ಕಾನ್ಪುರ ರೈಲು ದುರಂತ: ಪಾಕಿಸ್ಥಾನದ ಕೈವಾಡ ?

Team Udayavani, Jan 18, 2017, 3:45 AM IST

ಪಟ್ನಾ /ಕಾನ್ಪುರ: ಇದುವರೆಗೆ ಬಾಂಬ್‌ ಇಟ್ಟು ಜನರನ್ನು ಬಲಿ ತೆಗೆದುಕೊಳ್ಳುತ್ತಿದ್ದ ಪಾಕಿಸ್ಥಾನದ ಐಎಸ್‌ಐ ಈಗ ಬೇರೊಂದು ಮಾರ್ಗ ತುಳಿದಿದೆಯೇ? ಹೌದು ಎನ್ನುತ್ತಿವೆ ಮೂಲಗಳು. ಕಳೆದ ವರ್ಷದ ನವೆಂಬರ್‌ 21ರಂದು ಉತ್ತರ ಪ್ರದೇಶದ ಕಾನ್ಪುರದಲ್ಲಿ 150 ಮಂದಿಯನ್ನು ಬಲಿ ತೆಗೆದುಕೊಂಡ ಇಂದೋರ್‌-ಪಟ್ನಾ ರೈಲು ದುರಂತಕ್ಕೆ ಪಾಕ್‌ನ ಬೇಹುಗಾರಿಕೆ ಸಂಸ್ಥೆ ಐಎಸ್‌ಐ ಕಾರಣವೆಂಬ ಬಲವಾದ ಶಂಕೆ ಈಗ ಉಂಟಾಗಿದೆ.

ಕಳೆದ ವರ್ಷ ಅ. 1ರಂದು ಬಿಹಾರದ ರಕೌಲ್‌-ಸೀತಾಮಢಿ ರೈಲು ಮಾರ್ಗದಲ್ಲಿ ಸುಧಾರಿತ ಸ್ಫೋಟಕ (ಐಇಡಿ) ದೊರೆತಿತ್ತು. ಈ ಸಂಬಂಧ ಮೋತಿ ಪಾಸ್ವಾನ್‌ ಸಹಿತ ಮೂವರನ್ನು ಬಿಹಾರ ಪೊಲೀಸರು ಬಂಧಿಸಿದ್ದರು. ಪೊಲೀಸ್‌ ತನಿಖೆ ವೇಳೆ, “ನೇಪಾಲ ಮೂಲದವನಾದ ದುಬಾೖ ವಾಸಿ ಉದ್ಯಮಿ ಶಂಸುಲ್‌ ಹೋಡಾ ಎಂಬಾತ ಈ ಕೃತ್ಯ ಎಸಗಲು ತನಗೆ ಹಣ ನೀಡಿದ್ದ ಎಂದು ಆರೋಪಿಯೊಬ್ಬ ತಪ್ಪೊಪ್ಪಿ ಕೊಂಡಿದ್ದಾನೆ. ಈ ಉದ್ಯಮಿಗೆ ಐಎಸ್‌ಐ ಕುಮ್ಮಕ್ಕಿದೆ ಎಂದು ಹೇಳಲಾಗಿದೆ. ಹೀಗಾಗಿ ಇಂದೋರ್‌-ಪಟ್ನಾ ರೈಲು ದುರಂತ ಹಾಗೂ ಸಿಯಾಲ್‌ದಹಾ-ಅಜೆರ್‌ ರೈಲು ದುರಂತದ ಹಿಂದೆಯೂ ಇದೇ ಜಾಲದ ಕೈವಾಡ ಇರುವ ಶಂಕೆ ಇದೆ. ಈ ನಿಟ್ಟಿನಲ್ಲಿ ತನಿಖೆ ಮುಂದುವರಿಸಲಾಗುತ್ತಿದೆ’ ಎಂದು ಬಿಹಾರದ ಪೂರ್ವ ಚಂಪಾರಣ್ಯದ ಎಸ್‌ಪಿ ತಿಳಿಸಿದ್ದಾರೆ.

ಇಂದೋರ್‌- ಪಟ್ನಾ ನಡುವಿನ ಎಕ್ಸ್‌ಪ್ರೆಸ್‌ ರೈಲಿನ 14 ಬೋಗಿಗಳು ಕಾನ್ಪುರದಲ್ಲಿ ಹಳಿ ತಪ್ಪಿ 150 ಮಂದಿ ಸಾವಿಗೀಡಾಗಿದ್ದರು. ಈ ಅಪಘಾತಕ್ಕೆ ಹಳಿ ಬಿರುಕು ಬಿಟ್ಟದ್ದೇ ಕಾರಣ ಎಂದು ಶಂಕಿಸಲಾಗಿತ್ತು. ಆದರೆ ಐಎಸ್‌ಐ ಕುಮ್ಮಕ್ಕಿನಿಂದ ಐಇಡಿ ಇಟ್ಟು ಸ್ಫೋಟಿಸಿರುವ ಅನುಮಾನ ಈಗ ಉಂಟಾಗಿದೆ.