INDvAUS: ಅಬ್ಬರಿಸಿದ ಬುಮ್ರಾ-ಸಿರಾಜ್:‌ ಕೊನೆಯಲ್ಲಿ ಕಾಡಿದ ಲಿಯಾನ್‌- ಬೊಲ್ಯಾಂಡ್

Team Udayavani, Dec 29, 2024, 12:46 PM IST

ಮೆಲ್ಬೋರ್ನ್:‌ ‌ಆರಂಭದಲ್ಲಿ ಭಾರತೀಯ ವೇಗಿಗಳ ಬಿಗು ದಾಳಿಗೆ ಆಸೀಸ್‌ ಬ್ಯಾಟರ್‌ ಗಳು ತಕ್ಕಮಟ್ಟಿಗೆ ಪರದಾಡಿದರೆ, ಕೊನೆಯಲ್ಲಿ ಬಾಲಂಗೋಚಿಗಳಾದ ಲಿಯಾನ್‌ ಮತ್ತು ಬೊಲ್ಯಾಂಡ್‌ ಸೇರಿ ಭಾರತೀಯ ಬೌಲರ್‌ ಗಳನ್ನು ಸುಸ್ತು ಮಾಡಿದರು. ಇದು ಮೆಲ್ಬೋರ್ನ್‌ ಟೆಸ್ಟ್‌ ನ ನಾಲ್ಕನೇ ದಿನದಾಟದ ಸಾರಂಶ.

ಮೊದಲ ಇನ್ನಿಂಗ್ಸ್‌ ನಲ್ಲಿ 105 ರನ್‌ ಮುನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್‌ ಬ್ಯಾಟಿಂಗ್‌ ಆರಂಭಿಸಿದ ಆಸೀಸ್‌ ತಂಡವು ದಿನದ ಕೊನೆಗೆ 9 ವಿಕೆಟ್‌ ನಷ್ಟಕ್ಕೆ 228 ರನ್‌ ಗಳಿಸಿದೆ. ಇದರೊಂದಿಗೆ 333 ರನ್‌ ಮುನ್ನಡೆ ಸಾಧಿಸಿದೆ.

ಮೊದಲ ಇನ್ನಿಂಗ್ಸ್‌ ನಲ್ಲಿ ಅರ್ಧಶತಕ ಬಾರಿಸಿದ್ದ ಮಾರ್ನಸ್‌ ಲಬುಶೇನ್‌ ಮತ್ತೆ ಆಸೀಸ್‌ ಗೆ ನೆರವಾದರು. ಲಬುಶೇನ್‌ 70 ರನ್‌ ಗಳಿಸಿ ಔಟಾದರು. ಉಳಿದಂತೆ ನಾಯಕ ಪ್ಯಾಟ್‌ ಕಮಿನ್ಸ್‌ 41 ರನ್‌ ಮಾಡಿದರು. 173 ರನ್‌ ಗೆ 9 ವಿಕೆಟ್‌ ಬಿದ್ದಾಗ ಭಾರತಕ್ಕೆ ಸುಲಭ ಗುರಿ ಸಿಗುವ ಅಂದಾಜಿತ್ತು. ಆದರೆ ಕೊನೆಯ ವಿಕೆಟ್‌ ಗೆ ಜೊತೆಯಾದ ನಥನ್‌ ಲಿಯಾನ್‌  ಮತ್ತು ಸ್ಕಾಟ್‌ ಬೊಲ್ಯಾಂಡ್‌ ಮುರಿಯದ 55 ರನ್‌ ಜೊತೆಯಾಟ ನಡೆಸಿ ಬೌಲರ್‌ ಗಳನ್ನು ಕಾಡಿದರು.

ಮೂರನೇ ದಿನದಾಟದ ಅಂತ್ಯಕ್ಕೆ 9 ವಿಕೆಟ್‌ ಗೆ 358 ರನ್‌ ಗಳಿಸಿದ್ದ ಭಾರತವು ಇಂದು 369 ರನ್‌ ಗೆ ಆಲೌಟಾಯಿತು. ಚೊಚ್ಚಲ ಶತಕ ಬಾರಿಸಿದ್ದ ನಿತೀಶ್‌ ಕುಮಾರ್‌ ರೆಡ್ಡಿ 114 ರನ್‌ ಗೆ ಆಲೌಟಾದರು. ಕೊನೆಯ ವಿಕೆಟ್‌ ನಾಥನ್‌ ಲಿಯಾನ್‌ ಪಾಲಾಯಿತು.

ಬುಮ್ರಾ ದಾಖಲೆ

ಟೆಸ್ಟ್ ಕ್ರಿಕೆಟ್‌ನಲ್ಲಿ 200 ಅಥವಾ ಅದಕ್ಕಿಂತ ಹೆಚ್ಚು ವಿಕೆಟ್‌ಗಳನ್ನು ಹೊಂದಿರುವ ಎಲ್ಲಾ ಬೌಲರ್‌ ಗಳಲ್ಲಿ ಬುಮ್ರಾ ಅತ್ಯುತ್ತಮ ಸರಾಸರಿ ಹೊಂದಿದ್ದಾರೆ.

ಜಸ್ಪ್ರೀತ್ ಬುಮ್ರಾ ಅವರು ಟೆಸ್ಟ್ ಕ್ರಿಕೆಟ್‌ ನಲ್ಲಿ 19.5 ಸರಾಸರಿಯನ್ನು ಹೊಂದಿದ್ದಾರೆ. ಮಾಲ್ಕಮ್ ಮಾರ್ಷಲ್ (20.9), ಜೋಯಲ್ ಗಾರ್ನರ್ (21.0), ಮತ್ತು ಕರ್ಟ್ಲಿ ಆಂಬ್ರೋಸ್ (21.0) ಅವರಿಗಿಂತ ಉತ್ತಮ ಸರಾಸರಿಯಲ್ಲಿ 200 ವಿಕೆಟ್‌ ಪಡೆದ ಸಾಧನೆ ಮಾಡಿದರು.