Kerala: 20 ವರ್ಷದಿಂದ ಪಾಳು ಬಿದಿದ್ದ ಮನೆಯ ಫ್ರಿಡ್ಜಲ್ಲಿ ತಲೆಬುರುಡೆ ಪತ್ತೆ!

Team Udayavani, Jan 8, 2025, 6:48 AM IST

ತಿರುವನಂತಪುರಂ: ದೇಶದ ವಿವಿಧೆಡೆ ಫ್ರಿಡ್ಜ್ ಮರ್ಡರ್‌ ಪ್ರಕರಣಗಳು ಜನರನ್ನು ಬೆಚ್ಚಿ ಬೀಳಿಸುತ್ತಿರುವಂತೆಯೇ ಕೇರಳದ ಚೊಟ್ಟನಿಕ್ಕಾರ ಎಂಬಲ್ಲಿ ಕಳೆದ 20 ವರ್ಷಗಳಿಂದ ಪಾಳುಬಿದ್ದಿದ್ದ ಮನೆಯೊಂದರ ಫ್ರಿಡ್ಜ್ನಲ್ಲಿ ಮನುಷ್ಯನ ತಲೆಬುರುಡೆ, ಮೂಳೆಗಳು ಪತ್ತೆಯಾಗಿವೆ. ಇದು ಸ್ಥಳೀಯರನ್ನು ಬೆಚ್ಚಿಬೀಳಿಸಿದೆ.

ಫಿಲಿಪ್‌ ಜಾನ್‌ ಎಂಬ ವೈದ್ಯರ ಒಡೆತನದ ಈ ಮನೆಯು 20 ವರ್ಷದಿಂದ ಪಾಳು ಬಿದ್ದಿದ್ದು, ಡಾಕ್ಟರ್‌ ಬೇರೆಡೆ ವಾಸಿಸುತ್ತಿದ್ದಾರೆ. ಅವರ ಮಕ್ಕಳೂ ವಿದೇಶದಲ್ಲಿದ್ದಾರೆ.

ಈತನ್ಮಧ್ಯೆ, ಅಕ್ರಮ ಚಟುವಟಿಕೆಗಳಿಗೆ ಹಲವರು ಪಾಳು ಮನೆ ಬಳಸಿಕೊಳ್ಳುತ್ತಿದ್ದಾರೆ ಎಂದು ಸ್ಥಳೀಯರು ದೂರು ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಪೊಲೀಸರು ಮನೆಯಲ್ಲಿ ಶೋಧ ನಡೆಸಿದಾಗ ಹಾಳಾಗಿರುವ ಫ್ರಿಡ್ಜ್ನಲ್ಲಿ ಕವರ್‌ನಲ್ಲಿ ಸುತ್ತಿಟ್ಟಿದ್ದ ತಲೆಬುರುಡೆ, ಮೂಳೆ ಸಿಕ್ಕಿವೆ. ಅವುಗಳನ್ನು ಎಷ್ಟು ವರ್ಷದ ಹಿಂದೆ ತಂದು ಇರಿಸಲಾಗಿದೆ ಎಂಬುದು ವಿಧಿವಿಜ್ಞಾನ ಪರೀಕ್ಷೆ ಬಳಿಕವೇ ತಿಳಿಯಬೇಕಿದೆ.