Bengaluru: 40 ಲಕ್ಷ ರೂ. ನಕಲಿ ಸಿಗರೆಟ್‌ ಜಪ್ತಿ: ಕೇರಳದ ಇಬ್ಬರು ಆರೋಪಿಗಳ ಸೆರೆ

Team Udayavani, Jan 12, 2025, 11:10 AM IST

ಬೆಂಗಳೂರು:ನಕಲಿ ಸಿಗರೆಟ್‌ ಪೂರೈಕೆ ಮಾಡುತ್ತಿದ್ದ ಕೇರಳದ ಗ್ಯಾಂಗ್‌ನ ಇಬ್ಬರು ಸದಸ್ಯರನ್ನು ಕುಮಾರಸ್ವಾಮಿ ಲೇಔಟ್‌ ಠಾಣೆ ಪೊಲೀಸರು ಬಂಧಿಸಿ, 40 ಲಕ್ಷ ರೂ. ಮೌಲ್ಯದ 30 ಸಿಗರೆಟ್‌ ಬಾಕ್ಸ್‌ ಜಪ್ತಿ ಮಾಡಿದ್ದಾರೆ.

ಕೇರಳ ಮೂಲದ ಬೆಳ್ಳಂದೂರಿನ ನಿಶಾಂತ್‌ ಮತ್ತು ಶಕೀಲ್‌ ಬಂಧಿತ ಆರೋಪಿಗಳು. ಪ್ರಕರಣದಲ್ಲಿ ತಲೆಮರೆಸಿಕೊಂಡಿರುವ ಶಬ್ಬೀರ್‌ಗಾಗಿ ಪೊಲೀಸರು ಶೋಧ ಕೈಗೊಂಡಿದ್ದಾರೆ.

ಬಂಧಿತ ಆರೋಪಿಗಳೂ ಬೆಳ್ಳಂದೂರಿನ ಅಪಾರ್ಟ್‌ ಮೆಂಟ್‌ನಲ್ಲಿ ಬಾಡಿಗೆ ರೂಂನಲ್ಲಿ ವಾಸಿಸುತ್ತಿದ್ದರು. ಕಾಂಬೋಡಿಯಾ, ಬಾಂಗ್ಲಾದೇಶ ಮೂಲಕ ಐಟಿಸಿ ಲೈಟ್ಸ್‌ ಬ್ರ್ಯಾಂಡ್‌ನ‌ ನಕಲಿ ಸಿಗರೆಟ್‌ ಅನ್ನು ಕಡಿಮೆ ಬೆಲೆಗೆ ತರಿಸುತ್ತಿದ್ದರು. ಬಳಿಕ ಅದನ್ನು ಬೆಂಗಳೂರಿನ ವಿವಿಧ ಅಂಗಡಿಗಳಿಗೆ ಮಾರಾಟ ಮಾಡಿ ಹೆಚ್ಚಿನ ಲಾಭಾಂಶ ಮಾಡುತ್ತಿದ್ದರು. ನಕಲಿ ಸಿಗರೆಟ್‌ ಮಾರಾಟದ ಬಗ್ಗೆ ಕಂಪನಿಯ ಪ್ರತಿನಿಧಿಯೊಬ್ಬರು ಪೊಲೀಸರಿಗೆ ಸುಳಿವು ನೀಡಿದ್ದರು.

ಆರೋಪಿಗಳು ದಯಾನಂದ ಸಾಗರ್‌ ಕಾಲೇಜು ಬಳಿ ಸಿಗರೆಟ್‌ ಸಾಗಾಟ ಮಾಡುತ್ತಿದ್ದ ಬೈಕ್‌ ಅನ್ನು ತಡೆದು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ನಕಲಿ ಸಿಗರೆಟ್‌ ಪತ್ತೆಯಾಗಿತ್ತು. ವಿಚಾರಣೆ ವೇಳೆ ಬೆಳ್ಳಂದೂರಿನ ರೂಂನಲ್ಲಿ ಉಳಿದ ಸಿಗರೆಟ್‌ ಬಾಕ್ಸ್‌ ಇಟ್ಟಿರುವ ಮಾಹಿತಿ ನೀಡಿದ್ದರು. ಅದರಂತೆ ಅವರ ರೂಂಗೆ ತೆರಳಿ 40 ಲಕ್ಷ ರೂ. ಮೌಲ್ಯದ ಸಿಗರೆಟ್‌ ಜಪ್ತಿ ಮಾಡಲಾಗಿದೆ. ಆರೋಪಿ ಶಕೀಲ್‌ ನಕಲಿ ಸಿಗರೆಟ್‌ ಜಾಲದ ಕಿಂಗ್‌ ಪಿನ್‌ ಆಗಿದ್ದ ಎಂದು ತಿಳಿದು ಬಂದಿದೆ.