Ranji Trophy: ಭಾರತ ಕ್ರಿಕೆಟ್‌ ಘಟಾನುಘಟಿಗಳೆಲ್ಲಾ ರಣಜಿ ಕಣಕ್ಕೆ?

Team Udayavani, Jan 16, 2025, 11:13 AM IST

ನವದೆಹಲಿ: ತವರಿನಲ್ಲಿ ನ್ಯೂಜಿಲ್ಯಾಂಡ್‌ ವಿರುದ್ದ ಮತ್ತು ಆಸ್ಟ್ರೇಲಿಯಾದಲ್ಲಿ  ಟೆಸ್ಟ್‌ ಸೋಲಿನ ಬಳಿಕ ಟೀಂ ಇಂಡಿಯಾ ಆಟಗಾರರು ದೇಶೀಯ ಕ್ರಿಕೆಟ್‌ ಆಡಬೇಕು ಎಂಬ ಬಿಸಿಸಿಐ ಸೂಚನೆಯ ಮೇರೆಗೆ ಈಗ ಭಾರತೀಯ ಕ್ರಿಕೆಟಿಗರು ರಣಜಿ ಆಟದತ್ತ ಮನ ಮಾಡಿದ್ದಾರೆ.

ಭಾರತ ಟೆಸ್ಟ್‌ ಕ್ರಿಕೆಟ್‌ ತಂಡದ ಆರಂಭಿಕ ಯಶಸ್ವಿ ಜೈಸ್ವಾಲ್‌ ಬುಧವಾರ ಮುಂಬೈ ಕ್ರಿಕೆಟ್‌ ಶಿಬಿರ ಸೇರಿಕೊಂಡು ರಣಜಿ ಪಂದ್ಯಾವಳಿಗಾಗಿ ಅಭ್ಯಾಸ ಆರಂಭಿಸಿದರು. ಅವರು ಮುಂಬೈ ಪರ ಆಡುವುದು ಖಚಿತಗೊಂಡಿದೆ. ಇನ್ನೊಂದು ಕಡೆ ವಿಕೆಟ್‌ ಕೀಪರ್‌, ಬ್ಯಾಟರ್‌ ರಿಷಭ್‌ ಪಂತ್‌ ಕೂಡ ದೆಹಲಿ ಪರ ಆಡಲಿದ್ದಾರೆ ಎಂದು ಮೂಲಗಳು ಹೇಳಿವೆ.

ರಾಜ್ಯದ ಪರ ಕೆ.ಎಲ್‌.ರಾಹುಲ್‌ ರಣಜಿ ಆಡುವ ಸಾಧ್ಯತೆ ಯಿದೆ. ಇದಿನ್ನೂ ಖಚಿತಗೊಂಡಿಲ್ಲ. ಮಂಗಳವಾರ ಮುಂಬೈ ತಂಡ ದೊಂದಿಗೆ ಅಭ್ಯಾಸ ನಡೆಸಿದ್ದ ರೋಹಿತ್‌, ಬುಧ ‌ವಾರ ಕಾಣಿಸಿಕೊಳ್ಳಲಿಲ್ಲ.

ಮುಂದಿನ ರಣಜಿ ಪಂದ್ಯಗಳು ಜ.23ರಿಂದ ಆರಂಭಗೊಳ್ಳಲಿವೆ. ಮುಂಬೈ ಜಮ್ಮು ಕಾಶ್ಮೀರವನ್ನು, ದೆಹಲಿ ಸೌರಾಷ್ಟ್ರವನ್ನು, ಕರ್ನಾಟಕ ಪಂಜಾಬನ್ನು ಎದುರಿಸಲಿದೆ.