Ravichandran Ashwin: ಯಾವುದೇ ಪಶ್ಚಾತ್ತಾಪವಿಲ್ಲ: ಅಶ್ವಿ‌ನ್‌

Team Udayavani, Dec 20, 2024, 7:50 AM IST

ಚೆನ್ನೈ: ಚೆನ್ನೈನ ಕ್ರೀಡಾಭಿಮಾನಿಗಳ ಪಾಲಿಗೆ ಐದೇ ದಿನದಲ್ಲಿ ಸಂತಸ ಹಾಗೂ ಬೇಸರವನ್ನು ಅನುಭವಿಸುವ ಅನಿರೀಕ್ಷಿತ ಸಮಯ ಎದುರಾಗಿದೆ. ಮೊನ್ನೆ ಮೊನ್ನೆ ಡಿ. ಗುಕೇಶ್‌ ಅತ್ಯಂತ ಕಿರಿಯ ಚೆಸ್‌ ವಿಶ್ವ ಚಾಂಪಿಯನ್‌ ಪಟ್ಟವನ್ನಲಂಕರಿಸಿ ತವರಿಗೆ ಆಗಮಿಸಿದಾಗ ಅದ್ಧೂರಿಯ ಸ್ವಾಗತ ಪಡೆದಿದ್ದರು. ಇದೀಗ ರವಿಚಂದ್ರನ್‌ ಅಶ್ವಿ‌ನ್‌ ಸರದಿ. ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ದಿಢೀರ್‌ ನಿವೃತ್ತಿ ಘೋಷಿಸಿ ವರ್ಷಾಂತ್ಯದಲ್ಲೊಂದು ಆಘಾತ ಮೂಡಿಸಿದ ಅಶ್ವಿ‌ನ್‌ ಗುರುವಾರ ಚೆನ್ನೈಗೆ ಆಗಮಿಸಿದರು. ಇಲ್ಲಿಯೂ ಕ್ರೀಡಾಭಿಮಾನಿಗಳು ಕಿಕ್ಕಿರಿದು ನೆರೆದಿದ್ದರು. ಆದರೆ ವಾತಾವರಣ ಮಾತ್ರ ಬೇರೆಯಾಗಿತ್ತು, ಅತ್ಯಂತ ಭಾವುಕವಾಗಿತ್ತು.

ರವಿಚಂದ್ರನ್‌ ಅಶ್ವಿ‌ನ್‌ ಗುರುವಾರ ಮುಂಜಾನೆ ಚೆನ್ನೈ ವಿಮಾನ ನಿಲ್ದಾಣಕ್ಕೆ ಬಂದಿಳಿದಾಗ ತಮಿಳುನಾಡಿನ ಕ್ರಿಕೆಟ್‌ ಸಂಸ್ಥೆಯ ಅಧಿಕಾರಿಗಳು ಬರಮಾಡಿಕೊಂಡರು. ಆದರೆ ಇವರಿಗಾಗಿಯೇ ಕಾದು ನಿಂತಿದ್ದ ಮಾಧ್ಯಮದವರ ಜತೆ ಮಾತಾಡಲಿಲ್ಲ. ತಮಗಾಗಿ ಕಾದಿದ್ದ ಕಾರನ್ನೇರಿದರು. ಪತ್ನಿ ಪ್ರೀತಿ ಹಾಗೂ ಇಬ್ಬರು ಪುತ್ರಿಯರು ಜತೆಯಲ್ಲಿದ್ದರು. ಆದರೆ ಮನೆಗೆ ತಲುಪಿದ ಬಳಿಕ ನಿರಾಳವಾಗಿ ಮಾತಾಡಿದರು. ಆಗ ಅವರ ತಂದೆ-ತಾಯಿ, ಕುಟುಂಬದವರು, ಮಾಧ್ಯಮದವರು, ಹಿತೈಷಿಗಳು ಉಪಸ್ಥಿತರಿದ್ದರು. ಹೂವಿನ ಹಾರ, ವಾದ್ಯಮೇಳವೂ ಇತ್ತು.

ಸಮಾಧಾನ, ತೃಪಿ ತಂದಿದೆ

ʼಅನೇಕರ ಪಾಲಿಗೆ ಇದೊಂದು ಭಾವನಾತ್ಮಕ ಸಂಗತಿ ಆಗಿರಬಹುದು. ಆದರೆ ವೈಯಕ್ತಿಕವಾಗಿ ನನ್ನ ಪಾಲಿಗೆ ಇದೊಂದು ದೊಡ್ಡ ಸಮಾಧಾನ ಹಾಗೂ ತೃಪ್ತಿಯ ಭಾವನೆ ಉಂಟುಮಾಡಿದೆ. ಇಂಥದೊಂದು ವಿಚಾರ ತಲೆಯಲ್ಲಿ ಓಡುತ್ತಿತ್ತು. 4ನೇ ದಿನದಾಟದಲ್ಲಿ ಗಟ್ಟಿ ನಿರ್ಧಾರ ಮಾಡಿದೆ. ನಾನು ಬೇರೊಂದು ಹಾದಿಯನ್ನು ಅಳವಡಿಸಿಕೊಳ್ಳಲಿದ್ದೇನೆ. “ಶೂನ್ಯ ಪಶ್ಚಾತ್ತಾಪ’ದೊಂದಿಗೆ ನಿರ್ಗಮಿಸುತ್ತಿದ್ದೇನೆ’ ಎಂದು ಅಶ್ವಿ‌ನ್‌ ಹೇಳಿದರು.

