South Korea; 2ನೇ ಪ್ರಯತ್ನದಲ್ಲಿ ಅಧ್ಯಕ್ಷ ಯೂನ್ ಸುಕ್ ಯೋಲ್ ಬಂಧನ : ವರದಿ

3,000 ಕ್ಕೂ ಹೆಚ್ಚು ಪೊಲೀಸರಿಂದ ಕಾರ್ಯಾಚರಣೆ.. ಅಧಿಕಾರದಲ್ಲಿದ್ದಾಗಲೇ ಬಂಧನದ ಅಪಖ್ಯಾತಿ

Team Udayavani, Jan 15, 2025, 8:03 AM IST

ಸಿಯೋಲ್: ವಾಗ್ದಂಡನೆಗೆ ಗುರಿಯಾಗಿದ್ದ ದಕ್ಷಿಣ ಕೊರಿಯಾದ ಅಧ್ಯಕ್ಷ ಯೂನ್ ಸುಕ್ ಯೋಲ್ ಅವರನ್ನು ಉನ್ನತ ಶ್ರೇಣಿಯ ಅಧಿಕಾರಿಗಳಿಗಾಗಿ ದೇಶದ ಭ್ರಷ್ಟಾಚಾರ ತನಿಖಾ ಕಚೇರಿಯಿಂದ ಬಂಧಿಸಲಾಗಿದೆ ಎಂದು ವರದಿಯಾಗಿದೆ, ಇದು ದಕ್ಷಿಣ ಕೊರಿಯಾದ ಇತಿಹಾಸದಲ್ಲೇ ಮೊದಲ ಬಾರಿಗೆ ಅಧಿಕಾರದಲ್ಲಿದ್ದಾಗಲೆ ಬಂಧನಕ್ಕೊಳಗಾದ ಮೊದಲ ಅಧ್ಯಕ್ಷ ಎನಿಸಿ ಅಪಖ್ಯಾತಿಗೆ ಗುರಿಯಾಗಿದ್ದಾರೆ.

ದೋಷಾರೋಪಣೆಗೊಳಗಾದ ಅಧ್ಯಕ್ಷ ಯೂನ್ ಸುಕ್ ಅವರನ್ನು ಬಂಧಿಸಲು ಇದು ಎರಡನೇ ಪ್ರಯತ್ನವಾಗಿತ್ತು, ಜನವರಿ 3 ರಂದು ವಿಫಲವಾದ ಪ್ರಯತ್ನದ ನಂತರ ದಕ್ಷಿಣ ಕೊರಿಯಾದ ಅಧ್ಯಕ್ಷೀಯ ಭದ್ರತಾ ಸೇವೆಯ ಏಜೆಂಟರು ತನಿಖಾಧಿಕಾರಿಗಳನ್ನು ಯೂನ್ ಅವರ ನಿವಾಸಕ್ಕೆ ಪ್ರವೇಶಿಸದಂತೆ ನಿರ್ಬಂಧಿಸಿದ್ದರು.

ಸುಮಾರು 3,000 ಪೊಲೀಸ್ ಅಧಿಕಾರಿಗಳು ಯೂನ್‌ ಅವರ ನಿವಾಸದ ಕಾಂಪೌಂಡ್‌ಗೆ ಪ್ರವೇಶಿಸಿ ಎರಡನೇ ಪ್ರಯತ್ನದಲ್ಲಿ ಬಂಧಿಸಿದ್ದಾರೆ ಎಂದು ಸುದ್ದಿ ಸಂಸ್ಥೆ ಯೋನ್‌ಹಾಪ್ ತಿಳಿಸಿದೆ.

ಈ ಮೊದಲೇ ರೆಕಾರ್ಡ್ ಮಾಡಿದ ವಿಡಿಯೋವೊಂದರಲ್ಲಿ ಯೂನ್ “ದೇಶದ ಕಾನೂನು ಕುಸಿದಿದೆ” ಮತ್ತು CIO ತನಿಖೆ ಕಾನೂನುಬಾಹಿರ ಎಂದು ಕರೆದಿದ್ದಾರೆ ಎಂದು ದಕ್ಷಿಣ ಕೊರಿಯಾದ ಮಾಧ್ಯಮಗಳು ವರದಿ ಮಾಡಿವೆ. “ಅಹಿತಕರ ರಕ್ತಪಾತವನ್ನು ತಡೆಗಟ್ಟಲು CIO ಮುಂದೆ ಹಾಜರಾಗುತ್ತಿರುವುವುದಾಗಿ ಯೂನ್ ಹೇಳಿದ್ದಾರೆ.

ಯೂನ್‌ ಭದ್ರತಾ ಸಿಬಂದಿಗಳು ಮತ್ತು ಭ್ರಷ್ಟಾಚಾರ ನಿಗ್ರಹ ಅಧಿಕಾರಿಗಳ ನಡುವೆ ಸಂಘರ್ಷ ನಡೆದ ನಂತರ ಕಳೆದ ಶುಕ್ರವಾರ ಬಂಧನ ವಾರಂಟ್‌ ಜಾರಿಗೊಳಿಸಲು ತಡೆ ನೀಡಿತ್ತು.

ದಕ್ಷಿಣ ಕೊರಿಯಾದಲ್ಲಿ ಡಿಸೆಂಬರ್‌ 3ರಂದು ದಿಢೀರನೆ ಮಿಲಿಟರಿ ಆಡಳಿತ ಜಾರಿಗೊಳಿಸಿದ್ದ ಯೂನ್‌ ಅವರನ್ನು ಅಧ್ಯಕ್ಷ ಸ್ಥಾನದಿಂದ ವಜಾಗೊಳಿಸಿದ್ದ ನಂತರ ಭ್ರಷ್ಟಾಚಾರ ನಿಗ್ರಹ ಪಡೆ ಮತ್ತು, ಪೊಲೀಸರು, ರಕ್ಷಣಾ ಸಚಿವಾಲಯ ಸೇರಿ ತನಿಖೆ ನಡೆಸುತ್ತಿತ್ತು.