ವರೂರಿ ನವಗ್ರಹ ತೀರ್ಥ ಕ್ಷೇತ್ರದಲ್ಲಿ ಸುಮೇರು ಪರ್ವತ ಉದ್ಘಾಟಿಸಿದ ಉಪರಾಷ್ಟ್ರಪತಿ ಧನಕರ್

Team Udayavani, Jan 16, 2025, 3:03 PM IST

ಹುಬ್ಬಳ್ಳಿ: ಇಲ್ಲಿನ ವರೂರಿ ನವಗ್ರಹ ತೀರ್ಥ ಕ್ಷೇತ್ರದಲ್ಲಿ ನಿರ್ಮಿಸಿರುವ 405 ಅಡಿ ಸುಮೇರು ಪರ್ವತವನ್ನು ಉಪರಾಷ್ಟ್ರಪತಿ ಜಗದೀಪ ಧನಕರ್ ಅವರು ಗುರುವಾರ (ಜ.16) ಉದ್ಘಾಟಿಸಿದರು.

ಕ್ಷೇತ್ರದಲ್ಲಿ ನಡೆಯುತ್ತಿರುವ ಭಗವಾನ ಶ್ರೀ ಪಾರ್ಶ್ವನಾಥರ ಮಹಾಸ್ತಕಾಭಿಷೇಕ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ವಿಶ್ವ ಖ್ಯಾತಿಯ ಸುಮೇರು ಪರ್ವತವನ್ನು ಲೋಕಾರ್ಪಣೆ ಮಾಡಿದರು. ಎತ್ತರದ ಪರ್ವತದ ನಿರ್ಮಾಣ ಹಾಗೂ ಇದು ಮೂಲ ಉದ್ದೇಶ ಅರಿತ ಉಪರಾಷ್ಟ್ರಪತಿಗಳು ಅಚ್ಚರಿ ಹಾಗೂ ಮೆಚ್ಚುಗೆ ವ್ಯಕ್ತ ಪಡಿಸಿದರು.  ಇವರ ಧರ್ಮಪತ್ನಿ ಸುದೇಶ ಧನಕರ ಇದ್ದರು.

ರಾಜ್ಯಪಾಲ ಥಾವರಚಂದ್ ಗೆಹ್ಲೋಟ್, ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ.ವೀರೇಂದ್ರ ಹೆಗ್ಗಡೆ, ಕ್ಷೇತ್ರದ ರಾಷ್ಟ್ರಸಂತ ಆಚಾರ್ಯ ಶ್ರೀ ಗುಣಧರನಂದಿ ಮುನಿ ಮಹಾರಾಜರ ನೇತೃತ್ವ ವಹಿಸಿದ್ದರು. ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಸೇರಿದಂತೆ ಇನ್ನಿತರರಿದ್ದರು.

405 ಅಡಿ ಎತ್ತರವಿರುವ ಈ ಪರ್ವತ ಹದಿನಾರು ಮಹಡಿಗಳನ್ನು ಹೊಂದಿದೆ‌. ಪ್ರತಿಯೊಂದು ಮಹಡಿಯಲ್ಲಿ ತೀರ್ಥಂಕರರ ಜೀವನ ಚರಿತ್ರೆ ಸಾರುವ ಹಾಗೂ ಅವರ ಮೂರ್ತಿಗಳನ್ನು ಪ್ರತಿಷ್ಠಾಪಿಸಲಾಗಿದೆ.  ಜೈನ ಧರ್ಮ, ಆಚರಣೆ ವಿವರಣೆ ನೀಡಲಿವೆ. ಜೈನ ಧರ್ಮದ ಧಾರ್ಮಿಕ, ಸಾಂಸ್ಕೃತಿಕ ಇತಿಹಾಸವನ್ನು ಒಳಗೊಂಡಿದೆ. ಜಗತ್ತಿನಲ್ಲಿಯೇ ಇದು ಮೊದಲನೆಯದು. ಪರ್ವತದ ತುದಿಯವರೆಗೂ ತಲುಪಲು ಲಿಫ್ಟ್ ವ್ಯವಸ್ಥೆಯಿದೆ.