Ceasefire: ಇಸ್ರೇಲ್‌, ಹಮಾಸ್‌ ಕದನ ವಿರಾಮಕ್ಕೆ ಒಪ್ಪಿಗೆ?

Team Udayavani, Jan 15, 2025, 7:05 AM IST

ಕೈರೋ: ಇಸ್ರೇಲ್‌ ಮತ್ತು ಹಮಾಸ್‌ ಉಗ್ರ ಸಂಘಟನೆ ನಡುವೆ 15 ತಿಂಗಳಿಂದ ನಡೆಯುತ್ತಿರುವ ಯುದ್ಧ ಮುಕ್ತಾಯದ ಹಂತಕ್ಕೆ ತಲುಪಿದೆಯೇ? ಅಮೆರಿಕ, ಈಜಿಪ್ಟ್ ಮತ್ತು ಕತಾರ್‌ ಸರಕಾರಗಳು ಹಮಾಸ್‌ ಮತ್ತು ಇಸ್ರೇಲ್‌ ನಡುವೆ ಸಂಧಾನ ಮಾತುಕತೆ ಏರ್ಪಡಿಸಿದ್ದು, ಕದನ ವಿರಾಮಕ್ಕೆ ಎರಡೂ ಕಡೆಯವರು ಒಪ್ಪಿಗೆ ನೀಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಅದರಂತೆ 2023ರ ಅ.7ರಂದು ಹಮಾಸ್‌ ತಾನು ಅಪಹರಿಸಿದ್ದ 100ಕ್ಕೂ ಅಧಿಕ ಮಂದಿಯ ಬಿಡುಗಡೆಗೆ ಒಪ್ಪಿದೆ ಎನ್ನಲಾಗುತ್ತಿದೆ. ಮೊದಲ ಹಂತದಲ್ಲಿ 33 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲಾಗುತ್ತದೆ. ಸಂಧಾನ ಸೂತ್ರದ ಅನ್ವಯ 1 ವರ್ಷ 5 ತಿಂಗಳಿಗೂ ಅಧಿಕ ಕಾಲ­ದಿಂದ ನಡೆಯುತ್ತಿರುವ ಸಂಗ್ರಾಮಕ್ಕೆ ವಿರಾಮ ಬೀಳುವ ಸಾಧ್ಯತೆಗಳಿವೆ.

2023 ಅ.7ರಂದು ಹಮಾಸ್‌ ದಾಳಿ: 5 ತಿಂಗಳ ಹಿಂದೆ ಹಮಾಸ್‌ ಉಗ್ರ ಸಂಘ­ಟನೆ ಇಸ್ರೇಲ್‌ನ ದಕ್ಷಿಣ ಭಾಗದ ಮೇಲೆ ಏಕಾಏಕಿ ನಡೆಸಿದ್ದ ದಾಳಿಯಿಂದಾಗಿ ವಿದೇಶಿ ನಾಗರಿಕರೂ ಸೇರಿ 1,200ಕ್ಕೂ ಅಧಿಕ ಮಂದಿ ಅಸುನೀಗಿದ್ದರು. ಜತೆಗೆ 200ಕ್ಕೂ ಅಧಿಕ ಮಂದಿಯನ್ನು ಉಗ್ರರು ಒತ್ತೆಯಲ್ಲಿ ಇಟ್ಟುಕೊಂಡಿದ್ದರು. ಇದಾದ ಬಳಿಕ ಇಸ್ರೇಲ್‌ ನಿರಂತರವಾಗಿ ಹಮಾಸ್‌ ಮೇಲೆ ದಾಳಿ ನಡೆಸುತ್ತಿದೆ.