Mudhol: ಪ್ರಯಾಣಿಕರ ಉಪಯೋಗಕ್ಕೆ ಬಾರದ ತಂಗುದಾಣ… ಅಂಗಡಿ ಮುಂಗಟ್ಟಿನಿಂದ ಕಣ್ಮರೆ

Team Udayavani, Jan 11, 2025, 1:33 PM IST

ಮುಧೋಳ: ಪ್ರಯಾಣಿಕರ ಅನುಕೂಲಕ್ಕಾಗಬೇಕಾಗಿದ್ದ ಬಸ್ ನಿಲ್ದಾಣ ಊರವರ ಮಧ್ಯಾಹ್ನದ ಶಯನಗೃಹವಾಗಿ ಬದಲಾದ ಪರಿಣಾಮ ಸಾರಿಗೆ ಬಸ್ ಗಾಗಿ ಕಾಯುವ ಪ್ರಯಾಣಿಕರು ಹೆದ್ದಾರಿ ಪಕ್ಕದಲ್ಲಿ ನಿಂತು ಹೈರಾಣಾಗುವ ಪರಿಸ್ಥಿತಿ ಸಮೀಪದ ಚಿಂಚಖಂಡಿ ಕೆ.ಡಿ. ಗ್ರಾಮದಲ್ಲಿ ಹಲವಾರು ವರ್ಷಗಳಿಂದ ನಿರ್ಮಾಣವಾಗಿದೆ.

ರಸ್ತೆ ಪಕ್ಕ ಹಲವು ದಶಕಗಳ ಹಿಂದೆ ನಿರ್ಮಾಣಗೊಂಡಿರುವ ಬಸ್ ನಿಲ್ದಾಣದ ಮುಂಭಾಗದಲ್ಲಿ ಅಂಗಡಿ, ಮುಂಗಟ್ಟುಗಳು ತಲೆಯೆತ್ತಿರುವ ಪರಿಣಾಮ ಪ್ರಯಾಣಿಕರಿಗೆ ಕಣ್ಣೆದುರಿಗೆ ಇರುವ ತಂಗುದಾಣವನ್ನು ಹುಡುಕುವುದು ಕಷ್ಟಕರವಾಗಿದೆ.

ರಾಜ್ಯ ಹೆದ್ದಾರಿ ಮೇಲೆ ನಿಲ್ಲುವ ಸ್ಥಿತಿ: ಚಿಂಚಖಂಡಿ ಕೆ.ಡಿ. ಗ್ರಾಮ ಜಮಖಂಡಿ-ಬೆಳಗಾವಿ ರಾಜ್ಯ ಹೆದ್ದಾರಿಗೆ ಹೊಂದಿಕೊಂಡಿದೆ. ನಿತ್ಯ ಈ ಮಾರ್ಗದಲ್ಲಿ ಸಾವಿರಾರು ವಾಹನಗಳ ಓಡಾಟ ಸರ್ವೇ ಸಾಮಾನ್ಯ. ಅದೂ ಅಲ್ಲದೆ ಕಬ್ಬು ಹಂಗಾಮು ಆರಂಭವಾಗಿರುವುದರಿಂದ ಕಬ್ಬು ತುಂಬಿದ ವಾಹನಗಳು ಹೆಚ್ಚಿನ ಸಂಖ್ಯೆಯಲ್ಲಿಯೇ ಓಡಾಡುತ್ತಿರುತ್ತವೆ. ಆದರೆ ರಸ್ತೆ ಪಕ್ಕದಲ್ಲಿಯೇ ಸಾರ್ವಜನಿಕರೂ ಬಸ್ ಗಾಗಿ ಕಾದು ನಿಲ್ಲುವುದರಿಂದ ಅಪಘಾತಗಳು ಸಂಭವಿಸುವ ಸನ್ನಿವೇಶ ದಟ್ಟವಾಗಿರುತ್ತವೆ. ಕುಳಿತುಕೊಳ್ಳಲು ಸೂಕ್ತ ನಿಲ್ದಾಣವಿಲ್ಲದ ಪರಿಣಾಮ ಅನಿವಾರ್ಯವಾಗಿ ಸಾರ್ವಜನಿಕರು ರಸ್ತೆ ಪಕ್ಕದಲ್ಲಿಯೇ ನಿಂತು ಬಸ್ ಗಾಗಿ ಕಾಯುವಂತಾಗಿದೆ. ರಸ್ತೆ ಪಕ್ಕದಲ್ಲಿ ಕುಳಿತುಕೊಳ್ಳಲು ಜಾಗವಿಲ್ಲದ ಪರಿಣಾಮ ಪ್ರಯಾಣಿಕರು ಬಿಸಿಲು ಬೆರಳೆನ್ನದೆ ರಸ್ತೆ ಪಕ್ಕದಲ್ಲಿಯೇ ನಿಂತುಕೊಳ್ಳಬೇಕಾಗಿದೆ.

