Kasaragod: ಚಪ್ಪರ ತೆಗೆಯುತ್ತಿದ್ದಾಗ ವಿದ್ಯುತ್‌ ಶಾಕ್‌: ಕಾರ್ಮಿಕನ ಸಾವು

Team Udayavani, Dec 27, 2024, 12:04 AM IST

ಕಾಸರಗೋಡು: ಮದುವೆ ಮನೆಯಲ್ಲಿ ಚಪ್ಪರ ತೆಗೆಯುವ ಸಂದರ್ಭ ವಿದ್ಯುತ್‌ ಶಾಕ್‌ ತಗಲಿ ಕಾರ್ಮಿಕ ಮೃತಪಟ್ಟ ಘಟನೆ ಕಾಸರಗೋಡು ತಳಂಗರೆ ತೆರುವತ್ತಿನಲ್ಲಿ ಗುರುವಾರ ಮಧ್ಯಾಹ್ನ ಸಂಭವಿಸಿದೆ.

ಕರ್ನಾಟಕದ ಬಾಗಲಕೋಟೆ ನಿವಾಸಿ ರಾಮಣ್ಣ ಅವರ ಪುತ್ರ ಪ್ರಮೋದ್‌ ರಾಮಣ್ಣ (30) ಮೃತಪಟ್ಟವರು.

ತೆರುವತ್ತಿನ ಗೋಲ್ಡನ್‌ ಬೇಕರಿ ಸಮೀಪದ ಎ.ಜಿ. ಫಿರೋಝ್ ಅವರ ಮನೆಯಲ್ಲಿ ಮದುವೆ ಸಮಾರಂಭ ನಡೆದಿದ್ದು ಚೆರ್ಕಳದ ಸಂಸ್ಥೆಯೊಂದು ಚಪ್ಪರ ಹಾಕಿತ್ತು. ಮದುವೆ ಕಳೆದ ಅನಂತರ ಗುರುವಾರ ಚಪ್ಪರ ಇಳಿಸಲು ಪ್ರಮೋದ್‌ ರಾಮಣ್ಣ ಹಾಗೂ ಇತರ ಕಾರ್ಮಿಕರು ಆಗಮಿಸಿದ್ದರು.

ಚಪ್ಪರದ ಕಬ್ಬಿಣದ ರಾಡ್‌ ಲಾರಿಗೆ ಹತ್ತಿಸುತ್ತಿದ್ದಂತೆ ಅದು ವಿದ್ಯುತ್‌ ತಂತಿಗೆ ತಗಲಿ ಶಾಕ್‌ ಬಡಿಯಿತು. ಕೂಡಲೇ ಪ್ರಮೋದ್‌ರನ್ನು ತಳಂಗರೆ ಮಾಲಿಕ್‌ ದೀನಾರ್‌ ಆಸ್ಪತ್ರೆಗೆ ಕೊಂಡೊಯ್ದರೂ ರಕ್ಷಿಸಲು ಸಾಧ್ಯವಾಗಲಿಲ್ಲ. ಮೃತದೇಹವನ್ನು ಕಾಸರಗೋಡು ಜನರಲ್‌ ಆಸ್ಪತ್ರೆಯ ಶವಾಗಾರದಲ್ಲಿರಿಸಲಾಗಿದೆ.