ಗೃಹರಕ್ಷಕ ದಳದ ಪಶ್ಚಿಮ ವಲಯ ಕ್ರೀಡಾಕೂಟ: ಉ.ಕ.ಕ್ಕೆ ಸಮಗ್ರ ಪ್ರಶಸ್ತಿ

Team Udayavani, Jan 10, 2017, 3:45 AM IST

ಉಡುಪಿ: ಗೃಹ ರಕ್ಷಕ ದಳದವರ ಕಾರ್ಯ ವೈಖರಿ ಮತ್ತು ಸೇವಾಮನೋಭಾವವನ್ನು ಅರಿತಿರುವ ಅನೇಕ ಇಲಾಖೆಗಳು ಇಂದು ಗೃಹರಕ್ಷಕ ದಳದವರಿಗಾಗಿ ಬೇಡಿಕೆಯನ್ನು ಸಲ್ಲಿಸುತ್ತಿವೆ ಎಂದು ಕರ್ನಾಟಕ ರಾಜ್ಯ ಗೃಹರಕ್ಷಕ ದಳದ ಹೆಚ್ಚುವರಿ ಮಹಾ ಸಮಾದೇಷ್ಟರಾದ ಎನ್‌. ಶಿವಕುಮಾರ್‌ ಅವರು ಗೃಹರಕ್ಷಕದಳದ ಪಶ್ಚಿಮ ವಲಯ ಮಟ್ಟದ ವೃತ್ತಿಪರ ಕ್ರೀಡಾಕೂಟದಲ್ಲಿ ಭಾಗವಹಿಸಿ ಹೇಳಿದರು.

ಗೃಹರಕ್ಷಕ ದಳದ ಪ. ವಲಯ ಮಟ್ಟದ  ಕ್ರೀಡಾಕೂಟ ದಲ್ಲಿ ಉತ್ತರ ಕನ್ನಡ ಜಿಲ್ಲೆ ಸಮಗ್ರ ಪ್ರಶಸ್ತಿಯನ್ನು ಪಡೆಯಿತು. ಅದೇ ಜಿಲ್ಲೆಯ ನಾಗರಾಜ ಗೌಡ ಪುರುಷರ ವಿಭಾಗದಲ್ಲಿ ಚಾಂಪಿಯನ್‌ ಆಗಿ ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಯ ದೀಕ್ಷಾ ಮತ್ತು ದೀಪಾ ಮಹಿಳೆಯರ ವಿಭಾಗದಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮಿದರು. 

ನಿಟ್ಟೆ ವಿ.ವಿ.ಯ ಉಪಕುಲಪತಿ ಡಾ| ರಮಾನಂದ ಶೆಟ್ಟಿ, ಅದಾನಿ  ಸಮೂಹದ ಜಂಟಿ ಅಧ್ಯಕ್ಷರಾದ ಕಿಶೋರ್‌ ಆಳ್ವ,  ಉದ್ಯಮಿ ಕಿಶೋರ್‌ ಶೆಟ್ಟಿ,  ದ.ಕ. ಜಿಲ್ಲೆಯ ಗೃಹರಕ್ಷಕ ದಳದ ಜಿಲ್ಲಾ ಕಮಾಡೆಂಟ್‌ ಮುರಲೀಮೋಹನ್‌ ಚೂಂತಾರ್‌, ಸೆಕೆಂಡ್‌ ಇನ್‌ ಕಮಾಂಡೆಂಟ್‌ ಮೊಹ್ಮದ್‌ ಇಸ್ಮಾಯಿಲ್‌ ಉಪಸ್ಥಿತರಿದ್ದರು.

ಉಡುಪಿ ಜಿಲ್ಲೆಯ ಸೆಕೆಂಡ್‌ ಇನ್‌ ಕಮಾಂಡೆಂಟ್‌ ಕೆ.ಸಿ. ರಾಜೇಶ್‌ ಸ್ವಾಗತಿಸಿ, ಡೆಪ್ಯುಟಿ ಕಮಾಂಡೆಂಟ್‌ ರಮೇಶ್‌ ವಂದಿಸಿದರು. ಹೈಟೆಕ್‌ ಆಸ್ಪತ್ರೆಯ ಪ್ರಬಂಧಕ ಸಾಯಿನಾಥ ಉದ್ಯಾವರ ಕಾರ್ಯಕ್ರಮ ನಿರೂಪಿಸಿದರು.