UK ಚೆವನಿಂಗ್‌-ಕರ್ನಾಟಕ ಸ್ನಾತಕೋತ್ತರ ವಿದ್ಯಾರ್ಥಿ ವೇತನ ಒಪ್ಪಂದಕ್ಕೆ ಸಹಿ

Team Udayavani, Dec 16, 2024, 9:15 PM IST

ಸುವರ್ಣ ವಿಧಾನಸೌಧ: ಯುನೈಟೆಡ್‌ ಕಿಂಗ್‌ ಡಂ (ಯುಕೆ)ನಲ್ಲಿ ಮುಂದಿನ 3 ವರ್ಷ (2024-27) ಗಳ ಕಾಲ ಒಟ್ಟು 15 ವಿದ್ಯಾರ್ಥಿನಿಯರಿಗೆ 1 ವರ್ಷದ ಸ್ನಾತಕೋತ್ತರ ಪದವಿಗೆ ವಿದ್ಯಾರ್ಥಿ ವೇತನ ನೀಡುವ ಚೆವನಿಂಗ್‌-ಕರ್ನಾಟಕ ಸ್ನಾತಕೋತ್ತರ ವಿದ್ಯಾರ್ಥಿ ವೇತನಕ್ಕೆ ಸಂಬಂಧ ರಾಜ್ಯದ ಉನ್ನತ ಶಿಕ್ಷಣ ಇಲಾಖೆ ಮತ್ತು ಚೆವನಿಂಗ್‌ ಸೆಕ್ರೆಟರಿಯೆಟ್‌ ಮಧ್ಯೆ ತಿಳಿವಳಿಕೆ ಒಪ್ಪಂದಕ್ಕೆ ಸಹಿ ಹಾಕಲಾಯಿತು.

ಸುವರ್ಣ ವಿಧಾನಸೌಧದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಉನ್ನತ ಶಿಕ್ಷಣ ಸಚಿವ ಡಾ. ಎಂ.ಸಿ. ಸುಧಾಕರ್‌, ಸಿಎಂ ಪ್ರಧಾನ ಕಾರ್ಯದರ್ಶಿ ಎಲ್‌.ಕೆ. ಅತೀಕ್‌, ಉನ್ನತ ಶಿಕ್ಷಣ ಇಲಾಖೆ ಪ್ರಧಾನ ಕಾರ್ಯದರ್ಶಿ ಶ್ರೀಕರ್‌, ಕಾಲೇಜು ಶಿಕ್ಷಣ ಇಲಾಖೆ ಆಯುಕ್ತೆ ಎನ್‌. ಮಂಜುಶ್ರೀ, ಕರ್ನಾಟಕದ ಬ್ರಿಟಿಷ್‌ ಡೆಪ್ಯುಟಿ ಹೈ ಕಮೀಷನರ್‌ ಚಂದ್ರು ಐಯರ್‌, ಚೆವನಿಂಗ್‌ ಸಂಸ್ಥೆ ಸುಪ್ರಿಯಾ ಚಾವ್ಲಾ ಸಮ್ಮುಖದಲ್ಲಿ ಒಪ್ಪಂದಕ್ಕೆ ಸಹಿ ಹಾಕಲಾಯಿತು.

ರಾಜ್ಯದ ಸರ್ಕಾರಿ ಕಾಲೇಜುಗಳು ಮತ್ತು ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಪದವಿ ಪಡೆದ ವಿದ್ಯಾರ್ಥಿನಿಯರು ಈ ವಿದ್ಯಾರ್ಥಿ ವೇತನಕ್ಕೆ ಅರ್ಹರಾಗಿರುತ್ತಾರೆ. ವಿದ್ಯಾರ್ಥಿ ವೇತನ ಪಡೆದ ಮೊದಲ ಬ್ಯಾಚ್‌ 2025ರ ಆಗಸ್ಟ್ ನಲ್ಲಿ ಯುಕೆಯ ವಿವಿಗಳಲ್ಲಿ ತಮ್ಮ ವ್ಯಾಸಂಗ ಆರಂಭಿಸಲಿದ್ದಾರೆ. ಯುಕೆ ವಿವಿಗಳಲ್ಲಿ ಪ್ರವೇಶ ಪಡೆದ ಬಳಿಕ ವಿದ್ಯಾರ್ಥಿನಿಯರು ಈ ಸ್ಕಾಲರ್‌ಶಿಪ್‌ಗೆ ಅರ್ಹರಾಗಲಿದ್ದಾರೆ.

ಸ್ಕಾಲರ್‌ಶಿಪ್‌ಗೆ ಅರ್ಹತೆ ಪಡೆದ ವಿದ್ಯಾರ್ಥಿನಿಯರ ಬೋಧನಾ ಶುಲ್ಕ, ಪ್ರಯಾಣ ಮತ್ತು ವಸತಿ ವೆಚ್ಚವನ್ನು ರಾಜ್ಯ ಸರ್ಕಾರ ಮತ್ತು ಚೆವನಿಂಗ್‌ ಸೆಕ್ರೆಟರಿಯೆಟ್‌ ಭರಿಸಲಿದೆ. ಪ್ರತಿ ವಿದ್ಯಾರ್ಥಿನಿಗೆ ರಾಜ್ಯ ಸರ್ಕಾರ 20 ಲಕ್ಷ ರೂ. ಮತ್ತು ಚೆವನಿಂಗ್‌ ಸೆಕ್ರೆಟರಿಯೇಟ್‌ 20 ಲಕ್ಷ ರೂ. ನೀಡಲಿದೆ. ಒಟ್ಟು 3 ವರ್ಷಕ್ಕೆ 6 ಕೋಟಿ ರೂ. ಈ ಯೋಜನೆಗೆ ವಿನಿಯೋಗವಾಗಲಿದ್ದು, ರಾಜ್ಯ ಸರ್ಕಾರ ಮತ್ತು ಚೆವನಿಂಗ್‌ ಸೆಕ್ರಟರಿಯೇಟ್‌ ತಲಾ 3 ಕೋಟಿ ರೂ. ನೀಡಲಿದೆ.