ಫೆ.2ರಿಂದ 9ನೇ ಬೆಂಗಳೂರು ಅಂತಾರಾಷ್ಟ್ರೀಯ ಸಿನಿಮೋತ್ಸವ

Team Udayavani, Jan 19, 2017, 12:28 PM IST

ಮೈಸೂರು: 9ನೇ ಬೆಂಗಳೂರು ಅಂತಾರಾಷ್ಟ್ರೀಯ ಸಿನಿಮೋತ್ಸವ ಫೆಬ್ರವರಿ 2 ರಿಂದ 9ರವರೆಗೆ ಬೆಂಗಳೂರು ಮತ್ತು ಮೈಸೂರು ನಗರದಲ್ಲಿ ನಡೆಯಲಿದೆ ಎಂದು ಕರ್ನಾಟಕ ಚಲನಚಿತ್ರ ಅಕಾಡೆಮಿ ಅಧ್ಯಕ್ಷ ಎಸ್‌.ವಿ.ರಾಜೇಂದ್ರಸಿಂಗ್‌ ಬಾಬು ತಿಳಿಸಿದರು.

ನಗರದಲ್ಲಿ ಬುಧವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ವಿಧಾನಸೌಧದ ಮುಂಭಾಗದ ಮೆಟ್ಟಿಲುಗಳ ಮೇಲೆ ಫೆ.2ರ ಸಂಜೆ ಸಿನಿಮೋತ್ಸವ ಉದ್ಘಾಟನೆಯಾಗಲಿದ್ದು, ಫೆ.9ರ ಸಂಜೆ ಮೈಸೂರು ಅರಮನೆ ಮುಂಭಾಗ ಸಿನಿಮೋತ್ಸವದ ಸಮಾರೋಪ ಹಾಗೂ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ. ಎರಡೂ ಸಮಾರಂಭಗಳಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅಧ್ಯಕ್ಷತೆವಹಿಸಲಿದ್ದು, ರಾಜ್ಯಪಾಲ ವಜುಭಾಯಿ ವಾಲಾ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ ಎಂದರು.

ಫೆ.3ರಿಂದ ಚಿತ್ರ ಪ್ರದರ್ಶನ ಆರಂಭವಾಗಲಿದ್ದು, ಬೆಂಗಳೂರಿನ ರಾಜಾಜಿನಗರದಲ್ಲಿರುವ ಒರಾಯನ್‌ ಮಾಲ್‌ನ ಪಿವಿಆರ್‌ ಸಿನಿಮಾಸ್‌ನ 11 ಪರದೆಗಳು ಮತ್ತು ಮೈಸೂರಿನ ಮಾಲ್‌ ಆಫ್ ಮೈಸೂರಿನ ಐನಾಕ್ಸ್‌ ಸಿನಿಮಾಸ್‌ನ 4 ಪರದೆಗಳಲ್ಲಿ ಪ್ರದರ್ಶನ ನಡೆಯಲಿದೆ. ಸುಮಾರು 55 ದೇಶಗಳ 200 ಚಿತ್ರಗಳು ಉತ್ಸವದ ಬೇರೆ ಬೇರೆ ವಿಭಾಗಗಳಲ್ಲಿ ಪ್ರದರ್ಶನ ಕಾಣಲಿವೆ. ಬಾಬಾ ಸಾಹೇಬ್‌ ಡಾ.ಬಿ.ಆರ್‌.ಅಂಬೇಡ್ಕರ್‌ ಅವರ 125ನೇ ಜನ್ಮ ದಿನೋತ್ಸವದ ನೆನಪಿಗಾಗಿ ಡಾ.ಜಬ್ಟಾರ್‌ ಪಟೇಲ್‌ ನಿರ್ದೇಶನದ ಅಂಬೇಡ್ಕರ್‌ ಜೀವನಗಾಥೆಯ ಚಿತ್ರ ಪ್ರದರ್ಶಿಸುವ ಮೂಲಕ ಸಿನಿಮೋತ್ಸವದಲ್ಲಿ ಅಂಬೇಡ್ಕರ್‌ ಅವರಿಗೆ ವಿಶೇಷ ಗೌರವ ಸಲ್ಲಿಸಲಾಗುವುದು ಎಂದರು. 

