Mangaluru: ಸಮಕಾಲೀನ ಬರಹಗಾರರಲ್ಲಿ ಅಧ್ಯಯನ ಕೊರತೆ: ಡಾ| ಭೈರಪ್ಪ

Team Udayavani, Jan 13, 2025, 1:59 AM IST

ಮಂಗಳೂರು: ಖ್ಯಾತ ಕಾದಂಬರಿಕಾರ, ಸರಸ್ವತಿ ಸಮ್ಮಾನ್‌ ಪುರಸ್ಕೃತ ಡಾ| ಎಸ್‌.ಎಲ್‌. ಭೈರಪ್ಪ ಅವರೊಂದಿಗೆ ವಿಶೇಷ ಸಂವಾದ ಮಂಗಳೂರು ಲಿಟ್‌ಫೆಸ್ಟ್‌ನಲ್ಲಿ ರವಿವಾರ ನಡೆಯಿತು.

“ನಿಮಗೆ ಅರಿವಿದ್ದ ಯಾವುದಾದರೂ ವಿಷಯದ ಬಗ್ಗೆ ಬರೆಯಲು ಬಾಕಿ ಇತ್ತಾ?’ ಎಂಬ ಪ್ರಶ್ನೆಗೆ ಉತ್ತರಿಸಿದ ಡಾ| ಭೈರಪ್ಪ, “ಹಾಗೇನಿಲ್ಲ. ಗೊತ್ತಿಲ್ಲದ್ದನ್ನು ನಾನು ಬರೆಯುವುದಿಲ್ಲ. ಸ್ವತಃ ಅನುಭವ ಇದ್ದು ಬರೆಯುವುದೇ ಮೇಲು. ಯಾನ ಕಾದಂಬರಿಗಾಗಿ ಆಕಾಶಕ್ಕೆ ಹೋಗುವುದು ಮಾತ್ರ ಬಾಕಿ; ಉಳಿದ ಎಲ್ಲ ರೀತಿಯ ಅಧ್ಯಯನ ಮಾಡಿಯೇ ಬರೆಯಲಾಗಿದೆ ಎಂದರು.

“ನಿಮ್ಮ ಸಮಕಾಲೀನ ಬರಹಗಾರರನ್ನು ನೀವು ಓದಿದ್ದೀರಿ. ಈಗ ಹೊಸಬರಲ್ಲಿ ಏನು ಬದಲಾವಣೆ ಕಾಣುತ್ತೀರಿ?’ ಎಂಬ ಪ್ರಶ್ನೆಗೆ, “ಆ ಕಾಲದಲ್ಲಿ ಇದ್ದ ಲೇಖಕರು ತುಂಬ ಅಧ್ಯಯನ ಮಾಡುತ್ತಿದ್ದರು. ಕನ್ನಡ ಸಾಹಿತ್ಯ ಸರಿಯಾಗಿ ಅರ್ಥ ಆಗಬೇಕಾದರೆ ಸಂಸ್ಕೃತ ಗೊತ್ತಿರಬೇಕು. ಅದನ್ನು ಕಲಿತಿದ್ದರು. ಆದರೆ ಈಗಿನವರಿಗೆ ಸಂಸ್ಕೃತ ಯಾಕೆ ಬೇಕು ಎಂಬ ಮನಸ್ಥಿತಿ ಇದೆ. ಸಂಸ್ಕೃತ ಒಪ್ಪಬೇಕು. ಒಪ್ಪದಿದ್ದರೆ ಕನ್ನಡ ಸಾಹಿತ್ಯಕ್ಕೆ ನಷ್ಟ ಎಂದರು.

“ನಿಮ್ಮ ಕಾದಂಬರಿ ಓದುವಾಗ ಆ ಸನ್ನಿವೇಶ ಒಂದು ರೀತಿಯ ಸಂಕಟ ಹುಟ್ಟುಹಾಕುತ್ತದೆ. ಯಾವ ಕಾರಣದಿಂದ ಈ ಸಂಕಟ?’ ಎಂಬ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಅವರು, “ಸಂಕಟ ನನ್ನ ಅನುಭವದಿಂದಲೇ ಬರುತ್ತದೆ. ಪರ್ವ ಕಾದಂಬರಿ ಬರೆಯುವಾಗ ಎಷ್ಟೋ ಹಳ್ಳಿಗೆ ಹೋಗಿದ್ದೇನೆ. ಬರೆಯುವಾಗ ನಾನೇ ಆಗಿದ್ದೆ. 5 ಅಧ್ಯಾಯ ಒಮ್ಮೆಲೆ ಬರೆದು ರಾತ್ರಿ ಮನೆಯಲ್ಲಿ ಬಿದ್ದು ಮಾನಸಿಕ ವೈದ್ಯರ ಚಿಕಿತ್ಸೆ ಪಡೆದದ್ದೂ ಇದೆ’ ಎಂದು ನೆನಪಿಸಿದರು. ಚಿಂತಕ ಬಿ.ಜಿ.ಹರೀಶ್‌ ಸಂವಾದ ನಡೆಸಿಕೊಟ್ಟರು.