ಮಂಗಳೂರಿನಲ್ಲಿ ಇಂಧನ ಭದ್ರತಾ ಸಮಾವೇಶ ನಡೆಸಿ: ಸಚಿವ ಹರ್ದೀಪ್‌ ಸಿಂಗ್

Team Udayavani, Jan 12, 2025, 2:02 AM IST

ಮಂಗಳೂರು: ಮಂಗಳೂರಿನಲ್ಲಿ ಇಂಧನ ಭದ್ರತಾ ಸಮಾವೇಶ ನಡೆಸುವುದಾದರೆ ಪೂರ್ಣ ಸಹಮತವಿದ್ದು, ಬೆಂಬಲ ನೀಡುತ್ತೇನೆ ಎಂದು ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಖಾತೆ ಸಚಿವ ಹರ್ದೀಪ್‌ ಸಿಂಗ್‌ ಪುರಿ ಹೇಳಿದ್ದಾರೆ.

ಅವರು ಮಂಗಳೂರು ಲಿಟ್‌ ಫೆಸ್ಟ್‌ನಲ್ಲಿ ಶನಿವಾರ “ಎನರ್ಜಿ ಫಾರ್‌ ಸರ್ವೈವಲ್‌-ಸೆಕ್ಯುರಿಟಿ ಆ್ಯಂಡ್‌ ಕ್ಲೈಮೇಟ್‌’ ವಿಷಯದಲ್ಲಿ ಮಾತನಾಡಿದರು.

ಮಂಗಳೂರಿನಂತಹ ನಗರ ಇಂಧನ ಭದ್ರತಾ ಸಮಾವೇಶ ನಡೆಸಲು ಸೂಕ್ತವಾಗಿದೆ. ಇಲ್ಲಿನ ಸಂಸದ ಕ್ಯಾ| ಚೌಟ ಅವರು ನಿನ್ನೆ ಈ ಭಾಗದ ಎಲ್ಲ ತೈಲ ಮಾರಾಟ ಕಂಪೆನಿಗಳ ಪ್ರಮುಖರನ್ನು ಭೇಟಿ ಮಾಡಿದ್ದಾರೆ. ಒಂದು ವೇಳೆ ನೀವು ಇಲ್ಲಿ ಇಂಧನ ಭದ್ರತಾ ಕಾರ್ಯಕ್ರಮವನ್ನು ಆಯೋಜಿಸಲು ಬಯಸಿದರೆ, ತೈಲ ಕಂಪೆನಿಗಳೊಂದಿಗೆ ಮಾತನಾಡಬಹುದು. ಇದಕ್ಕೆ ನನ್ನ ಸಂಪೂರ್ಣ ಬೆಂಬಲವಿರುತ್ತದೆ. ಭಾರತ ಇಂಧನ ಸಪ್ತಾಹದ ಜತೆಗೆ ಇಂಥ ಇಂಧನ ಭದ್ರತಾ ಸಮ್ಮೇಳನಗಳನ್ನು ಆಯೋಜಿಸು ವುದರಿಂದ ತೈಲೋದ್ಯಮ ಕ್ಷೇತ್ರಕ್ಕೆ ಹೆಚ್ಚಿನ ಉತ್ತೇಜನ, ಅನುಕೂಲತೆ ದೊರೆಯಲಿದೆ ಎಂದರು.

ಮೊತ್ತ ಮೊದಲ ಭಾರತ ಇಂಧನ ಸಪ್ತಾಹವನ್ನು ಬೆಂಗಳೂರಿನಲ್ಲಿ ಆಯೋಜಿಸಿದ್ದು, ಬಳಿಕ ಗೋವಾದಲ್ಲಿ ನಡೆಸಿದ್ದೆವು ಎಂದು ಸಚಿವ ಪುರಿ ಹೇಳಿದರು.

ಭವಿಷ್ಯದಲ್ಲಿ ತೈಲ ಅಗ್ಗ ಸಾಧ್ಯತೆ
ಸದ್ಯ ಪೆಟ್ರೋಲಿಯಂ ಇಂಧನದಲ್ಲಿ ನಾವು ಶೇ.85ರಷ್ಟು ಆಮದನ್ನು ಅವಲಂಬಿಸಿದ್ದೇವೆ. ಆದರೆ ಒಂದೆಡೆ ಮುಂದೆ ತೈಲ ಹಾಗೂ ಅನಿಲ ಈಗಿರುವುದಕ್ಕಿಂತಲೂ ಅಗ್ಗವಾಗಲಿದೆ. ಯಾಕೆಂದರೆ ಒಪೆಕ್‌ ರಾಷ್ಟ್ರಗಳ ಹೊರತಾಗಿ ಯುಎಸ್‌ಎ, ಸುರಿನಾಮ್‌, ಬ್ರೆಜಿಲ್‌, ರಷ್ಯಾಗಳಲ್ಲೂ ಅಪಾರ ಪ್ರಮಾಣ ದಲ್ಲಿ ತೈಲ ಸಂಸ್ಕರಣೆ ನಡೆಯುತ್ತಿದೆ. ಭಾರತದಲ್ಲೂ ದೊಡ್ಡ ಪ್ರಮಾಣದಲ್ಲಿ ಸೋಲಾರ್‌, ಬಯೋಗ್ಯಾಸ್‌, ನ್ಯಾಚುರಲ್‌ ಗ್ಯಾಸ್‌ ಸ್ಥಾವರ ತಲೆಎತ್ತು ತ್ತಿವೆ ಎಂದು ಸಚಿವರು ಹೇಳಿದರು.