ಸುತ್ತಳ್ಳಿಗಳಿಗೆ ಕೇಂದ್ರ ಬಿಂದು: ಚಿಂಚಖಂಡಿ ಗ್ರಾಮ ಮುಧೋಳದಿಂದ 8 ಕಿ.ಮೀ ಅಂತರದಲ್ಲಿದ್ದರೂ ತನ್ನ ಸುತ್ತಲಿನ ಗ್ರಾಮಗಳಾಗಿರುವ ಜಂಬಗಿ ಕೆ.ಡಿ., ಗುಲಗಾಲ ಜಂಬಗಿ, ಕಸಬಾ ಜಂಬಗಿಗೆ ಕೇಂದ್ರಬಿಂದುವಾಗಿದೆ. ಜಿಲ್ಲಾ ಕೇಂದ್ರಗಳಿಗೆ ತೆರಳಬೇಕಾದರೆ ಚಿಂಚಖಂಡಿಯಿಂದಲೆ ಬಸ್ ಹತ್ತುವ ಅನಿವಾರ್ಯತೆ ಇರುವುದರಿಂದ ಚಿಂಚಖಂಡಿ ಗ್ರಾಮವೂ ನಿತ್ಯ ಜನಸಂದಣಿಯಿಂದ ಕೂಡಿರುತ್ತದೆ. ಶಾಲಾ ವಿದ್ಯಾರ್ಥಿಗಳು ನಿತ್ಯ ಶಾಲೆ ಕಾಲೇಜುಗಳಿಗೆ ತೆರಳಲು ರಸ್ತೆ ಪಕ್ಕದಲ್ಲಿಯೇ ನಿಂತು ಬಸ್ ಗಾಗಿ ಕಾಯುವಂತಾಗಿದೆ.

ಮಲಗಲು ಹೇಳಿ ಮಾಡಿಸಿರುವ ಜಾಗ: ಚಿಂಚಖಂಡಿ ಗ್ರಾಮದ ಹೆದ್ದಾರಿ ಪಕ್ಕದಲ್ಲಿರುವ ಬಸ್ ನಿಲ್ದಾಣ ಮಲಗಲು ಹೇಳಿ ಮಾಡಿಸಿದಂತಾಗಿದೆ. ಊರಿನ ಯುವಕರು, ವೃದ್ದರು ಮಧ್ಯಾಹ್ನದ ಸಮಯದಲ್ಲಿ ಬಸ್ ನಿಲ್ದಾಣದಲ್ಲಿ ನಿದ್ರೆಗೆ ಜಾರುವುದರಿಂದ ಸಾರ್ವಜನಿಕರು ಅತ್ತ ಸುಳಿಯುವುದಿಲ್ಲ. ಬಸ್ ನಿಲ್ದಾಣದ ಸುತ್ತ ಗಿಡಮರಗಳು ಬೆಳೆದಿರುವುದರಿಂದ ತಂಪಾದ ವಾತಾವರಣ ಮನೆಮಾಡಿರುತ್ತದೆ. ಗ್ರಾಮಸ್ಥರು ನೆರಳಿನ ಆಶ್ರಯಕ್ಕಾಗಿ ಬಸ್ ನಿಲ್ದಾಣಕ್ಕೆ ಬಂದು ಅಲ್ಲಿಯೇ ಮಲಗಿ ನಿದ್ದೆ ಮಾಡುವ ದೃಶ್ಯ ಸರ್ವೇ ಸಾಮಾನ್ಯವಾಗಿದೆ. ಅದೂ ಅಲ್ಲದೆ ಪಾನ್ ಶಾಪ್ ಗಳು ಬಸ್ ನಿಲ್ದಾಣದ ಮುಂಬಾಗದಲ್ಲಿ ತಲೆಯೆತ್ತಿರುವುದರಿಂದ ಜನರಿಗೆ ಸರಾಗವಾಗಿ ತೆರಳುವುದು ಕಷ್ಟಸಾಧ್ಯವಾಗಿದೆ.

ಬೇಕಿದೆ ನೂತನ ಬಸ್ ನಿಲ್ದಾಣ ಕಟ್ಟಡ : ಚಿಂಚಖಂಡಿ ಗ್ರಾಮದಲ್ಲಿನ ಬಸ್ ನಿಲ್ದಾಣ ಸದ್ಯ ಶಿಥಿಲಾವಸ್ಥೆಯಲ್ಲುದ್ದು ನೂತನ ಕಟ್ಟಡದ ಅನಿವಾರ್ಯತೆ ಇದೆ. ಹಳೆಯ ಕಟ್ಟಡ ಶಿಥಿಲಗೊಂಡಿದ್ದು ಅದನ್ನು ತೆರವುಗೊಳಿಸಿ ನೂತನ ಕಟ್ಟಡ ನಿರ್ಮಿಸಿ ಪ್ರಯಾಣಿಕರ ಉಪಯೋಗಕ್ಕೆ ಬರುವಂತೆ ಕ್ರಮ ವಹಿಸಬೇಕು ಎಂಬುದು ಇಲ್ಲಿನ ಜನರ ಆಗ್ರಹವಾಗಿದೆ.
**
ಚಿಂಚಖಂಡಿ ಕೆ.ಡಿ. ಗ್ರಾಮದದಲ್ಲಿನ ಬಸ್ ನಿಲ್ದಾಣ ಇದ್ದೂ ಇಲ್ಲದಂತಾಗಿದೆ. ಬೇರೆ ಊರಿನಿಂದ ಬರುವ ಸಾರ್ವಜನಿಕರಿಗೆ ಬಸ್ ನಿಲ್ದಾಣ ಕಾಣಿಸದಷ್ಟು ಅಂಗಡಿ‌ ಮುಂಗಟ್ಟುಗಳು ತಲೆಯೆತ್ತಿವೆ. ಈ ಬಗ್ಗೆ ಅಧಿಕಾರಿಗಳು ಗಮನ ಹರಿಸಿ ಸಾರ್ವಜನಿಕರಿಗೆ ಅನುಕೂಲ ಕಲ್ಪಿಸಿಕೊಡಬೇಕು.
– ಅಶೋಕ‌ ಸಾಲಾಪುರ ಪ್ರಯಾಣಿಕ

ಇದನ್ನೂ ಓದಿ: Shettar: ಪ್ರಧಾನಿ ಮೋದಿ ಭೇಟಿಯಾದ ಶೆಟ್ಟರ್;‌ ಬೆಳಗಾವಿಗೆ ವಂದೇ ಭಾರತ್‌ ವಿಸ್ತರಣೆಗೆ ಮನವಿ