400 ಕೋಟಿ ರೂ. ದಾಟಿದ ಆಮಿರ್‌ ಖಾನ್‌ “ದಂಗಲ್‌’ ವಿಶ್ವ ಗಳಿಕೆ

Team Udayavani, Jan 2, 2017, 5:05 PM IST

ಮುಂಬಯಿ : ಕ್ರಿಸ್‌ಮಸ್‌ ಸಂದರ್ಭದಲ್ಲಿ ಬಿಡುಗಡೆಗೊಂಡಿದ್ದ ಆಮಿರ್‌ ಖಾನ್‌ ಅವರ ದಂಗಲ್‌ ಚಿತ್ರದ ವಿಶ್ವ ಗಳಿಕೆಯು 400 ಕೋಟಿ ರೂ. ದಾಟುವ ಮೂಲಕ ಹೊಸ ವಿಕ್ರಮ ಸಾಧಿಸಿದೆ.

ದೇಶೀಯ ಮಾರುಕಟ್ಟೆಯಲ್ಲಿ ದಂಗಲ್‌ ಚಿತ್ರದ ಈ ತನಕದ ಗಳಿಕೆ 270 ಕೋಟಿ ರೂ. ಆಗಿದೆ. ಸಾಗರೋತ್ತರ ಮಾರುಕಟ್ಟೆಗಳಲ್ಲಿ ಈ ಚಿತ್ರ ಈಗಾಗಲೇ 141.60 ಕೋಟಿ ರೂ. ಗಳಿಸಿದೆ. ಒಟ್ಟಾರೆಯಾಗಿ ಚಿತ್ರದ ಗಳಿಕೆಯು  411 ಕೋಟಿ ರೂ.ಗಳಾಗಿವೆ ಎಂದು ಮೂಲಗಳು ತಿಳಿಸಿವೆ. 

ಭಾರತೀಯ ಕುಸ್ತಿ ಪಟು ಮಹಾವೀರ್‌ ಸಿಂಗ್‌ ಫೋಗಟ್‌ ಅವರು ತಮ್ಮ ಇಬ್ಬರು ಪುತ್ರಿಯರಾದ ಗೀತಾ ಫೋಗಟ್‌ ಮತ್ತು ಬಬಿತಾ ಕುಮಾರಿ ಅವರನ್ನು ವಿಶ್ವ ಮಟ್ಟದ ಕುಸ್ತಿ ಪಟುಗಳನ್ನಾಗಿ ಮಾಡಿರುವ ನೈಜ ಕಥೆಯನ್ನು ಒಳಗೊಂಡ “ದಂಗಲ್‌’ ಚಿತ್ರವು ಅಮೆರಿಕ ಮತ್ತು ಕೆನಡದಲ್ಲಿ 8.91 ದಶಲಕ್ಷ ಡಾಲರ್‌ ಗಳಿಸಿದೆ; ಯುಎಇ-ಜಿಸಿಸಿಯಲ್ಲಿ 5.81 ದಶಲಕ್ಷ ಡಾಲರ್‌ ಗಳಿಸಿದೆ; ಬ್ರಿಟನ್‌ನಲ್ಲಿ 2.99
ದಶಲಕ್ಷ ಡಾಲರ್‌ ಹಾಗೂ ಆಸ್ಟ್ರೇಲಿಯದಲ್ಲಿ 2.01 ದಶಲಕ್ಷ ಡಾಲರ್‌ ಸಂಪಾದಿಸಿದೆ.

ಹರಿಯಾಣದ ಸೆಟ್ಟಿಂಗ್‌ ಹೊಂದಿರುವ ಹೊರತಾಗಿಯೂ ದಂಗಲ್‌ ಚಿತ್ರ ವಿಶ್ವಾದ್ಯಂತ ಜನಮೆಚ್ಚುಗೆಯನ್ನು ಪಡೆದಿದೆ.