New Scam…ಇದು ನಿಮ್ಮ ಬ್ಯಾಂಕ್‌ ಖಾತೆಯ ಹಣವನ್ನು ಖಾಲಿ ಮಾಡಿಬಿಡುತ್ತೆ! ಕಾಮತ್‌ ಎಚ್ಚರಿಕೆ

Team Udayavani, Jan 16, 2025, 1:09 PM IST

ಮುಂಬೈ: ಜೆರೋಧಾ ಸಹ ಸ್ಥಾಪಕ ಮತ್ತು ಸಿಇಒ ನಿತಿನ್‌ ಕಾಮತ್‌ ಇತ್ತೀಚೆಗೆ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ, ಬ್ಯಾಂಕ್‌ ಖಾತೆಯಲ್ಲಿನ ಹಣವನ್ನು ದೋಚುವ ಹೊಸ ಸೈಬರ್‌ ಕ್ರೈಂ ಕುರಿತು ಬಳಕೆದಾರರಿಗೆ ಎಚ್ಚರಿಕೆಯ ಸಂದೇಶವನ್ನು ನೀಡಿದ್ದಾರೆ.

ಜೆರೋಧಾ ಸಂಸ್ಥೆ ತಯಾರಿಸಿರುವ ವಿಡಿಯೋದಲ್ಲಿ ಈ ಬಗ್ಗೆ ಕಾಮತ್‌ ಅವರು, ವಂಚಕರು ಯಾರನ್ನು ಗುರಿಯಾಗಿರಿಸಿಕೊಳ್ಳುತ್ತಾರೆ, ಇಂತಹ ವಂಚನೆಗಳಿಂದ ಜನರು ತಮ್ಮನ್ನು ಹೇಗೆ ರಕ್ಷಿಸಿಕೊಳ್ಳಬಹುದು ಎಂಬ ಬಗ್ಗೆ ವಿವರಿಸಿದ್ದಾರೆ.

ಈ ಸನ್ನಿವೇಶವನ್ನು ಊಹಿಸಿಕೊಳ್ಳಿ, ಒಬ್ಬ ಅಪರಿಚಿತ ವ್ಯಕ್ತಿ ನಿಮ್ಮ ಬಳಿ ಬಂದು, ನನಗೆ ತುರ್ತು ಕರೆಯೊಂದು ಮಾಡುವುದಿದೆ, ಸ್ವಲ್ಪ ನಿಮ್ಮ ಮೊಬೈಲ್‌ ಕೊಡುತ್ತೀರಾ ಎಂದು ಕೇಳುತ್ತಾನೆ. ಬಹುತೇಕ ಜನರು ಆತನನ್ನು ನಂಬಿ ತಮ್ಮ ಫೋನ್‌ ಅನ್ನು ಆತನಿಗೆ ಕೊಡಬಹುದು. ಆದರೆ ಇದೊಂದು ವಂಚನೆಯ ಹೊಸ ವಿಧಾನವಾಗಿದೆ ಎಂದು ಎಚ್ಚರಿಸಿರುವ ಕಾಮತ್‌, ಆ ವ್ಯಕ್ತಿ ನಿಮ್ಮ ಒಟಿಪಿಯನ್ನು ಪ್ರತಿಬಂಧಿಸುವ ಮೂಲಕ ನಿಮ್ಮ ಬ್ಯಾಂಕ್‌ ಖಾತೆಯಲ್ಲಿದ್ದ ಹಣವನ್ನು ಖಾಲಿ ಮಾಡಿಬಿಡಬಹುದು. ವಂಚಕ ನಿಮಗೆ ಅರಿವಿಲ್ಲದೆಯೇ ಮೋಸಗೊಳಿಸುತ್ತಾನೆ ಜಾಗೃತೆಯಾಗಿರಿ ಎಂದು ಸಲಹೆ ನೀಡಿದ್ದಾರೆ.

ಅಪರಿಚಿತ ಹೇಗೆ ವಂಚಿಸುತ್ತಾನೆ…ಇದನ್ನು ತಡೆಯುವುದು ಹೇಗೆ?

ಹೊಸ ವಿಧಾನದ ಮೂಲಕ ಸ್ಕ್ಯಾಮರ್‌ ಹೇಗೆ ವಂಚಿಸುತ್ತಾನೆ ಎಂಬುದನ್ನು ಕಾಮತ್‌ ವಿಡಿಯೋದಲ್ಲಿ ವಿವರಿಸಿದ್ದು ಹೀಗೆ…

