Udupi; ಗೀತಾರ್ಥ ಚಿಂತನೆ 153: ವೈಯಕ್ತಿಕ ಅಭಿಪ್ರಾಯ ಬೇರೆ, ಕರ್ತವ್ಯ ಬೇರೆ

Team Udayavani, Jan 11, 2025, 11:10 PM IST

ಸಾಲವನ್ನು / ಋಣವನ್ನು ಬೇಗ ತೀರಿಸಬೇಕು. ಇಲ್ಲವಾದರೆ ಬಡ್ಡಿ ಏರುತ್ತದೆ. ಇದೊಂದು ಸಾಮಾಜಿಕ ಋಣವಿದ್ದಂತೆ. ಪಡೆದದ್ದನ್ನು ಹಿಂದಕ್ಕೆ ತೀರಿಸಲೇಬೇಕು. ಇದನ್ನು ಬಾಕಿ ಮಾಡಿದರೆ ಮತ್ತೆ ಮತ್ತೆ ಹುಟ್ಟಿ ಬಂದು ಬಡ್ಡಿಯನ್ನು ಹೆಚ್ಚು ಹೆಚ್ಚು ಪಾವತಿಸಬೇಕಾಗುತ್ತದೆ. “ಸಾಲ ಕೊಟ್ಟವ ಭಾರೀ ದುಷ್ಟ, ನಾನೇಕೆ ಸಾಲ ಮರುಪಾವತಿಸಬೇಕು? ನನ್ನ ಕಿಂಚಿತ್‌ ಹಣದಿಂದ ಬ್ಯಾಂಕ್‌ಗೆàನಾಗಬೇಕಾಗಿದೆ?’ ಎಂದು ಹೇಳುವುದು ಸರಿಯಲ್ಲ. ನಾವು ಪಡೆದಿದ್ದೇವೋ ಇಲ್ಲವೋ? ಪಡೆದದ್ದನ್ನು ತೀರಿಸಬೇಕೆನ್ನುವುದು ಮುಖ್ಯ. ರಾಮನು ರಾವಣನನ್ನು ಕೊಂದ ಬಳಿಕ ಅಂತಿಮ ವಿಧಿಗಳನ್ನು ನೆರವೇರಿಸಲು ವಿಭೀಷಣನಿಗೆ ಆಜ್ಞಾಪಿಸುತ್ತಾನೆ. ಹಾಗಿದ್ದರೆ ಕೊಂದದ್ದೇಕೆ? ಹಾಗಲ್ಲ. ಕೊಲ್ಲುವುದು ಬೇರೆ, ಅಂತಿಮ ಸಂಸ್ಕಾರದ ಕರ್ತವ್ಯ ನಿರ್ವಹಿಸುವುದು ಬೇರೆ. ಹಿರಣ್ಯಕಶಿಪುವನ್ನು ಹೊಡೆಯಲು ಪ್ರಹ್ಲಾದ ಹೋಗಲಿಲ್ಲ. ಆತ ದೇವರನ್ನು ಪ್ರಾರ್ಥಿಸಿದನಷ್ಟೆ. ಶಿಕ್ಷಿಸುವ ಅಧಿಕಾರ ಯಾವತ್ತೂ ಅವರಿಗಿಂತ ಮೇಲಿನವರಿಗೆ ಮಾತ್ರ. ಅಪಘಾತ ನಡೆಸಿದಾಗ ತಪ್ಪಿತಸ್ಥನನ್ನು ಕಂಡರೂ ನಾವೇ ಶಿಕ್ಷಿಸಿದರೆ ಅದು ತಪ್ಪು. ಇದಕ್ಕಾಗಿಯೇ ಇನ್ನೊಂದು ಪ್ರಕರಣ ದಾಖಲಾಗುತ್ತದೆ. ಭೀಷ್ಮ, ದ್ರೋಣಾದಿಗಳು ಯುದ್ಧ ಸರಿಯಲ್ಲ ಎಂದರು. ಯುದ್ಧ ಘೋಷಣೆಯಾದ ಬಳಿಕ ಕೌರವರ ಕಡೆಯಿಂದಲೇ ಯುದ್ಧ ಮಾಡಿದರು. ರಾಜಾಜ್ಞೆಯದು. ಯುದ್ಧ ಸರಿಯಲ್ಲ ಎಂಬುದು ಸೈನಿಕನ ಅಭಿಪ್ರಾಯವಿರಬಹುದು. ಆದರೆ ಯುದ್ಧ ಮಾಡುವುದು ಅವನ ಕರ್ತವ್ಯ.

– ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರು,
ಪರ್ಯಾಯ ಶ್ರೀಪುತ್ತಿಗೆ ಶ್ರೀಕೃಷ್ಣಮಠ,  ಉಡುಪಿ

-ಕೋಟಿ ಗೀತಾ ಲೇಖನ ಯಜ್ಞದಲ್ಲಿ ಪಾಲೊಳ್ಳಿ
ಗೀತಾ ಮಂದಿರ, ಉಡುಪಿ ಸಂಪರ್ಕ ಸಂಖ್ಯೆ: 8055338811