ಭರವಸೆಯಲ್ಲೇ ಉಳಿದ ಸಂತ್ರಸ್ತರ ಶಾಶ್ವತ ಪುನರ್ವಸತಿ ಕೇಂದ್ರ

Team Udayavani, Jan 9, 2017, 11:54 PM IST

ಆಲಂಕಾರು: ಎಂಡೋ ಸಂತ್ರಸ್ತರ ಬಾಳಲ್ಲಿ ಕೋಲ್ಮಿಂಚು ಮೂಡಿಸಬಹುದಾಗಿದ್ದ ಭರವಸೆಗೆ ನಾಲ್ಕು ವರ್ಷಗಳಾದವು. ಅದಿನ್ನೂ ಈಡೇರಿಲ್ಲ. ಆಲಂಕಾರಿನಲ್ಲಿ ಎಂಡೋ ಸಂತ್ರಸ್ತರ ಶಾಶ್ವತ ಪುನರ್‌ವಸತಿ ಕೇಂದ್ರ ನಿರ್ಮಿಸುವುದಾಗಿ ಸರಕಾರ ಹೇಳಿತ್ತು. ಈ ನಿಟ್ಟಿನಲ್ಲಿ ಸಚಿವರು, ಜನಪ್ರತಿನಿಧಿಗಳು ಹಲವು ಭರವಸೆ ನೀಡಿದರು. ಅಂದಿನ ಆರೋಗ್ಯ ಸಚಿವ ಯು.ಟಿ. ಖಾದರ್‌ ಅಧಿಕಾರ ಸ್ವೀಕರಿಸಿದ ವಾರದಲ್ಲೇ ಆಲಂಕಾರು ಗ್ರಾ.ಪಂ. ಅಧೀನದ ಜಾಗದಲ್ಲಿ ಎಂಡೋ ಸಂತ್ರಸ್ತರಿಗೆ ಶಾಶ್ವತ ಪುನರ್ವಸತಿ ಕೇಂದ್ರ ಸ್ಥಾಪನೆಗಾಗಿ ಮೀಸಲಿರಿಸಿದ್ದ ಜಾಗಕ್ಕೆ ಭೇಟಿ ನೀಡಿ, ದಾಖಲೆ ಪತ್ರಗಳನ್ನು ವೀಕ್ಷಿಸಿ ವರ್ಷದೊಳಗೆ ಆರಂಭಿಸಲಾಗುವುದು ಎಂದಿದ್ದರು. 4 ವರ್ಷಗಳಾದರೂ ಈ ಬಗ್ಗೆ ಸರಕಾರಿ ಮಟ್ಟದಲ್ಲಿ ಯಾವುದೇ ಪ್ರಕ್ರಿಯೆ ನಡೆದಿಲ್ಲ. ಈಗ ಅವರ ಸ್ಥಾನಕ್ಕೆ ರಮೇಶ್‌ ಕುಮಾರ್‌ ಬಂದಿದ್ದಾರೆ. ಆರೋಗ್ಯ ಇಲಾಖೆಯ ಆಯುಕ್ತ ಎ.ಬಿ. ಪಾಟೀಲ್‌ ಸಹ ಇದೇ ಸ್ಥಳಕ್ಕೆ ಭೇಟಿ ನೀಡಿ, ಆಲಂಕಾರನ್ನು ಕೇಂದ್ರವಾಗಿರಿಸಿ ಜಿಲ್ಲೆಗೆ ಶಾಶ್ವತ ಪುನರ್ವಸತಿ ಕೇಂದ್ರ, ಎಂಟು ಪಾಲನಾ ಕೇಂದ್ರಗಳನ್ನು ವಿವಿಧೆಡೆ ತೆರೆಯುವುದಾಗಿ ಹೇಳಿದ್ದರು, ಅದೂ ಈಡೇರಿಲ್ಲ.

