Bantwal: ಬರಿಮಾರು; ಕಾಲು ಜಾರಿ ನದಿಗೆ ಬಿದ್ದು ವ್ಯಕ್ತಿ ಮೃತ್ಯು

Team Udayavani, Jan 4, 2025, 9:22 PM IST

ಬಂಟ್ವಾಳ: ಬರಿಮಾರು ಗ್ರಾಮದ ಕಡವಿನ ಬಳಿಯಲ್ಲಿ ವ್ಯಕ್ತಿಯೊಬ್ಬರು ನೇತ್ರಾವತಿ ನದಿ ಕಿನಾರೆಯ ತೋಟಕ್ಕೆ ಹುಲ್ಲು ತರಲು ಹೋದವರು ಆಕಸ್ಮಿಕವಾಗಿ ಕಾಲು ಜಾರಿ ನೀರಿಗೆ ಬಿದ್ದು ಮೃತಪಟ್ಟ ಘಟನೆ ಜ. 3ರಂದು ನಡೆದಿದ್ದು, ಶನಿವಾರ ಬೆಳಗ್ಗೆ ಅವರ ಮೃತದೇಹ ಪತ್ತೆಯಾಗಿದೆ.

ಕಡವಿನ ಬಳಿ ನಿವಾಸಿ ದಿವಾಕರ ಪೂಜಾರಿ (48) ಮೃತಪಟ್ಟವರು. ಅವರು ಮನೆಯಲ್ಲಿಯೇ ಕೃಷಿ ಕೆಲಸ ಮಾಡಿಕೊಂಡಿದ್ದು, ಜ. 3ರಂದು ಬೆಳಗ್ಗೆ ದನಕರುಗಳಿಗೆ ಹುಲ್ಲು ತರಲು ಮನೆಯ ಸಮೀಪದ ತೋಟಕ್ಕೆ ಹೋಗಿದ್ದ ವೇಳೆ ಘಟನೆ ನಡೆದಿದೆ. ತೋಟಕ್ಕೆ ಹೋದವರು ಸಾಕಷ್ಟು ಹೊತ್ತಾದರೂ ಮರಳಿ ಬಾರದೇ ಇದ್ದು, ಹುಡುಕಾಡಿಕೊಂಡು ಹೋದಾಗ ನದಿ ಕಿನಾರೆಯಲ್ಲಿ ಅವರ ಪಾದರಕ್ಷೆ, ಕತ್ತಿ, ಹುಲ್ಲಿನ ಕಟ್ಟು ಪತ್ತೆಯಾಗಿದ್ದು, ನದಿಗೆ ಬಿದ್ದಿರುವ ಶಂಕೆ ವ್ಯಕ್ತವಾಗಿದೆ.

ಬಳಿಕ ನದಿಯಲ್ಲಿ ಹುಡುಕಾಡಿದರೂ ಮೃತದೇಹ ಪತ್ತೆಯಾಗದೇ ಇದ್ದು, ಶನಿವಾರ ಬೆಳಗ್ಗೆ ನದಿಯಲ್ಲಿ ಮೃತದೇಹವೊಂದು ತೇಲುತ್ತಿರುವುದು ಕಂಡುಬಂದಿದೆ. ಮೇಲಕ್ಕೆತ್ತಿ ಪರಿಶೀಲಿಸಿದಾಗ ಅದು ದಿವಾಕರ ಅವರ ಮೃತದೇಹವೆಂದು ಖಚಿತಗೊಂಡಿದೆ. ಅವರ ಪುತ್ರ ಸುಮಂತ್‌ ನೀಡಿದ ದೂರಿನಂತೆ ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.