Hebri ಪೇಟೆಯಲ್ಲೇ ನೆಟ್ವರ್ಕಿಲ್ಲ! ಇಲ್ಲಿನ ಕೆಲವು ಕಡೆ ಮನೆಯೊಳಗೆ ಫೋನ್‌ ಬಳಸುವಂತಿಲ್ಲ!

Team Udayavani, Jan 13, 2025, 2:35 PM IST

ಹೆಬ್ರಿ: ತಾಲೂಕು ಕೇಂದ್ರವಾದ ಹೆಬ್ರಿಯ ಹೃದಯ ಭಾಗದಲ್ಲಿಯೇ ನೆಟ್‌ವರ್ಕ್‌ ಸಮಸ್ಯೆ ಕಾಡುತ್ತಿದೆ. ಹೀಗಿರುವಾಗ ಹಳ್ಳಿಗಳ ಕಥೆ ಕೇಳಬೇಕಾ? ಇಲ್ಲಿ ಬಿಎಸ್‌ಎನ್‌ಎಲ್‌ ಒಂದೇ ಸಮಸ್ಯೆಯಲ್ಲ, ಯಾವುದೇ ಕಂಪೆನಿಗಳ ಗ್ರಾಹಕರಾದರೂ ಸಮಸ್ಯೆ ತಪ್ಪಿದ್ದಲ್ಲ.

ಹೆಬ್ರಿ ತಾಲೂಕು ಕಚೇರಿ ಪರಿಸದರ ಮನೆಗಳಲ್ಲಿ ಮನೆಯಿಂದ ಹೊರಗೆ ಬಂದರೆ ಮಾತ್ರ ಫೋನ್‌ ರಿಂಗ್‌ ಆಗುತ್ತದೆ. ಇದು ಏರ್‌ಟೆಲ್‌ ಸಮಸ್ಯೆ ಇರಬಹುದು ಎಂದು ಕೆಲವರು ಜಿಯೋಗೆ ಪೋರ್ಟ್‌ ಮಾಡಿಕೊಂಡರು. ಆದರೆ, ಸಮಸ್ಯೆ ಕಂಪೆನಿಯದ್ದಲ್ಲ, ನೆಟ್ವರ್ಕ್‌ನದು! ಆಧುನಿಕ ತಾ‌ಂತ್ರಿಕತೆ ಇಷ್ಟೊಂದು ಬೆಳೆದಿದ್ದರೂ ಈಗಲೂ ಫೋನ್‌ ಕರೆ ಸ್ವೀಕರಿಸಲು ಮನೆಯ ಮಹಡಿಯೋ, ಮಾರ್ಗದ ಬದಿಗೋ ಹೋಗಬೇಕಾದ ಪರಿಸ್ಥಿತಿ ಪೇಟೆಯಲ್ಲೇ ಇದೆ.

ಸುತ್ತಮುತ್ತ ಎಲ್ಲೆಡೆ ಸಮಸ್ಯೆ
ಹೆಬ್ರಿ ಹೃದಯ ಭಾಗದ ಸಮೀಪ‌ ಹುತ್ತುರ್ಕೆ, ಬ್ಯಾಣ, ಜರ್ವತ್ತು, ಇಂದಿರಾನಗರ ಸುತ್ತಮುತ್ತ ಪ್ರದೇಶದಲ್ಲಿ ನಿರಂತರ ನೆಟ್‌ ವರ್ಕ್‌ ಸಮಸ್ಯೆಯಿಂದ ಜನ ಹೈರಾಣಾಗಿದ್ದಾರೆ. ಪ್ರಮುಖ ಪ್ರದೇಶಗಳಲ್ಲಿ ಟವರ್‌ಗಳು ಆಗಬೇಕು ಎಂಬ ಕೂಗು ಕೇಳಿ ಬರುತ್ತಿದ್ದು ಈ ಬಗ್ಗೆ ಜನಪ್ರತಿನಿಧಿಗಳು ಹಾಗೂ ಸಂಬಂಧಪಟ್ಟ ನೆಟ್‌ ವರ್ಕ್‌ ಕಂಪೆನೆಗಳು ಕಾರ್ಯಪ್ರವೃತ್ತರಾಗಬೇಕಾಗಿದೆ.

ನೆಟ್‌ವರ್ಕ್‌ ಸಮಸ್ಯೆ ಬಗ್ಗೆ ಈಗಾಗಲೇ ಹಲವಾರು ಬಾರಿ ವರದಿ ಮಾಡಲಾಗಿದೆ. ಜನಪ್ರತಿನಿಧಿಗಳ ಗಮನಕ್ಕೆ ತಂದು ಸಮಸ್ಯೆ ಬಗೆಹರಿಸುವ ಭರವಸೆ ನೀಡಿದ್ದಾರೆ ವಿನಹಃ ಯಾವುದೇ ಪ್ರಯೋಜವಾಗಿಲ್ಲ .