ಅಂದು ಆರೋಗ್ಯ ಸಚಿವರಾಗಿದ್ದಾಗ ಯು.ಟಿ. ಖಾದರ್‌ ಆಲಂಕಾರಿನಲ್ಲಿ ಎಂಡೋ ಸಂತ್ರಸ್ತರ ಶಾಶ್ವತ ಪುನರ್ವಸತಿ ಕೇಂದ್ರಕ್ಕಾಗಿ ಮೀಸಲಿಟ್ಟ ಜಾಗದಲ್ಲಿ ದಾಖಲೆ ಪತ್ರಗಳನ್ನು ವೀಕ್ಷಿಸುತ್ತಿರುವುದು.

ಓರ್ವರ ಭರವಸೆಯಲ್ಲ
ಬೆಳ್ತಂಗಡಿ, ಸುಳ್ಯ, ಬಂಟ್ವಾಳ ತಾಲೂಕುಗಳಲ್ಲದೇ, ಪುತ್ತೂರು ತಾಲೂಕಿನ 31 ಗ್ರಾಮ ಗಳಲ್ಲಿ ಎಂಡೋ ಸಿಂಪಡನೆಯಾಗಿತ್ತು. ಇದರಿಂದ ನೊಂದವರಿಗೆ ಸೂಕ್ತ ಪರಿಹಾರ ದೊರಕಿಸಲು ಕೊಕ್ಕಡದಲ್ಲಿ ಎಂಡೋ ಸಂತ್ರಸ್ತರ ಹೋರಾಟ ಸಮಿತಿಯೊಂದು ಅಸ್ತಿತ್ವಕ್ಕೆ ಬಂದು ಅಂದಿನ ಮುಖ್ಯಮಂತ್ರಿ ಧರಂ ಸಿಂಗ್‌ ಅವರಿಗೆ ಮನವಿ ನೀಡುತ್ತಾ ಬಂದಿತ್ತು. ಈ ವಿಚಾರ ವಿಧಾನಸಭೆಯಲ್ಲಿ ಪ್ರತಿಧ್ವನಿಸಿತು. ಆಗ ವಿಧಾನಪರಿಷತ್‌ ಸದಸ್ಯರಾಗಿದ್ದ ಶೋಭಾ ಕರಂದ್ಲಾಜೆ ಕೊಕ್ಕಡಕ್ಕೆ ಭೇಟಿ ನೀಡಿ ಸರಕಾರಕ್ಕೆ ವರದಿ ನೀಡಿದರು. ಈ ಹಿನ್ನೆಲೆಯಲ್ಲಿ ಬೆಳ್ತಂಗಡಿ ತಾಲೂಕಿನ ನಿಡ್ಲೆ, ಪಟ್ರಮೆ, ಕೊಕ್ಕಡ ಗ್ರಾಮಗಳ ಮತ್ತು ಆಲಂಕಾರು ಗ್ರಾಮದ ಬುಡೇರಿಯಾದ ರಾಜೀವಿ ಕುಟುಂಬ ಸೇರಿದಂತೆ 211 ಕುಟುಂಬಗಳ 213 ಮಂದಿಗೆ ತಲಾ 50 ಸಾವಿರದಂತೆ ಪರಿಹಾರ ಧನ ಹಾಗೂ ಮಾಶಾಸನ ವಿತರಿಸಲಾಗಿತ್ತು.

– ಸದಾನಂದ ಆಲಂಕಾರು

ಇದನ್ನೂ ಓದಿ:

► ಎಂಡೋ ಪೀಡಿತ ಕುಟುಂಬದ್ದು ಬದುಕು ಅಲ್ಲ; ಅದು ಬವಣೆ!: http://bit.ly/2jcQis0
► ‘ಹಳೆಯ ಔಷಧವನ್ನೇ ಸದ್ಯಕ್ಕೆ ಮುಂದುವರಿಸಿ’: http://bit.ly/2jr8en7
► ಇನ್ನೂ ಬಾರದ ಶಾಶ್ವತ ಪುನರ್‌ವಸತಿ ಕೇಂದ್ರ: http://bit.ly/2is2W6M