ಸಿನಿಮೋತ್ಸವ ಚಿತ್ರಗಳ ಸ್ಪರ್ಧಾ ವಿಭಾಗದಲ್ಲಿ ಏಷ್ಯನ್‌ ಚಿತ್ರಗಳ ಸ್ಪರ್ಧೆ, ಭಾರತೀಯ ಚಿತ್ರಗಳ ಸ್ಪರ್ಧೆ, ಕನ್ನಡ ಚಿತ್ರಗಳ ಸ್ಪರ್ಧೆ ಹಾಗೂ ಕನ್ನಡದ ಜನಪ್ರಿಯ ಮನರಂಜನಾ ಚಿತ್ರಗಳ ಸ್ಪರ್ಧೆ ನಡೆಯಲಿದೆ. ಅಲ್ಲದೆ, ಸಮಕಾಲೀನ ವಿಶ್ವ ಸಿನಿಮಾ, ದೇಶನೋಟ, ಪುನರವಲೋಕನ, ಗೌರವ, ಶತಮಾನೋತ್ಸವ ನೆನಪು, ವಿಶೇಷ ಗೌರವ ಹಾಗೂ ಕೊಂಡಾಡದ ಅದ್ಭುತ ಭಾರತ ಸೇರಿದಂತೆ 8 ವಿಭಾಗಗಳಲ್ಲಿ ಚಿತ್ರ ಪ್ರದರ್ಶನ ನಡೆಯಲಿದೆ. ಕೊಂಡಾಡದ ಅದ್ಭುತ ಭಾರತ ವಿಶೇಷ ವಿಭಾಗದಲ್ಲಿ ಭಾರತದ ಉಪ ಭಾಷೆಗಳಾದ ಕರ್ನಾಟಕದ ತುಳು, ಕೊಡವ, ಬಂಜಾರ, ಈಶಾನ್ಯ ರಾಜ್ಯಗಳ ಖಾಸಿ, ವಾಂಛೂ, ರಾಜ್‌ಭಾನ್‌ಸಿ ಮುಂತಾದ ಭಾಷೆಗಳ ಚಿತ್ರಗಳ ಪ್ರದರ್ಶನ ವಿರಲಿದೆ. ಏಷ್ಯನ್‌ ವಿಭಾಗ ಮತ್ತು ವಿಶ್ವ ಸಿನಿಮಾ ವಿಭಾಗದಲ್ಲಿ ಪ್ರದರ್ಶನವಾಗುವ ಸಾಕಷ್ಟು ಚಿತ್ರಗಳು ಬರ್ಲಿನ್‌, ಕಾನ್‌, ಟೊರೆಂಟೊ, ಗೋವಾ, ಮುಂಬೈ, ಕೇರಳ ಮುಂತಾದ ಕಡೆಗಳಲ್ಲಿ ನಡೆದ ಪ್ರತಿಷ್ಠಿತ ಚಿತ್ರೋತ್ಸವದಲ್ಲಿ ಪಾಲ್ಗೊಂಡ ಚಿತ್ರಗಳಾಗಿವೆ ಎಂದು ವಿವರಿಸಿದರು.

ಹಂಗೇರಿಯ ಜೋಲ್ಟನ್‌ ಫಾಬ್ರಿ, ಯು.ಕೆ.ಯ ಕೆನ್‌ಲೋಚ್‌, ಇರಾನ್‌ನ ಆಸರ್‌ ಫ‌ರ್ಹಾದಿ, ಕೊರಿಯಾದ ಕಿಂ ಕಿ ಡುಕ್‌, ರೊಮಾನಿಯಾದ ಕ್ರಿಸ್ತಿಯನ್‌ ಮುಂಗ್ಯು ಸೇರಿದಂತೆ ವಿಶ್ವಖ್ಯಾತಿಯ ಚಲನಚಿತ್ರ ನಿರ್ದೇಶಕರ ಚಿತ್ರಗಳು ಈ ಉತ್ಸವದಲ್ಲಿ ಪ್ರದರ್ಶನ ಕಾಣಲಿವೆ. ವಿಮರ್ಶಕರ ಪ್ರಶಸ್ತಿ ಪಡೆದ ಚಿತ್ರಗಳು ಮತ್ತು ನೆಟ್‌ಪ್ಯಾಕ್‌ ಪ್ರಶಸ್ತಿ ಪಡೆದ ಚಿತ್ರಗಳ ವಿಭಾಗ, ವಿಶೇಷ ವಿಷಯಾಧಾರಿತ ವಿಭಾಗ, ಸಾಕ್ಷÂಚಿತ್ರಗಳ ವಿಭಾಗ, ಬಯೋಪಿಕ್ಸ್‌ ವಿಭಾಗದಲ್ಲಿ ಚಿತ್ರ ಪ್ರದರ್ಶನ ನಡೆಯಲಿದೆ.

