Mauro Morandi: 32 ವರ್ಷ ದ್ವೀಪದಲ್ಲಿದ್ದ ಇಟಲಿಗ ನಾಡಿಗೆ ಬಂದ 3 ವರ್ಷದಲ್ಲೇ ನಿಧನ!

Team Udayavani, Jan 15, 2025, 6:35 AM IST

ರೋಮ್‌: ಇಟಲಿಯ ಬುಡೆಲ್ಲಿ ದ್ವೀಪ ಪ್ರದೇಶದಲ್ಲಿ ಬರೋಬ್ಬರಿ 32 ವರ್ಷ ಒಂಟಿಯಾಗಿ ಜೀವಿಸಿದ್ದ ರಾಬಿನ್ಸನ್‌ ಕ್ರೂಸೋ ಖ್ಯಾತಿಯ ಮೌರೋ ಮೊರಾಂಡಿ (85) ನಾಗರಿಕ ಸಮಾಜಕ್ಕೆ ಮರಳಿದ ಕೇವಲ 3 ವರ್ಷದಲ್ಲೇ ಮೃತರಾಗಿದ್ದಾರೆ.

1989ರಲ್ಲಿ ಪಾಲಿನೇಷ್ಯಾ ದ್ವೀಪಕ್ಕೆ ತೆರಳುತ್ತಿದ್ದ ವೇಳೆ ನೌಕೆ ಧ್ವಂಸಗೊಂಡ ಕಾರಣ ಮೊರಾಂಡಿ ಬುಡೆಲ್ಲಿ ದ್ವೀಪದಲ್ಲಿ ಉಳಿಯುವಂತಾಯ್ತು. ಅಲ್ಲೇ ಜೀವಿಸುತಾ, ಅಲ್ಲಿನ ಪರಿಸರಕ್ಕೆ ಒಗ್ಗಿಕೊಂಡಿದ್ದರು.

ದ್ವೀಪದಲ್ಲಿದ್ದ ಏಕೈಕ ನಿವಾಸಿಯಾದ ಕಾರಣ ಅವರನ್ನು ಸಾಹಸ ಕಾದಂಬರಿ ರಾಬಿನ್‌ಸನ್‌ ಕ್ರೂಸ್‌ ಕಥಾನಾಯಕನಿಗೆ ಹೋಲಿಸಿ, ಅದೇ ಹೆಸರಿನಿಂದ ಕರೆಯಲಾಗುತ್ತಿತ್ತು. 3 ವರ್ಷದ ಹಿಂದೆ ಆಡಳಿತವು ಮೊರಾಂಡಿ ಅವರನ್ನು ಆ ದ್ವೀಪದಿಂದ ಸ್ಥಳಾಂತರಿಸಿತು.

ಸದಾ ಪ್ರಶಾಂತ ವಾತಾವರಣದಲ್ಲಿದ್ದ ಮೊರಾಂಡಿ ನಾಗರಿಕ ಸಮಾಜಕ್ಕೆ ಒಗ್ಗಿಕೊಳ್ಳಲು ಕಷ್ಟವಾಗುತ್ತಿದೆ ಎಂದೂ ಹೇಳಿಕೊಂಡಿದ್ದರು. ಇದಾದ ಬೆನ್ನಲ್ಲೇ ಅನಾರೋಗ್ಯಕ್ಕೀಡಾಗಿ ಮೃತಪಟ್ಟಿದ್ದಾರೆ.