Women’s ODI: ಹರ್ಲೀನ್ ಶತಕ; ವಿಂಡೀಸ್‌ ವಿರುದ್ಧ ಭಾರತಕ್ಕೆ 2-0 ಸರಣಿ ಜಯ

Team Udayavani, Dec 24, 2024, 11:55 PM IST

ವಡೋದರಾ: ಹರ್ಲೀನ್ ದೇವಲ್‌ ಅವರ ಅಮೋಘ ಶತಕದೊಂದಿಗೆ ಅಬ್ಬರಿಸಿದ ಭಾರತದ ವನಿತೆಯರು ವೆಸ್ಟ್‌ ಇಂಡೀಸ್‌ ಎದುರಿನ ದ್ವಿತೀಯ ಪಂದ್ಯವನ್ನು 115 ರನ್ನುಗಳ ದೊಡ್ಡ ಅಂತರದಿಂದ ಗೆದ್ದು ಸರಣಿಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಇನ್ನೊಂದು ಪಂದ್ಯ ಬಾಕಿಯಿರುವಂತೆಯೇ ಭಾರತ 2-0ಯಿಂದ ಸರಣಿ ಗೆದ್ದಿದೆ. ಮೊದಲು ಬ್ಯಾಟಂಗ್‌ ನಡೆಸಿದ ಭಾರತ 5 ವಿಕೆಟಿಗೆ 358 ರನ್‌ ರಾಶಿ ಹಾಕಿತು. ಇದು ಏಕದಿನದಲ್ಲಿ ಭಾರತದ ಜಂಟಿ ಸರ್ವಾಧಿಕ ಮೊತ್ತ. 2017ರ ಪೊಚೆಫ್ಸೂಮ್‌ ಪಂದ್ಯದಲ್ಲಿ ಐರ್ಲೆಂಡ್‌ ವಿರುದ್ಧ 2 ವಿಕೆಟಿಗೆ ಇಷ್ಟೇ ರನ್‌ ಬಾರಿಸಿತ್ತು. ಜವಾಬಿತ್ತ ವೆಸ್ಟ್‌ ಇಂಡೀಸ್‌ 46.2 ಓವರ್‌ಗಳಲ್ಲಿ 243ಕ್ಕೆ ಆಲೌಟ್‌ ಆಯಿತು. ನಾಯಕಿ ಹ್ಯಾಲಿ ಮ್ಯಾಥ್ಯೂಸ್‌ ಏಕಾಂಗಿಯಾಗಿ ಹೋರಾಟ ನಡೆಸಿ 106 ರನ್‌ ಬಾರಿಸಿದರು.

ಹರ್ಲೀನ್ ಮೊದಲ ಶತಕ: ಒನ್‌ಡೌನ್‌ ಆಟಗಾರ್ತಿ ಹಲೀìನ್‌ ದೇವಲ್‌ ಅವರ ಚೊಚ್ಚಲ ಶತಕ ಭಾರತದ ಸರದಿಯ ಆಕರ್ಷಣೆ ಆಗಿತ್ತು. ಅವರು 103 ಎಸೆತಗಳಿಂದ 115 ರನ್‌ ಕೊಡುಗೆ ಸಲ್ಲಿಸಿದರು. ಸ್ಮತಿ ಮಂಧನಾ 53, ಪ್ರತೀಕಾ 76 ರನ್‌ ಬಾರಿಸಿದರು.

ಸಂಕ್ಷಿಪ್ತ ಸ್ಕೋರ್‌: ಭಾರತ 50 ಓವರ್‌, 358/5 (ಹರ್ಲೀನ್ 115, ಪ್ರತೀಕಾ 76, ಮಂಧನಾ 53, ಜೆಮಿಮಾ 52, ಕ್ವಿಯಾನಾ 27ಕ್ಕೆ 1). ವೆಸ್ಟ್‌ ಇಂಡೀಸ್‌ 46.2 ಓವರ್‌, 243 (ಮ್ಯಾಥ್ಯೂಸ್‌ 106, ಪ್ರಿಯಾ 49ಕ್ಕೆ 3, ಪ್ರತೀಕಾ 37ಕ್ಕೆ 2).