Actor; ಖ್ಯಾತ ನಟಿ ಉರ್ಮಿಳಾ ಕೊಠಾರೆ ಅವರ ಕಾರು ಹರಿದು ಓರ್ವ ಸಾ*ವು

Team Udayavani, Dec 28, 2024, 8:11 PM IST

ಮುಂಬಯಿ: ನಗರದ ಕಾಂದಿವಲಿಯಲ್ಲಿ ಮರಾಠಿ ನಟಿ ಊರ್ಮಿಳಾ ಕೊಠಾರೆ ಅವರ ಕಾರು ಢಿಕ್ಕಿ ಹೊಡೆದ ಪರಿಣಾಮ ಓರ್ವ ಕಾರ್ಮಿಕ ಸಾವನ್ನಪ್ಪಿದ್ದು, ಮತ್ತೊಬ್ಬ ಗಾಯಗೊಂಡಿದ್ದಾರೆ. ಶನಿವಾರ(ಡಿ28 ) ನಡೆದ ಅಪಘಾತದಲ್ಲಿ ನಟಿ ಮತ್ತು ಆಕೆಯ ಚಾಲಕ ಕೂಡ ಗಾಯಗೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಊರ್ಮಿಳಾ ಅವರು ಬರುತ್ತಿದ್ದ ಕಾರು ಪೊಯಿಸರ್ ಮೆಟ್ರೋ ನಿಲ್ದಾಣದ ಬಳಿ ಅಪಘಾತಕ್ಕೀಡಾಗಿದೆ. ಅತಿವೇಗದಿಂದ ಬಂದ ಕಾರು ಚಾಲಕನ ನಿಯಂತ್ರಣ ತಪ್ಪಿ ಇಬ್ಬರು ಮೆಟ್ರೋ ಕಾರ್ಮಿಕರಿಗೆ ಢಿಕ್ಕಿ ಹೊಡೆದಿದೆ. ಓರ್ವ ಕಾರ್ಮಿಕ ಸ್ಥಳದಲ್ಲೇ ಮೃತಪಟ್ಟರೆ, ಮತ್ತೊಬ್ಬ ತೀವ್ರವಾಗಿ ಗಾಯಗೊಂಡಿದ್ದಾರೆ. ಕಾರಿನ ಏರ್‌ಬ್ಯಾಗ್‌ ಸಕಾಲದಲ್ಲಿ ತೆರೆದುಕೊಂಡಿದ್ದರಿಂದ ನಟಿಯ ಪ್ರಾಣ ಉಳಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಚಾಲಕನ ವಿರುದ್ಧ ಸಮತಾ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ನಟಿಯ ಕಾರಿಗೆ ತೀವ್ರ ಸ್ವರೂಪದ ಹಾನಿಯಾಗಿದೆ.

ಊರ್ಮಿಳಾ ಕೊಠಾರೆ ಪ್ರಸಿದ್ಧ ಮರಾಠಿ ನಟಿಯಾಗಿದ್ದು ‘ದುನಿಯಾದಾರಿ’, ‘ಶುಭಮಂಗಳ ಸಾವಧಾನ್’ ಮತ್ತು ‘ತಿ ಸದ್ಯ ಕೇ ಕರ್ತೆ’ ಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಅವರು ಇತ್ತೀಚೆಗೆ ಸ್ಟಾರ್ ಪ್ರವಾ ಶೋ ‘ತುಜೆಚ್ ಮಿ ಗೀತ್ ಗಾತ್ಹೆ’ ಮೂಲಕ 12 ವರ್ಷಗಳ ವಿರಾಮದ ನಂತರ ಸಣ್ಣ ಪರದೆಗೆ ಮರಳಿದ್ದರು.