Manjunath Bhandary: ಇನ್ನಾದಲ್ಲಿ ಭೂಗತವಾಗಿ ವಿದ್ಯುತ್‌ ಲೈನ್‌ ಹಾಕಿ

Team Udayavani, Dec 13, 2024, 12:40 AM IST

ಬೆಳಗಾವಿ: ನೆರೆಯ ಕೇರಳ ರಾಜ್ಯಕ್ಕೆ ಉಡುಪಿ ಜಿಲ್ಲೆಯ ನಂದಿಕೂರು ಉಷ್ಣ ವಿದ್ಯುತ್‌ ಸ್ಥಾವರದಿಂದ ಕಾರ್ಕಳ ತಾಲೂಕಿನ ಇನ್ನಾ ಗ್ರಾಮದ ಮೂಲಕ 440 ಕೆ.ವಿ. ವಿದ್ಯುತ್‌ ತಂತಿಯಲ್ಲಿ ವಿದ್ಯುತ್‌ ಹರಿಸಬಾರದು ಎಂದು ವಿಧಾನ ಪರಿಷತ್ತಿನ ಕಾಂಗ್ರೆಸ್‌ ಸದಸ್ಯ ಮಂಜುನಾಥ ಭಂಡಾರಿ ಆಗ್ರಹಿಸಿದ್ದಾರೆ.

ಶೂನ್ಯವೇಳೆಯಲ್ಲಿ ವಿಷಯ ಪ್ರಸ್ತಾವಿಸಿದ ಅವರು, ಕೇರಳಕ್ಕೆ ವಿದ್ಯುತ್‌ ಪೂರೈಕೆಗಾಗಿ ವಿದ್ಯುತ್‌ ಲೈನ್‌ ಅಳವಡಿಸುವುದನ್ನು ವಿರೋಧಿಸಿ ಇನ್ನಾದ ಗ್ರಾಮಸ್ಥರು ಅಹೋರಾತ್ರಿ ಪ್ರತಿಭಟನೆ ನಡೆಸುತ್ತಿದ್ದಾರೆ.

ಈ ವಿದ್ಯುತ್‌ ಲೈನ್‌ನಿಂದಾಗಿ ಜನರು ಮನೆ-ಮಠ, ಕೃಷಿ ಭೂಮಿ ಕಳೆದುಕೊಳ್ಳಲಿದ್ದು ಸಂಕಷ್ಟಕ್ಕೆ ಈಡಾಗಲಿದ್ದಾರೆ. ಆದ್ದರಿಂದ ವಿದ್ಯುತ್‌ ಲೈನ್‌ಗೆ ಅವಕಾಶ ನೀಡಲಾರೆವು ಎಂದು ಪ್ರತಿಭಟನ ನಿರತ ಗ್ರಾಮಸ್ಥರು ಹೇಳುತ್ತಿದ್ದಾರೆ.

ಆದರೆ ಭೂಗತ ಲೈನ್‌ಗೆ ಜನರ ವಿರೋಧವಿಲ್ಲ; ಆದ್ದರಿಂದ ಆ ಭಾಗದಲ್ಲಿ ವಿದ್ಯುತ್‌ ಲೈನ್‌ ಅನ್ನು ಭೂಮಿಯ ಒಳಗೆ ಹಾಕುವಂತೆ ಕಂಪೆನಿಗೆ ಸೂಚನೆ ನೀಡಬೇಕು ಎಂದು ಭಂಡಾರಿ ಒತ್ತಾಯಿಸಿದರು.