ಅಂಡರ್‌-19 ವನಿತಾ ಕ್ರಿಕೆಟ್‌ ಇರಾ ಜಾಧವ್‌ 346

Team Udayavani, Jan 12, 2025, 11:53 PM IST

ಆಲೂರು: ಅಂಡರ್‌-19 ಏಕದಿನ ಟ್ರೋಫಿ ವನಿತಾ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಮುಂಬಯಿಯ 14 ವರ್ಷದ ಆಟಗಾರ್ತಿ ಇರಾ ಜಾಧವ್‌ ಅಜೇಯ 346 ರನ್‌ ಬಾರಿಸಿ ಸುದ್ದಿಯಾಗಿದ್ದಾರೆ. ಆದರೆ ಇದು ದಾಖಲಾದದ್ದು ದುರ್ಬಲ ಮೇಘಾಲಯದ ಎದುರು.

ಇರಾ ಜಾಧವ್‌ 157 ಎಸೆತಗಳಿಂದ ತಮ್ಮ ಇನ್ನಿಂಗ್ಸ್‌ ಕಟ್ಟಿದರು. ಸಿಡಿಸಿದ್ದು 42 ಬೌಂಡರಿ ಹಾಗೂ 16 ಸಿಕ್ಸರ್‌. ಇರಾ ಪರಾಕ್ರಮದಿಂದ ಮುಂಬಯಿ 3ಕ್ಕೆ 563 ರನ್‌ ಪೇರಿಸಿತು. ಜವಾಬಿತ್ತ ಮೇಘಾಲಯ ಕೇವಲ 19 ರನ್ನಿಗೆ ಆಲೌಟಾಗಿ 544 ರನ್ನುಗಳ ಸೋಲನುಭವಿಸಿತು. 6 ಆಟಗಾರ್ತಿಯರು ಖಾತೆ ತೆರೆಯಲು ವಿಫ‌ಲರಾದರು.

ಇರಾ ಜಾಧವ್‌ ಮುಂಬಯಿಯ ಶಾರದಾಶ್ರಮ ವಿದ್ಯಾಮಂದಿರ ಇಂಟರ್‌ನ್ಯಾಶನಲ್‌ ಸ್ಕೂಲ್‌ನ ವಿದ್ಯಾರ್ಥಿನಿ. ಕಳೆದ ಡಬ್ಲ್ಯುಪಿಎಲ್‌ ಹರಾಜು ಕಣದಲ್ಲಿದ್ದ ಅತೀ ಕಿರಿಯ ಆಟಗಾರ್ತಿ ಆಗಿದ್ದರು. ಆದರೆ ಮಾರಾಟವಾಗದೇ ಉಳಿದರು. ಬಳಿಕ ಅಂಡರ್‌-19 ಟಿ20 ವಿಶ್ವಕಪ್‌ ತಂಡದ ಮೀಸಲು ಆಟಗಾರ್ತಿಯಾಗಿ ಮಲೇಷ್ಯಾಕ್ಕೆ ತೆರಳಿದ್ದರು.

ವನಿತಾ ಅಂಡರ್‌-19 ಕ್ರಿಕೆಟ್‌ನಲ್ಲಿ ಸರ್ವಾಧಿಕ ವೈಯಕ್ತಿಕ ಗಳಿಕೆಯ ದಾಖಲೆ ದಕ್ಷಿಣ ಆಫ್ರಿಕಾದ ಲಿಝೆಲ್‌ ಲೀ ಹೆಸರಲ್ಲಿದೆ (427 ರನ್‌).