Parvathy Movie: ಪಾರು ಪಾರ್ವತಿಯ ಕಾರ್‌ಬಾರು 

Team Udayavani, Jan 14, 2025, 3:57 PM IST

ಪಿ.ಬಿ. ಪ್ರೇಮನಾಥ್‌ ನಿರ್ಮಾಣ ಹಾಗೂ ರೋಹಿತ್‌ ಕೀರ್ತಿ ನಿರ್ದೇಶನದಲ್ಲಿ “ಪಾರು ಪಾರ್ವತಿ’ ಎಂಬ ಟ್ರಾವೆಲ್‌ ಅಡ್ವೆಂಚರ್‌ ಸಿನಿಮಾ ನಿರ್ಮಾಣವಾಗಿದೆ. ಇತ್ತೀಚೆಗೆ ಚಿತ್ರದ ಪ್ರಮುಖ ಪಾತ್ರವೊಂದನ್ನು ಪೋಸ್ಟರ್‌ ಮೂಲಕ ಚಿತ್ರತಂಡ ಪರಿಚಯಿಸಿತು. ಆ ಪಾತ್ರ ವ್ಯಕ್ತಿಯಲ್ಲ ಬದಲಾಗಿ ಕಾರು.

ಚಿತ್ರದ ಬಗ್ಗೆ ಮಾಹಿತಿ ಹಂಚಿಕೊಂಡ ನಿರ್ದೇಶಕ ರೋಹಿತ್‌, “ಇದೊಂದು ಟ್ರಾವೆಲ್‌ ಅಡ್ವೆಂಚರ್‌ ಡ್ರಾಮ ಜಾನರ್‌ನ ಸಿನಿಮಾ. ನಮ್ಮ ಚಿತ್ರ ಮೂರು ಪ್ರಮುಖ ಪಾತ್ರಗಳ ಜೊತೆಗೆ ಸಾಗುತ್ತದೆ. ದೀಪಿಕಾ ದಾಸ್‌, ಪೂನಂ ಸಿರ್‌ ನಾಯಕ್‌ ಹಾಗೂ ಫ‌ವಾಜ್‌ ಆಶ್ರಫ್ ಮೂರು ಪ್ರಮುಖ ಪಾತ್ರಧಾರಿಗಳು. ಇವರೊಟ್ಟಿಗೆ ಮತ್ತೂಂದು ಪ್ರಮುಖ ಪಾತ್ರವೆಂದರೆ ಅದು ಕಾರು.  ಟ್ರಾವೆಲ್‌ ಕಥಾಹಂದರದ ಚಿತ್ರವಾಗಿರುವುದರಿಂದ ಕಾರು ಸಹ ಚಿತ್ರದಲ್ಲಿ ಪ್ರಮುಖವಾಗಿದೆ. ಜನವರಿ 31ರಂದು ಚಿತ್ರ ಬಿಡುಗಡೆಯಾಗಲಿದ್ದು, ಅದಕ್ಕೂ ಮುನ್ನ ಸಂಕ್ರಾಂತಿ ಹಬ್ಬದಂದು ಚಿತ್ರದ ಟ್ರೇಲರ್‌ ಅನಾವರಣವಾಗಲಿದೆ. ಈಗ ಈ ಕಾರು ಪ್ರಚಾರದ ಸಲುವಾಗಿ ಕರ್ನಾಟಕದಾದ್ಯಂತ ಚಲಿಸಲಿದೆ. ಯೂಟ್ಯೂಬರ್‌ ಶ್ರೀಕಾಂತ್‌ ಅವರು ಕಾರನ್ನು ಚಲಿಸಿಕೊಂಡು ಪಯಣಿಸಲಿದ್ದಾರೆ’ ಎಂದರು.

“ಈ ಚಿತ್ರದಲ್ಲಿ ಬರೀ ಪ್ರವಾಸ ಮಾತ್ರ ಇಲ್ಲ. ಪ್ರೇಕ್ಷಕರು ಕುಟುಂಬ ಸಮೇತ ನೋಡಬಹುದಾದ ಎಲ್ಲಾ ಅಂಶಗಳು ಚಿತ್ರದಲ್ಲಿದೆ. ಇನ್ನು ಕಾರಿನ ಜೊತೆಗೆ ಕರ್ನಾಟಕದಿಂದ ಉತ್ತರಾಖಂಡ ರಾಜ್ಯದವರೆಗೂ ಎಂಟು ರಾಜ್ಯಗಳನ್ನು ಸಂಚರಿಸಿದ ಅನುಭವ ಎಂದಿಗೂ ಮರೆಯಲು ಸಾಧ್ಯವಿಲ್ಲ. ಪಾಯಲ್‌ ನನ್ನ ಪಾತ್ರದ ಹೆಸರು’ ಎನ್ನುವುದು ನಾಯಕಿ ದೀಪಿಕಾ ದಾಸ್‌ ಅವರ ಮಾತು.

ನಿರ್ಮಾಪಕ ಪಿ.ಬಿ. ಪ್ರೇಮನಾಥ್‌ ಹಾಗೂ ಛಾಯಾಗ್ರಾಹಕ ಅಬಿನ್‌ ರಾಜೇಶ್‌ ಚಿತ್ರದ ಬಗ್ಗೆ ಮಾತನಾಡಿದರು.