Vijay Hazare Trophy ಸೆಮಿಫೈನಲ್‌: ಕರ್ನಾಟಕದ ಎದುರಾಳಿ ಹರಿಯಾಣ

Team Udayavani, Jan 13, 2025, 12:13 AM IST

ವಡೋದರಾ: ವಿಜಯ್‌ ಹಜಾರೆ ಟ್ರೋಫಿ ಏಕದಿನ ಪಂದ್ಯಾವಳಿಯ ಸೆಮಿಫೈನ ಲ್‌ನಲ್ಲಿ ಕರ್ನಾಟಕ-ಹರಿಯಾಣ, ವಿದರ್ಭ- ಮಹಾರಾಷ್ಟ್ರ ತಂಡಗಳು ಮುಖಾಮುಖೀ ಯಾಗಲಿವೆ. ರವಿವಾರ ನಡೆದ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಹರಿಯಾಣ ತಂಡ ಗುಜರಾತನ್ನು 2 ವಿಕೆಟ್‌ಗಳಿಂದ ಮಣಿಸಿದರೆ, ಮತ್ತೂಂದು ಪಂದ್ಯದಲ್ಲಿ ವಿದರ್ಭ 9 ವಿಕೆಟ್‌ಗಳಿಂದ ರಾಜಸ್ಥಾನವನ್ನು ಸೋಲಿಸಿತು.

ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಗುಜರಾತ್‌ 45.2 ಓವರ್‌ಗಳಲ್ಲಿ 196 ರನ್ನುಗಳ ಸಾಮಾನ್ಯ ಮೊತ್ತಕ್ಕೆ ಕುಸಿಯಿತು. ಚಿಂತನ್‌ ಗಜ 32, ಹೇಮಾಂಗ್‌ ಪಟೇಲ್‌ 54 ರನ್‌ ಮಾಡಿದರು. ಹರಿಯಾಣದ ಅನುಜ್‌ ಠಾಕ್ರಲ್‌ 39ಕ್ಕೆ 3, ನಿಶಾಂತ್‌ ಸಿಂಧು 40ಕ್ಕೆ 3 ವಿಕೆಟ್‌ ಉರುಳಿಸಿದರು. ಚೇಸಿಂಗ್‌ಗೆ ಇಳಿದ ಹರಿಯಾಣ 44.2 ಓವರ್‌ಗಳಲ್ಲಿ 8 ವಿಕೆಟ್‌ ನಷ್ಟಕ್ಕೆ 201 ರನ್‌ ಬಾರಿಸಿ ರೋಚಕ ಜಯ ಸಾಧಿಸಿತು. ರವಿ ಬಿಷ್ಣೋಯಿ 46ಕ್ಕೆ 4 ವಿಕೆಟ್‌ ಉರುಳಿಸಿ ಗಮನ ಸೆಳೆದರು.

ಕರುಣ್‌ ನಾಯರ್‌ ಶತಕ
ಇನ್ನೊಂದು ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ನಡೆಸಿದ ರಾಜಸ್ಥಾನ 8 ವಿಕೆಟ್‌ ನಷ್ಟಕ್ಕೆ 291 ರನ್‌ ಬಾರಿಸಿತು. ದಿಟ್ಟ ರೀತಿಯಲ್ಲಿ ಜವಾಬು ನೀಡಿದ ವಿದರ್ಭ 43.3 ಓವರ್‌ಗಳಲ್ಲಿ ಒಂದೇ ವಿಕೆಟ್‌ ನಷ್ಟಕ್ಕೆ 292 ರನ್‌ ಬಾರಿಸಿ ಜಯಭೇರಿ ಮೊಳಗಿಸಿತು. ವಿದರ್ಭ ಪರ ನಾಯಕ ಕರುಣ್‌ ನಾಯರ್‌ 82 ಎಸೆತಗಳಲ್ಲಿ ಅಜೇಯ 122 ರನ್‌ ಬಾರಿಸಿದರು. ಇದು ಪ್ರಸಕ್ತ ಸರಣಿಯಲ್ಲಿ ನಾಯರ್‌ ಹೊಡೆದ 5ನೇ ಶತಕ. ಧೃವ್‌ ಶೋರೆ 118 ರನ್‌ ಬಾರಿಸಿದರು.