“ಸ್ಕ್ಯಾಮರ್‌ (ವಂಚಕ) ನಿಮ್ಮ ಮೊಬೈಲ್‌ ಅನ್ನು ಬಳಸುತ್ತಿರುವಂತೆ ನಟಿಸಿ, ಹೊಸ Apps ಅನ್ನು ಡೌನ್‌ ಲೋಡ್‌ ಮಾಡಿಕೊಳ್ಳಬಹುದು ಇಲ್ಲವೇ ವೈಯಕ್ತಿಕ ಮಾಹಿತಿಯನ್ನು ಡೌನ್‌ ಲೋಡ್‌ ಮಾಡಲು ಅಸ್ತಿತ್ವದಲ್ಲಿರುವ ಅಪ್ಲಿಕೇಶನ್‌ ಗಳನ್ನು ತೆರೆಯಬಹುದು ಅಥವಾ ನಿಮಗೆ ಬರುವ ಕರೆ, ಬ್ಯಾಂಕ್‌ ಅಲರ್ಟ್‌ ಸಂದೇಶ ಸೇರಿದಂತೆ ಎಲ್ಲವು ತನ್ನ ಮೊಬೈಲ್‌ ನಂಬರ್‌ ಗೆ ಬರುವಂತೆ ನಿಮ್ಮ ಫೋನ್‌ ಸೆಟ್ಟಿಂಗ್ಸ್‌ ಬದಲು ಮಾಡಬಹುದು.! ನಂತರ ಸ್ಕ್ಯಾಮರ್ಸ್‌ ಗೆ ಬ್ಯಾಂಕ್‌ ಅಕೌಂಟ್‌ ಖಾತೆಯ ವಿವರ, ಒಟಿಪಿ ಲಭ್ಯವಾಗುವ ಮೂಲಕ ಅನಧಿಕೃತವಾಗಿ ನಿಮ್ಮ ಖಾತೆಯಲ್ಲಿದ್ದ ಹಣವನ್ನು ತಮ್ಮ ಖಾತೆಗೆ ವರ್ಗಾಯಿಸಿಕೊಳ್ಳಬಹುದು.!

Imagine this: A stranger approaches you and asks to use your phone to make an emergency call. Most well-meaning people would probably hand over their phone. But this is a new scam.

From intercepting your OTPs to draining your bank accounts, scammers can cause serious damage… pic.twitter.com/3OdLdmDWe5

— Nithin Kamath (@Nithin0dha) January 15, 2025

ಅಷ್ಟೇ ಅಲ್ಲ ನಿಮ್ಮ ಮೊಬೈಲ್‌ ನ ಪಾಸ್‌ ವರ್ಡ್ಸ್‌ ಅನ್ನು ಬದಲಾಯಿಸಬಹುದು. ಈ ನಿಟ್ಟಿನಲ್ಲಿ ಇಂತಹ ವಂಚನೆಗಳಿಂದ ನೀವು ನಿಮ್ಮನ್ನು ರಕ್ಷಿಸಿಕೊಳ್ಳಬೇಕು. ಆದ್ದರಿಂದ ಯಾರೇ ನಿಮ್ಮ ಬಳಿ ಮೊಬೈಲ್‌ ಕೇಳಿದರೂ ಅವರ ಕೈಗೆ ನೇರವಾಗಿ ಮೊಬೈಲ್‌ ಕೊಡಬೇಡಿ. ಒಂದು ವೇಳೆ ಯಾರಾದರು ನಿಮ್ಮಲ್ಲಿ ಮೊಬೈಲ್‌ ಕೊಡುವಂತೆ ವಿನಂತಿಸಿಕೊಂಡರೆ, ಅವರಿಗೆ ಬೇಕಾದವರ ನಂಬರ್‌ ಡಯಲ್‌ ಮಾಡಿ, ಫೋನ್‌ ಸ್ಪೀಕರ್‌ ಅನ್ನು ಆನ್‌ ಮಾಡಿ ಮಾತನಾಡಿಸಿ ಎಂದು ಕಾಮತ್‌ ವಿಡಿಯೋದಲ್ಲಿ ಸಲಹೆ ನೀಡಿದ್ದಾರೆ.

ಕಾಮತ್‌ ಅವರು ಶೇರ್‌ ಮಾಡಿರುವ ಈ ಪೋಸ್ಟ್‌ ಈಗಾಗಲೇ 4,50,000 ಲಕ್ಷಕ್ಕೂ ಅಧಿಕ ವೀಕ್ಷಣೆ ಕಂಡಿದೆ. “ನಿಮ್ಮ ಸಲಹೆಗೆ ಧನ್ಯವಾದಗಳು..ಆದರೆ ಇದು ತುಂಬಾ ದುರದೃಷ್ಟಕರ. ಯಾಕೆಂದರೆ ಈಗಾಗಲೇ ಸಮಾಜದಲ್ಲಿ ಸೈಬರ್‌ ಕ್ರೈಂ ಎಷ್ಟು ನಷ್ಟ ಮಾಡಬೇಕೋ ಅದಕ್ಕಿಂತಲೂ ಅಧಿಕ ನಷ್ಟವನ್ನು ಉಂಟು ಮಾಡಿದೆ ಎಂದು ಸಾಮಾಜಿಕ ಜಾಲತಾಣ ಬಳಕೆದಾರರೊಬ್ಬರು ಪ್ರತಿಕ್ರಿಯಿಸಿದ್ದಾರೆ.