Assembly Session: ನೀವೊಬ್ಬರೇ ಗೆದ್ದು ಬಂದವರಾ: ಆಶೋಕ್‌ಗೆ ಸಿಎಂ ತಿರುಗೇಟು

Team Udayavani, Dec 14, 2024, 12:24 AM IST

ಬೆಳಗಾವಿ: ವಕ್ಫ್ ಆಸ್ತಿ ವಿಚಾರ ಕುರಿತು ನಿಯಮ 69ರ ಅಡಿ ವಿಷಯ ಮಂಡಿಸಲು ವಿಪಕ್ಷ ನಾಯಕ ಆರ್‌. ಅಶೋಕ್‌ ಮುಂದಾದರೆ, ಆಡಳಿತ ಪಕ್ಷದ ಸದಸ್ಯರು ನೆರೆಹಾವಳಿ ಸಂಬಂಧ ಸ್ಪಷ್ಟೀಕರಣ ಕೇಳಲು ಮುಂದಾದರು. ಆಗ ಸಿದ್ದರಾಮಯ್ಯ ಮತ್ತು ವಿಪಕ್ಷ ನಾಯಕರ ನಡುವೆ ವಾಗ್ವಾದ ನಡೆಯಿತು.

ತುರ್ತು ವಿಚಾರ ವಾಗಿದ್ದು 4 ದಿನವಾದರೂ ಅವಕಾಶ ನೀಡುತ್ತಿಲ್ಲ. ವಕ್ಫ್ ವಿಚಾರದ ಬಗ್ಗೆ ಚರ್ಚಿಸಲು ಪದೇ ಪದೆ ಅಡ್ಡಿಪಡಿಸುತ್ತಿದ್ದೀರಿ. ನೀವು ಅಲ್ಲಿ ಶಾಶ್ವತವಾಗಿ ಇರುವುದಿಲ್ಲ. ಮತ್ತೆ ವಿಪಕ್ಷ ಸ್ಥಾನಕ್ಕೆ ಬರಲೇಬೇಕು. ಆಗ ನಿಮ್ಮನ್ನು ನಾವೂ ಇದೇ ರೀತಿ ನಡೆಸಿಕೊಳ್ಳಬೇಕಾಗುತ್ತದೆ ಎಂದು ಎಚ್ಚರಿಸಿದರು.

ಆಗ ಸಿದ್ದರಾಮಯ್ಯ, ನೀವೊಬ್ಬರೇನಾ ಇಲ್ಲಿ ಗೆದ್ದು ಬಂದಿದ್ದು? ಕಾಂಗ್ರೆಸ್‌ ಸದಸ್ಯರೂ ನಿಮ್ಮಂತೆ ಗೆದ್ದುಬಂದಿದ್ದಾರೆ. ನೀವು ಹೇಳಿದಂತೆ ಕೇಳಲು ಆಗುವುದಿಲ್ಲ ಎಂದು ಗುಡುಗಿದರು. ಇದಕ್ಕೆ ಅಶೋಕ್‌ ತಿರುಗೇಟು ನೀಡಿ, ನೀವು ಹೇಳಿದ್ದನ್ನು ಕೇಳಿಕೊಂಡು ಹೋಗಲು ನಾವು ಇಲ್ಲಿಗೆ ಬಂದಿಲ್ಲ. ನಿಮ್ಮಂತೆಯೇ ನಾವೂ ಬಾಗಿಲು ಮುರಿದು ಚರ್ಚೆಗೆ ಅವಕಾಶ ಕೊಡಿ ಅಂತ ಕೇಳಬೇಕಾ? ಎಂದು ಪ್ರಶ್ನಿಸಿದರು.