Sirsi: ಸಂಸದ ಕಾಗೇರಿ ಮನೆ ಅಂಗಳದಲ್ಲಿ ಚಿರತೆ ಓಡಾಟ; ಸಿಸಿ ಕ್ಯಾಮರಾದಲ್ಲಿ ದೃಶ್ಯ ಸೆರೆ

Team Udayavani, Jan 14, 2025, 3:36 PM IST

ಶಿರಸಿ: 6-8 ತಿಂಗಳ ಹಿಂದೆ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರ ಮನೆ ಸಮೀಪದ ದಾರಿಯಲ್ಲಿ‌ ತೆರಳುವಾಗ ಕಂಡಿದ್ದ ಚಿರತೆಯೊಂದು ಈಗ ಸಂಸದರನ್ನು‌ ಮನೆಗೇ ಹುಡುಕಿಕೊಂಡು ಹೋದಂತೆ ಭಾಸವಾಗುವ ಘಟನೆ ಸಂಕ್ರಾಂತಿ ಹಬ್ಬದ ಬೆಳಗಿನ ಜಾವ (ಜ.14ರ ಮಂಗಳವಾರ) ನಡೆದಿದೆ.

ತಾಲೂಕಿನ ಕಾಗೇರಿ ಗ್ರಾಮದಲ್ಲಿರುವ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರ ಮನೆಯ ಆವರಣಕ್ಕೆ ರಾತ್ರಿ ನಾಯಿ ಹಿಡಿಯಲು ಚಿರತೆ ಬಂದಿರುವುದು ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಚಿರತೆ ಬಂದಿರುವುದು ಮೂರು ಪ್ರತ್ಯೇಕ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ಇದು ಗ್ರಾಮದ ಜನರಲ್ಲಿ ವನ್ಯಮೃಗದ ಹಾವಳಿಯ ಆತಂಕ ಉಂಟಾಗುವಂತೆ ಮಾಡಿದೆ.

ತಾಲೂಕಿನ ಸುತ್ತಮುತ್ತ ಚಿರತೆ ಆಗಾಗ ಪ್ರತ್ಯಕ್ಷವಾಗುತ್ತಿದ್ದು, ಕಳೆದ ನವೆಂಬರನಲ್ಲಿ ಆನೆಗಳ ಹಿಂಡು ಕೂಡ ತೋಟ, ಭತ್ತದ ಗದ್ದೆಗಳಲಲ್ಲಿ ಓಡಾಟ ನಡೆಸಿದ್ದವು. ಈಗ ಚಿರತೆ ಹಳ್ಳಿ, ಕಾಡೆನ್ನದೇ ಓಡಾಟ ನಡೆಸಿದೆ.