ಗುಂಡ್ಯಾನ ಹೆಂಡ್ತಿಯ ಸಿನಿಯಾನ…

Team Udayavani, Jan 20, 2017, 3:45 AM IST

ಹೊಸ ಸಿನಿಮಾಗಳು ಸೆಟ್ಟೇರುತ್ತಿದ್ದಂತೆ ಹೊಸ ಪ್ರತಿಭೆಗಳಿಗೆ ಅವಕಾಶ ಸಿಗುತ್ತದೆ. ಅಂತಹ ಅವಕಾಶಗಳನ್ನು ಬಳಸಿಕೊಂಡು ಈಗಾಗಲೇ ಅನೇಕರು ಮೇಲೆ ಬಂದಿದ್ದಾರೆ. ಈಗ ಈ ಸಾಲಿಗೆ ಹೊಸ ಸೇರ್ಪಡೆ ಅದಿತಿ ಪ್ರಭುದೇವ. ಯಾರು ಈ ಅದಿತಿ ಎಂದರೆ ನಿಮಗೆ “ಗುಂಡ್ಯಾನಾ ಹೆಂಡ್ತಿ’ ಧಾರಾವಾಹಿ ಬಗ್ಗೆ ಹೇಳಬೇಕು. ಈ ಧಾರಾವಾಹಿ ಮೂಲಕ ಬಣ್ಣದ ಲೋಕಕ್ಕೆ ಬಂದವರು ಅದಿತಿ. ಇಂತಿಪ್ಪ ಅದಿತಿ ಈಗ ಸಿನಿಮಾವೊಂದರಲ್ಲಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಅದು “ಧೈರ್ಯಂ’ ಸಿನಿಮಾದಲ್ಲಿ. ಅಜೇಯ್‌ ರಾವ್‌ ನಾಯಕರಾಗಿರುವ “ಧೈರ್ಯಂ’ ಸಿನಿಮಾದಲ್ಲಿ ಅದಿತಿಗೆ ನಾಯಕಿಯಾಗಿ ಅವಕಾಶ ಸಿಕ್ಕಿದೆ. ಈಗಾಗಲೇ ಬಹುತೇಕ ಚಿತ್ರೀಕರಣ ಕೂಡಾ ಮುಗಿದು ಹೋಗಿದೆ. 

ಅಂದಹಾಗೆ, ಅದಿತಿಯ ಮೂಲ ಹೆಸರು ಸುದೀಪನಾ. ಆದರೆ, ಚಿತ್ರತಂಡ ಮಾತ್ರ ಸುದೀಪನಾ ಬದಲು ಬೇರೆ ಹೆಸರಿಡಬೇಕು ಎಂದು ಆಲೋಚಿಸಿದಾಗ ಅವರಿಗೆ ಅದಿತಿ ಹೆಸರು ಚೆನ್ನಾಗಿದೆ ಹಾಗೂ ಎಲ್ಲರಿಗೂ ಬೇಗ ಅರ್ಥವಾಗುತ್ತದೆ ಎಂಬ ಕಾರಣಕ್ಕೆ ಅದಿತಿ ಎಂದು ನಾಮಕರಣ ಮಾಡಲಾಗಿದೆ. ಅದಿತಿ ದಾವಣಗೆರೆಯ ಹುಡುಗಿ. ಎಂಬಿಎ ಓದಿರುವ ಅದಿತಿ ಕಾಲೇಜು ದಿನಗಳಲ್ಲೇ ಆ್ಯಂಕರಿಂಗ್‌ ಮಾಡುತ್ತಾ “ಆ್ಯಕ್ಟೀವ್‌ ಹುಡುಗಿ’ ಎಂದು ಹೆಸರು ಪಡೆದವರು. ಹೀಗಿರುವಾಗ ಅವರಿಗೆ ಸಿಕ್ಕಿದ್ದು “ಗುಂಡ್ಯಾನಾ ಹೆಂಡ್ತಿ’ ಧಾರಾವಾಹಿ. ಆ ಧಾರಾವಾಹಿ ಕೂಡಾ ಅದಿತಿಗೆ ಒಳ್ಳೆಯ ಹೆಸರು ಕೊಟ್ಟಿತಂತೆ. “ಧೈರ್ಯಂ’ಗೆ ನಾಯಕಿಯ ಹುಡುಕಾಟದಲ್ಲಿದ್ದಾಗ ಚಿತ್ರತಂಡದ ಕಣ್ಣಿಗೆ ಬಿದ್ದ ಅದಿತಿ ಮೂರೂ¾ರು ರೌಂಡ್‌ ಅಡಿಷನ್‌ನಲ್ಲೂ ಪಾಸಾಗಿ ಈಗ ನಾಯಕಿಯಾಗಿ ನಟಿಸಿದ್ದಾರೆ. ಈ ಚಿತ್ರದಲ್ಲಿ ಅದಿತಿ ಸಾಕಷ್ಟು ಕನಸುಗಳನ್ನಿಟ್ಟು ಕೊಂಡಿರುವ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾ ಮೂಲಕ ಮತ್ತಷ್ಟು ಒಳ್ಳೆಯ ಅವಕಾಶಗಳು ಸಿಗುವ ನಿರೀಕ್ಷೆ ಇದೆ. ಅದಿತಿಗೆ ಸಿನಿಮಾ ಬಿಟ್ಟರೆ ಓದುವ, ಹಾಡುವ ಹಾಗೂ ಕಥೆ, ಕವಿತೆ ