Election: ದಿಲ್ಲಿಯಲ್ಲಿ ಗೆದ್ದರೆ ನಿರುದ್ಯೋಗಿಗಳಿಗೆ ಮಾಸಿಕ 8,500: ಕಾಂಗ್ರೆಸ್‌ ಭರವಸೆ

Team Udayavani, Jan 13, 2025, 1:26 AM IST

ಹೊಸದಿಲ್ಲಿ: ದಿಲ್ಲಿ ವಿಧಾನಸಭೆಯಲ್ಲಿ ಅಧಿಕಾರ ಹಿಡಿಯಲು ಶತಪ್ರಯತ್ನ ಮಾಡುತ್ತಿರುವ ಕಾಂಗ್ರೆಸ್‌, ರವಿವಾರ ತನ್ನ 3ನೇ ಭರವಸೆಯನ್ನು ದಿಲ್ಲಿ ಜನರಿಗೆ ನೀಡಿದೆ. ಚುನಾವಣೆಯಲ್ಲಿ ಜಯಗಳಿಸಿ ಅಧಿಕಾರಕ್ಕೆ ಏರಿದರೆ ವಿದ್ಯಾವಂತ ನಿರುದ್ಯೋಗಿಗಳಿಗೆ ಮಾಸಿಕ 8,500 ರೂ.ಗಳನ್ನು 1 ವರ್ಷದವರೆಗೆ ನೀಡುವುದಾಗಿ ಘೋಷಿಸಿದೆ.

ಈ ಬಗ್ಗೆ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಎಐಸಿಸಿ ದಿಲ್ಲಿ ಉಸ್ತುವಾರಿ ಕ್ವಾಜಿ ನಿಜಾಮುದ್ದೀನ್‌, “ಇದು ಉಚಿತ ಯೋಜನೆಯಲ್ಲ. ಬದಲಾಗಿ ಫ್ಯಾಕ್ಟರಿಗಳಲ್ಲಿ ಕೆಲಸ ಮಾಡುವವರಿಗೆ ಸಹಾಯಧನವಾಗಿ ಸರಕಾರ ಇದನ್ನು ನೀಡುತ್ತದೆ. ಕೆಲಸ ದೊರೆಯದ ವಿದ್ಯಾವಂತರು ಯಾವುದಾದರೂ ಕಂಪೆನಿಗಳು ಅಥವಾ ಫ್ಯಾಕ್ಟರಿಗಳಲ್ಲಿ ಕೆಲಸ ಮಾಡುವ ಮೂಲಕ ಈ ಸಹಾಯಧನವನ್ನು ಪಡೆದುಕೊಳ್ಳಬಹುದು. ಇದು ಆರ್ಥಿಕ ನೆರವು ನೀಡುವುದಲ್ಲದೇ, ಕೆಲಸ ಹುಡುಕಿಕೊಳ್ಳಲು ಸಹಾಯ ಮಾಡುತ್ತದೆ’ ಎಂದು ಹೇಳಿದ್ದಾರೆ.

ಇದೇ ವೇಳೆ ಈ ಯೋಜನೆಯ ಪೋಸ್ಟರನ್ನು ಸಹ ಬಿಡುಗಡೆ ಮಾಡಿದ್ದು, ಇದಕ್ಕೆ “ಯುವ ಉಡಾನ್‌ ಯೋಜನೆ’ ಎಂದು ಹೆಸರಿಡಲಾಗಿದೆ. ಜ.6ರಂದು ಪ್ಯಾರೀ ದೀದಿ ಯೋಜನೆ ಹಾಗೂ ಜ.8ರಂದು ಜೀವನ್‌ ರಕ್ಷಾ ಯೋಜನೆಗಳನ್ನು ಘೋಷಿಸಿತ್ತು.