Udupi: ʼಭಾರತೀಯ ಸಂಸ್ಕೃತಿ, ಭಗವದ್ಗೀತೆʼ ಕುರಿತು ಕೆ.ಪಿ.ಪುತ್ತೂರಾಯ ಉಪನ್ಯಾಸ

Team Udayavani, Dec 24, 2024, 11:38 PM IST

ಉಡುಪಿ: ದೇಶವೆಂದರೆ ಕೇವಲ ಭೌಗೋಳಿಕ ಪ್ರದೇಶವಲ್ಲ. ದೇಶವನ್ನು ಅಲ್ಲಿನ ಬಹುಮಹಡಿ ಕಟ್ಟಡಗಳು, ಪಂಚತಾರಾ ಹೊಟೇಲ್‌ಗ‌ಳಿಂದ ಅಳೆಯುವುದಲ್ಲ. ದೇಶದ ನಿಜವಾದ ಸಂಪತ್ತು ಅಲ್ಲಿನ ಜನರ ಸಂಸ್ಕೃತಿ ಮತ್ತು ಸಂಪ್ರದಾಯಗಳಾಗಿವೆ ಎಂದು ವಾಗ್ಮಿ ಕೆ.ಪಿ. ಪುತ್ತೂರಾಯ ಅಭಿಪ್ರಾಯಪಟ್ಟರು.

ಪರ್ಯಾಯ ಶ್ರೀ ಪುತ್ತಿಗೆ ಶ್ರೀಕೃಷ್ಣ ಮಠದ ವತಿಯಿಂದ ಬೃಹತ್‌ ಗೀತೋತ್ಸವ ಪ್ರಯುಕ್ತ ರಾಜಾಂಗಣದಲ್ಲಿ ಮಂಗಳವಾರ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ “ಭಾರತೀಯ ಸಂಸ್ಕೃತಿ ಮತ್ತು ಭಗವದ್ಗೀತೆ’ ವಿಷಯದ ಕುರಿತು ಅವರು ಉಪನ್ಯಾಸ ನೀಡಿದರು.

ದೇಶವನ್ನು ನಾಶ ಮಾಡಬೇಕಾದರೆ ಆ ದೇಶದ ಮೇಲೆ ಯುದ್ಧ ಸಾರಬೇಕಾಗಿಲ್ಲ. ಸಂಸ್ಕೃತಿ ಮೇಲೆ ನಿರಂತರ ದಾಳಿ ಮಾಡಿದರೆ ಸಾಕು. ನಮ್ಮ ದೇಶದ ಸಂಸ್ಕೃತಿ ಮೇಲೆ ಸತತ ದಾಳಿಗಳಾದರೂ ಭದ್ರವಾದ ನಮ್ಮ ಸಂಸ್ಕೃತಿ ಅಲುಗಾಡಿಲ್ಲ. ಅಂತಹ ಶ್ರೀಮಂತ, ಧೀಮಂತ ಸಂಸ್ಕೃತಿ ನಮ್ಮದು ಎಂದರು.

ಮನುಷ್ಯನಿಗೆ ಮೂರು ಬದುಕುಗಳಿವೆ. ಅವು ದೇಹದ ಬದುಕು, ಮನಸ್ಸಿನ ಬದುಕು, ಆತ್ಮದ ಬದುಕು. ಅದೇ ರೀತಿ ದೇಶಕ್ಕೂ ಮೂರು ಬಗೆಯ ಬದುಕುಗಳಿವೆ. ಭೌಗೋಳಿಕ, ನೈಸರ್ಗಿಕ ಸಂಪತ್ತು ದೇಶದ ದೇಹವಾದರೆ, ಅದರ ಜನರ ಆದರ್ಶ, ಸಿದ್ಧಾಂತಗಳು ಮನಸ್ಸು ಹಾಗೂ ಸಂಸ್ಕೃತಿ, ನಂಬಿಕೆಗಳು ಆತ್ಮವಾಗಿದೆ ಎಂದರು.