ಆರ್‌. ಅಶ್ವಿ‌ನ್‌ ಭಾರತ ತಂಡದ ಸೀನಿಯರ್‌ ಆಟಗಾರ. ನಾಯಕನಾಗುವ ಎಲ್ಲ ಅರ್ಹತೆ, ಯೋಗ್ಯತೆ ಇತ್ತು. ಆದರೆ ಈ ಅವಕಾಶ ಸಿಗಲಿಲ್ಲ. ಇದಕ್ಕೆ ಬೇಸರವಿದೆಯೇ ಎಂದು ಕೇಳಲಾದ ಪ್ರಶ್ನೆಗೆ, “ಇನ್ನು ಇದು ಅಸಾಧ್ಯ. ಆದರೆ ಈ ವಿಚಾರದಲ್ಲಿ ನನಗೆ ಯಾವುದೇ ವಿಷಾದವಾಗಲಿ, ಬೇಸರವಾಗಲಿ ಇಲ್ಲ’ ಎಂದರು.

ʼನಾನು ವಿದಾಯ ಹೇಳಿದ್ದು ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ಮಾತ್ರ. ಆದರೆ ಐಪಿಎಲ್‌ ಆಡಲಿದ್ದೇನೆ. ಎಷ್ಟು ಸಾಧ್ಯವೋ ಅಷ್ಟು ಕಾಲ ಐಪಿಎಲ್‌ನಲ್ಲಿ ಮುಂದುವರಿಯಲಿದ್ದೇನೆ’ ಎಂದು ಚೆನ್ನೈ ಸೂಪರ್‌ ಕಿಂಗ್ಸ್‌ ಅಭಿಮಾನಿಗಳಿಗೆ ಸಿಹಿ ಸುದ್ದಿಯನ್ನು ಬಿತ್ತರಿಸಿದರು.

ʼಮಗನಿಗೆ ನಿರಂತರ ಅವಮಾನ‘

ʼನನ್ನ ಮಗನಿಗೆ ತಂಡದಲ್ಲಿ ನಿರಂತರ ಅವಮಾನ ಮಾಡಲಾಗುತ್ತಿದೆ. ಇದನ್ನು ಎಷ್ಟು ದಿನ ಸಹಿಸಿಕೊಳ್ಳಲು ಸಾಧ್ಯ? ಇದು ಆತನ ನಿವೃತ್ತಿ ನಿರ್ಧಾರಕ್ಕೆ ಕಾರಣವಾಗಿರಬಹುದು…’ ಎಂದು ಆರ್‌. ಅಶ್ವಿ‌ನ್‌ ಅವರ ತಂದೆ ರವಿಚಂದ್ರನ್‌ ಸ್ಫೋಟಕ ಹೇಳಿಕೆಯೊಂದನ್ನು ನೀಡಿದ್ದಾರೆ.

ʼಮಗನ ನಿವೃತ್ತಿ ಬಗ್ಗೆ ನನಗೆ ಕೊನೆಯ ಕ್ಷಣದಲ್ಲಿ ತಿಳಿಯಿತು. ಅವನ ಮನಸ್ಸಿನಲ್ಲಿ ಏನಾಗುತ್ತಿತ್ತೋ ನನಗೆ ಗೊತ್ತಿಲ್ಲ. ಈ ನಿರ್ಧಾರ ನನಗೆ ಸಂತೋಷ ಮತ್ತು ನೋವು ಎರಡನ್ನೂ ನೀಡಿದೆ. ಅವನು ತನ್ನ ಆಟವನ್ನು ಮುಂದುವರಿಸಬೇಕಿತ್ತು. ಆದರೆ ಅವನ ನಿರ್ಧಾರದಲ್ಲಿ ನಾವ್ಯಾರೂ ಹಸ್ತಕ್ಷೇಪ ಮಾಡುವುದಿಲ್ಲ’ ಎಂದರು.

ʼಅಶ್ವಿ‌ನ್‌ ನಿವೃತ್ತಿಗೆ ಅವನದೇ ಆದ ಕಾರಣ ಇರಬಹುದು. ಅದು ಅವನಿಗೆ ಮಾತ್ರ ಗೊತ್ತು. ತಂಡದಲ್ಲಿ ಅವನಿಗೆ ಆಗಾಗ ಎದುರಾಗುತ್ತಿದ್ದ ಅವಮಾನವೂ ಇದಕ್ಕೆ ಕಾರಣವಾಗಿರಬಹುದು’ ಎಂದು ರವಿಚಂದ್ರನ್‌ ಹೇಳಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿರುವ ಅಶ್ವಿ‌ನ್‌, ಇದು ಕೇವಲ ತಂದೆಯವರ ಅನಿಸಿಕೆ ಎಂದು ಹೇಳಿದ್ದಾರೆ.