ಶೂನ್ಯ ನೆಟ್ವರ್ಕ್‌ ಪ್ರದೇಶ!
ಅಚ್ಚರಿ ಎಂದರೆ ಪ್ರಧಾನ ರಸ್ತೆಯ ಕೆಲವು ಪ್ರದೇಶಗಳಲ್ಲಿ ಯಾವುದೇ ಕಂಪೆನಿಯ ನೆಟ್‌ವರ್ಕ್‌ ಸಿಗುತ್ತಿಲ್ಲ. ಬಸ್ಸಿನಲ್ಲಿ ಪ್ರಯಾಣಿಸುತ್ತಿರುವಾಗ ಹೆಬ್ರಿ ಸಮೀಪ‌ದ ಜರ್ವತ್ತು ಪ್ರದೇಶದಲ್ಲಿ ಯಾರದಾದರೂ ಕರೆ ಬಂದರೆ ಮಾತನಾಡಲಾಗುತ್ತಿಲ್ಲ. ಈ ಪ್ರದೇಶದಲ್ಲಿ ಬಸ್ಸಿನಲ್ಲಿರುವ ಹೆಚ್ಚಿನ ಜನರು ಹಲೋ ಹಲೋ ಎಂದು ಬೊಬ್ಬಿಡಬೇಕಾಗುತ್ತದೆ. ಅದೇ ರೀತಿ ಹೆಬ್ರಿಯಿಂದ ಸೋಮೇಶ್ವರ ಹೋಗುವಾಗ ಇಕ್ಕೋಡ್ಲು ಪರಿಸರದಲ್ಲಿ ಹಾಗೂ ಉಡುಪಿಗೆ ಹೋಗುವಾಗ ಪಾಡಿಗಾರ ಪ್ರದೇಶ‌ದಲ್ಲಿ ಶೂನ್ಯ ನೆಟ್‌ ವರ್ಕ್‌ ಸಮಸ್ಯೆ ಕಂಡುಬರುತ್ತಿದೆ.

ಕಚೇರಿ ಕೆಲಸಗಳು ವಿಳಂಬ
ಅಂಚೆ ಕಚೇರಿ, ಗ್ರಾಮ ಪಂಚಾಯತ್‌, ತಾಲೂಕು ಕಚೇರಿ, ಬ್ಯಾಂಕ್‌ಗಳು ಸೇರಿದಂತೆ ಎಲ್ಲ ಕಚೇರಿಗಳಲ್ಲಿ ನೆಟ್‌ ವರ್ಕ್‌ ಸಮಸ್ಯೆ ಹೇಳತೀರದಂತಾಗಿದೆ. ಕಚೇರಿ ಕೆಲಸಗಳಿಗೆ ಬಂದ ಜನ ನಿತ್ಯ ಕಾದು ಕೆಲಸವಾಗದೆ ಹಿಂದಿರುಗಿದ ಘಟನೆಗಳಿವೆ. ಬಿಎಸ್ಸೆನ್ನೆಲ್‌ ಮೊದಲಾದ ನೆಟ್‌ ವರ್ಕ್‌ನಿಂದ ಬೇಸತ್ತ ಕೆಲವರು ಖಾಸಗಿ ನೆಟ್‌ವರ್ಕ್‌ ಮೊರೆಹೋಗಿದ್ದಾರೆ. ಖಾಸಗಿ ಕಂಪೆನಿಯಲ್ಲಿದ್ದು ಮನೆಯಲ್ಲಿ ಉದ್ಯೋಗ ಮಾಡುವ ಹೆಚ್ಚಿನವರು ಕಂಪನಿಗಳಿಂದ ಬರುವ ಯಾವುದೇ ಸಂದೇಶವನ್ನು ಅಥವಾ ಇಮೇಲ್‌ಗ‌ಳನ್ನು ಕಳುಹಿಸಲು ಪರದಾಡುವಂತಹ ಬಿಕ್ಕಟ್ಟಿನ ಪರಿಸ್ಥಿತಿ ಎದುರಾಗಿದೆ. ಕೆಲವರು ಖಾಸಗಿ ಬ್ರಾಡ್‌ ಬ್ಯಾಂಡ್‌ ನೆಟ್‌ ವರ್ಕ್‌ ಬಳಸುತ್ತಿದ್ದಾರೆ.

ನಿಮ್ಮೂರಲ್ಲೂ ನೆಟ್ವರ್ಕ್‌ ಸಮಸ್ಯೆಯೇ?
ನಿಮ್ಮೂರಲ್ಲೂ ನೆಟ್‌ವರ್ಕ್‌ ಸಮಸ್ಯೆಯಿದ್ದರೆ ಕನ್ನಡದಲ್ಲಿ ಟೈಪ್‌ ಮಾಡಿ ವಾಟ್ಸ್‌ಆ್ಯಪ್‌ ಸಂಖ್ಯೆ 6362906071ಗೆ ಹೆಸರು, ಊರು ನಮೂದಿಸಿ ಕಳುಹಿಸಿ.

-ಹೆಬ್ರಿ ಉದಯಕುಮಾರ್‌ ಶೆಟ್ಟಿ