ಪ್ರಸ್ತುತ ಜಗತ್ತಿನ ಜನರು ನಾನಾ ತೊಂದರೆಗಳಿಂದ ತತ್ತರಿಸಿದ್ದಾರೆ. ಅವರ ಸಮಸ್ಯೆಗಳಿಗೆ ಗೀತೆಯಲ್ಲಿ ಪರಿಹಾರವಿದೆ. ಮಠಗಳೆಂದರೆ ಬರೀ ಊಟದ ಕೇಂದ್ರಗಳಾಗಬಾರದು. ಆಧ್ಯಾತ್ಮಿಕ, ಧಾರ್ಮಿಕ, ಸಾಂಸ್ಕೃತಿಕ, ಶೈಕ್ಷಣಿಕದ ಜತೆಗೆ ಸಾಮರಸ್ಯದ ಕೇಂದ್ರಗಳಾಗಬೇಕು. ನಮ್ಮ ಆಧ್ಯಾತ್ಮಿಕ ಆಚರಣೆಗಳು ದೇಶಕ್ಕಷ್ಟೇ ಸೀಮಿತವಾದರೆ ಸಾಲದು. ಅನಿವಾಸಿ ಭಾರತೀಯರಿಗೂ ತಲುಪಬೇಕೆಂಬ ಉದ್ದೇಶದಿಂದ ಪರ್ಯಾಯ ಶ್ರೀ ಪುತ್ತಿಗೆ ಶ್ರೀಗಳು ಜಗತ್ತಿನಾದ್ಯಂತ ಮಠಗಳನ್ನು ಸ್ಥಾಪಿಸಿದ್ದಾರೆ ಎಂದರು.

ಪರ್ಯಾಯ ಶ್ರೀ ಪುತ್ತಿಗೆ ಮಠಾಧೀಶರಾದ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು ಅನುಗ್ರಹಿಸಿ, ಭಗವದ್ಗೀತೆಯ ಸಾರವನ್ನು ಯಾರು ಅನುಷ್ಠಾನ ಮಾಡುತ್ತಾರೋ ಅವರು ಸಾಧಕರಾಗಲು ಸಾಧ್ಯ. ಪ್ರತಿಯೊಬ್ಬರೂ ಸಾಧಕರಾಗಬೇಕೆಂಬುದು ಗೀತೆಯ ಉದ್ದೇಶ. ಕೇವಲ ಕರ್ಮ ಮಾಡುವುದಲ್ಲ ಅದರಲ್ಲಿ ತಲ್ಲೀನರಾಗಬೇಕೆಂದು ಗೀತೆ ಹೇಳಿದೆ. ಕೆಲಸ ಚಿಕ್ಕದಾಗಿರಲಿ ದೊಡ್ಡದಾಗಿರಲಿ ಅದರಲ್ಲಿ ತನ್ಮಯತೆ ಮುಖ್ಯ. ಚಿಕ್ಕ ಕೆಲಸವೂ ದೊಡ್ಡ ಸಾಧನೆಯಾಗಬಹುದು ಎಂದರು.

ಪುತ್ತಿಗೆ ಕಿರಿಯ ಯತಿ ಶ್ರೀ ಸುಶ್ರೀಂದ್ರತೀರ್ಥ ಶ್ರೀಪಾದರು ಉಪಸ್ಥಿತರಿದ್ದರು.

ಕೃಷ್ಣಾನುಗ್ರಹ ಪ್ರಶಸ್ತಿ
ಉಡುಪಿ: ಶ್ರೀ ಕೃಷ್ಣಮಠ ಪರ್ಯಾಯ ಶ್ರೀ ಪುತ್ತಿಗೆಮಠದಿಂದ ಬೃಹತ್‌ ಗೀತೋತ್ಸವ ಅಂಗವಾಗಿ ರಾಜಾಂಗಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಕುಂಭಕೋಣಂನ ವಿಷ್ಣುಪುರಂನಲ್ಲಿ ಗೋಶಾಲೆಯನ್ನು ನಡೆಸಿ, ದೊಡ್ಡಮಟ್ಟದಲ್ಲಿ ಗೋಸಂರಕ್ಷಣೆ ಮಾಡುತ್ತಿರುವ ಕೆ. ಗುರುಪ್ರಸಾದ್‌ ಕುಂಭಕೋಣಂ ಹಾಗೂ ಪೌರೋಹಿತ್ಯ ವೃತ್ತಿ ನಡೆಸುತ್ತಿರುವ ವೇದಪಂಡಿತರಾದ ಕೊಯಮತ್ತೂರಿನ ಕೆ.ಎಸ್‌.ಗೋಪಾಲಕೃಷ್ಣ ಭಟ್‌ ಅವರಿಗೆ ಪರ್ಯಾಯ ಶ್ರೀ ಪುತ್ತಿಗೆ ಮಠಾಧೀಶರಾದ ಸುಗುಣೇಂದ್ರತೀರ್ಥ ಶ್ರೀಪಾದರು, ಕಿರಿಯ ಯತಿ ಶ್ರೀ ಸುಶ್ರೀಂದ್ರತೀರ್ಥ ಶ್ರೀಪಾದರು ಶ್ರೀಕೃಷ್ಣಾಗೀತಾನುಗ್ರಹ ಪ್ರಶಸ್ತಿ ನೀಡಿ ಅನುಗ್ರಹಿಸಿದರು.