಕಾಸರಗೋಡು ದೇಳಿ ಚೆಮ್ನಾಡ್‌ ನಿವಾಸಿಗಳಾದ ರಕ್ಷಿತ್‌ ಹಾಗು ದೀಪಿಕ ಗಾಯಗೊಂಡಿದ್ದಾರೆ. ರಕ್ಷಿತ್‌ ಗಂಭೀರ ಗಾಯಗೊಂಡಿದ್ದು, ಮಂಗಳೂರಿನ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ನಗರಸಭಾ ಕಾರ್ಯದರ್ಶಿಗೆ ಹಲ್ಲೆ; ಇಬ್ಬರ ವಿರುದ್ಧ ಕೇಸು; ಗುತ್ತಿಗೆದಾರನ ಬಂಧನ

ಕಾಸರಗೋಡು: ನಕಲಿ ಸಹಿ ಹಾಕಿ ನಗರದ ತಳಂಗರೆಯ ಕಟ್ಟಡವೊಂದಕ್ಕೆ ನಂಬ್ರ ಸಂಪಾದಿಸಿದುದನ್ನು ರದ್ದು ಪಡಿಸಿದ ದ್ವೇಷದಿಂದ ಕಾಸರಗೋಡು ನಗರಸಭಾ ಕಾರ್ಯದರ್ಶಿ ಜಸ್ಟೀನ್‌ ಪಿ.ಎ. ಅವರಿಗೆ ಹಲ್ಲೆ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿ ತಳಂಗರೆ ಬಾಂಗೋಡು ನಿವಾಸಿ ಹಾಗು ಗುತ್ತಿಗೆದಾರ ಶಿಹಾಬುದ್ದೀನ್‌(46) ಮತ್ತು ಆತನ ಜತೆಗಿದ್ದ ಇನ್ನೋರ್ವನ ವಿರುದ್ಧ ಪೊಲೀಸರು ಕೇಸು ದಾಖಲಿಸಿದ್ದಾರೆ. ಶಿಹಾಬುದ್ದೀನ್‌ನನ್ನು ಪೊಲೀಸರು ಬಂಧಿಸಿದ್ದಾರೆ.

ಕಣಜದ ಹುಳು ದಾಳಿ : 23 ಶಾಲಾ ವಿದ್ಯಾರ್ಥಿಗಳಿಗೆ ಗಾಯ

ಕಾಸರಗೋಡು: ಶಾಲೆ ಬಿಟ್ಟು ಮನೆಗೆ ತೆರಳುತ್ತಿದ್ದ ವಿದ್ಯಾರ್ಥಿಗಳಿಗೆ ಕಣಜದ ಹುಳುಗಳು ದಾಳಿ ನಡೆಸಿದ್ದು, 23 ವಿದ್ಯಾರ್ಥಿಗಳು ಗಾಯಗೊಂಡಿದ್ದಾರೆ. ಕೊಡಕ್ಕಾಡ್‌ ಶಾಲೆಯ ವಿದ್ಯಾರ್ಥಿಗಳು ಗಾಯಗೊಂಡಿದ್ದು, 13 ಮಂದಿಯನ್ನು ಚೆರ್ವತ್ತೂರು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇತರರು ಪ್ರಥಮ ಚಿಕಿತ್ಸೆ ಪಡೆದು ಮನೆಗೆ ತೆರಳಿದ್ದಾರೆ.