Rain: 5 ವಿದ್ಯುತ್‌ ನಿಗಮ ವ್ಯಾಪ್ತಿಯಲ್ಲಿ 156 ಕೋಟಿರೂ. ಸೌಕರ್ಯ ಹಾನಿ: ಕೆ.ಜೆ. ಜಾರ್ಜ್‌

Team Udayavani, Dec 16, 2024, 8:21 PM IST

ಸುವರ್ಣ ವಿಧಾನಸೌಧ: ರಾಜ್ಯದಲ್ಲಿ ಪ್ರಸಕ್ತ ಸಾಲಿನಲ್ಲಿ ಬಿದ್ದ ಭಾರೀ ಮಳೆಯಿಂದ ಬೆಸ್ಕಾಂ, ಹೆಸ್ಕಾಂ ಸೇರಿದಂತೆ ಐದು ವಿದ್ಯುತ್‌ ನಿಗಮಗಳಲ್ಲಿ 156 ಕೋಟಿ ರೂ. ಗಳ ವಿದ್ಯುತ್‌ ಕಂಬಗಳು, ಪರಿವರ್ತಕಗಳು ಸೇರಿ ಮೂಲಸೌಕರ್ಯಗಳ ಹಾನಿಯಾಗಿದೆ ಎಂದು ಇಂಧನ ಸಚಿವ ಕೆ.ಜೆ. ಜಾರ್ಜ್‌ ಹೇಳಿದರು.

ವಿಧಾನಪರಿಷತ್‌ನಲ್ಲಿ ಬಿಜೆಪಿ ಭಾರತಿ ಶೆಟ್ಟಿ ಅವರ ಚುಕ್ಕೆ ಗುರುತಿನ ಪ್ರಶ್ನೆಗೆ ಉತ್ತರ ನೀಡಿದ ಸಚಿವರು, ಬೆಂಗಳೂರು ವಿದ್ಯುತ್‌ ಕಂಪನಿಯಲ್ಲಿ ಒಟ್ಟು 2653 ಲಕ್ಷ ರೂ., ಸೆಸ್ಕ್ ನಲ್ಲಿ 1967 ಲಕ್ಷ, ಹೆಸ್ಕಾಂನಲ್ಲಿ 6039 ಲಕ್ಷ, ಮೆಸ್ಕಾಂನಲ್ಲಿ 4008 ಲಕ್ಷ ರೂ. ಹಾಗೂ ಜೆಸ್ಕಾಂನಲ್ಲಿ 943 ಲಕ್ಷ ರೂ. ಹಾನಿಯಾಗಿದೆ ಎಂದರು.

ಒಟ್ಟು ಹಾನಿಯಾದ ವಿದ್ಯುತ್‌ ಮೂಲಸೌಕರ್ಯ ಮರುಸ್ಥಾಪನೆಗೆ ಇದುವರೆಗೆ 146.65 ಕೋಟಿ ರೂ ವೆಚ್ಚ ಮಾಡಲಾಗಿದೆ. ಇದರಲ್ಲಿ ಬೆಸ್ಕಾಂನಲ್ಲಿ 26 ಕೋಟಿ, ಸೆಸ್ಕ್ ನಲ್ಲಿ 19 ಕೋಟಿ, ಹೆಸ್ಕಾಂನಲ್ಲಿ 45.77 ಕೋಟಿ, ಮೆಸ್ಕಾಂನಲ್ಲಿ 40 ಕೋಟಿ ಮತ್ತು ಜೆಸ್ಕಾಂನಲ್ಲಿ 9.25 ಕೋಟಿ ರೂ. ವೆಚ್ಚಮಾಡಲಾಗಿದೆ ಎಂದರು.