ಡಿನ್ನರ್‌ ಪಾರ್ಟಿ ಬಗ್ಗೆ ಹೈಕಮಾಂಡ್‌ ಗಮನಕ್ಕೆ ತಂದಿದ್ದೇವೆ: ಜಿ.ಪರಮೇಶ್ವರ್‌

Team Udayavani, Jan 12, 2025, 6:50 AM IST

ಬೆಂಗಳೂರು: ನಾವು ಯಾವ ಉದ್ದೇಶಕ್ಕಾಗಿ ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡದ ಶಾಸಕ, ಸಚಿವರ ಡಿನ್ನರ್‌ ಸಭೆ ಮಾಡಲು ಹೊರಟಿದ್ದೆವು ಎಂಬುದನ್ನು ದೂರವಾಣಿ ಮೂಲಕ ಹೈಕಮಾಂಡ್‌ಗೆ ವಿವರಿಸಿದ್ದೇವೆ. ಸೋಮವಾರ (ಜ.13) ರಾಜ್ಯ ಕಾಂಗ್ರೆಸ್‌ ಉಸ್ತುವಾರಿ ರಣದೀಪ್‌ ಸಿಂಗ್‌ ಸುರ್ಜೇವಾಲಾ ಹಾಗೂ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್‌ ಅವರು ಕಾಂಗ್ರೆಸ್‌ ಸಮಾವೇಶ ಹಿನ್ನೆಲೆಯಲ್ಲಿ ವಿವಿಧ ಸಭೆ ನಡೆಸಲು ಬೆಂಗಳೂರಿಗೆ ಬಂದಾಗಲೂ ಅವರಿಗೆ ಮನವರಿಕೆ ಮಾಡಿಕೊಡುತ್ತೇವೆ ಎಂದು ಗೃಹ ಸಚಿವ ಡಾ.ಜಿ. ಪರಮೇಶ್ವರ್‌ ಹೇಳಿದ್ದಾರೆ.

ಬೆಂಗಳೂರಿನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈ ಹಿಂದೆ ನಾವು ಏರ್ಪಡಿಸಿದ್ದ ಸಭೆಯನ್ನು ಮುಂದೂಡಲು ತಿಳಿಸಿದಾಗ ಮುಂದೂಡಿದ್ದೆವು. ಮತ್ತೆ ಅವರ ಗಮನ ತರಬೇಕಿತ್ತು. ಅದೇ ಸೂಕ್ತ ಎಂದು ನಾವೆಲ್ಲರೂ ಮಾತನಾಡಿಕೊಂಡಿದ್ದೇವೆ. ಅವರ ಗಮನಕ್ಕೆ ತಂದೇ ಸಭೆ ಮಾಡುತ್ತೇವೆ ಎಂದು ಸ್ಪಷ್ಟಪಡಿಸಿದರು.

ಮುಂದೆ ಯಾವಾಗ ಮಾಡುತ್ತೇವೆ, ಸಮಯ, ದಿನಾಂಕ ಎಲ್ಲವನ್ನೂ ಹೈಕಮಾಂಡ್‌ ಜತೆ ಮಾತನಾಡಿದ ಬಳಿಕ ಯೋಚಿಸುತ್ತೇವೆ. ಇನ್ನು ಕೆಪಿಸಿಸಿ ಅಧ್ಯಕ್ಷ ಬದಲಾವಣೆ ಬಗ್ಗೆ ನನಗಂತೂ ಮಾಹಿತಿ ಇಲ್ಲ. ನಮ್ಮ ಪಕ್ಷದಲ್ಲಿ ಹೈಕಮಾಂಡ್‌ ಸುಪ್ರೀಂ. ಅವರು ಹೇಳಿದಂತೆ ಕೇಳುವವರು ನಾವೆಲ್ಲ ಎಂದಷ್ಟೇ ಪರಮೇಶ್ವರ್‌ ಹೇಳಿದರು.