ಸಿನಿಮೋತ್ಸವದ ಭಾಗವಾಗಿ ದಾದಾ ಸಾಹೇಬ್‌ ಫಾಲ್ಕೆ ಪ್ರಶಸ್ತಿ ಪುರಸ್ಕೃತ ವಿ.ಕೆ.ಮೂರ್ತಿ ಸ್ಮಾರಕ ಉಪನ್ಯಾಸ. ಧ್ವನಿ ವಿನ್ಯಾಸ, ಸಂಕಲ, ಚಿತ್ರಕಥಾ ರಚನೆ ಕುರಿತ ಕಮ್ಮಟ, ತಾಂತ್ರಿಕ ಆವಿಷ್ಕಾರಗಳ ಕುರಿತ ವಿಶೇಷ ಚರ್ಚೆ, ಲಿಂಗ ಸಂವೇದನೆ ಕುರಿತ ವಿಚಾರಗೋಷ್ಠಿ, ಚಿತ್ರಕಥಾ ರಚನೆ, ಸಾಕ್ಷ್ಯಾಚಿತ್ರ ತಯಾರಿಕೆ ಕುರಿತು ತಜ್ಞರಿಂದ ತರಗತಿ, ಚಿತ್ರ ವಿಮರ್ಶೆ, ಪುಸ್ತಕ ಬಿಡುಗಡೆ, ಚಲನಚಿತ್ರ ನಿರ್ದೇಶಕರು ಮತ್ತು ವಿಮರ್ಶಕರ ನಡುವೆ ವಿಚಾರ ವಿನಿಮಯ, ಕನ್ನಡ ರಾಜ್ಯೋದಯದ 60 ವರ್ಷಗಳ ಹಿನ್ನೆಲೆಯಲ್ಲಿ ಸಿಂಹಾವಲೋಕನ ಕಾರ್ಯಕ್ರಮಗಳನ್ನು ಒಳಗೊಂಡಿದ್ದು, ಇದೇ ಮೊದಲ ಬಾರಿಗೆ ವೆಬ್‌ಕಾಸ್ಟಿಂಗ್‌ ಮೂಲಕ ಬೆಂಗಳೂರಿನಲ್ಲಿ ನಡೆಯುವ ಚರ್ಚೆಗಳಲ್ಲಿ ಮೈಸೂರಿನ ಪ್ರತಿನಿಧಿಗಳೂ ಭಾಗವಹಿಸುವ ಅವಕಾಶ ಕಲ್ಪಿಸಲಾಗುತ್ತಿದೆ ಎಂದರು.

ಜಿಲ್ಲಾಧಿಕಾರಿ ಡಿ.ರಂದೀಪ್‌, ವಾರ್ತಾ ಇಲಾಖೆ ನಿರ್ದೇಶಕ ಎನ್‌.ಆರ್‌.ವಿಶುಕುಮಾರ್‌, ಅಕಾಡೆಮಿ ಕಾರ್ಯದರ್ಶಿ ಎಚ್‌.ಬಿ.ದಿನೇಶ್‌, ಸಿನಿಮೋತ್ಸವದ ಸಂಚಾಲಕ ವಿದ್ಯಾಶಂಕರ್‌ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ನೋಂದಣಿ: ಸಿನಿಮೋತ್ಸವಕ್ಕೆ ಪ್ರತಿನಿಧಿಗಳ ನೋಂದಣಿ ಕಾರ್ಯ ಆರಂಭವಾಗಿದ್ದು, ಬೆಂಗಳೂರಿನಲ್ಲಿ ಎನ್‌.ಆರ್‌.ವೃತ್ತದಲ್ಲಿರುವ ಚಲನಚಿತ್ರ ಅಕಾಡೆಮಿ ಕಾರ್ಯಾಲಯ, ಸುಚಿತ್ರಾ ಚಿತ್ರ ಸಮಾಜ ಮತ್ತು ಮೈಸೂರಿನಲ್ಲಿ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಕಚೇರಿಯಲ್ಲಿ ಆಸಕ್ತರು ನೋಂದಣಿ ಮಾಡಿಕೊಳ್ಳಬಹುದು. ಸಾರ್ವಜನಿಕರಿಗೆ 600 ರೂ., ವಿದ್ಯಾರ್ಥಿಗಳು, ಚಿತ್ರ ಸಮಾಜದ ಸದಸ್ಯರು, ಹಿರಿಯ ನಾಗರಿಕರು, ವಾಣಿಜ್ಯ ಮಂಡಳಿ ಮತ್ತು ಅಂಗಸಂಸ್ಥೆಗಳ ಸದಸ್ಯರಿಗೆ 300 ರೂ. ಪ್ರತಿನಿಧಿ ಶುಲ್ಕ ನಿಗದಿಪಡಿಸಲಾಗಿದೆ.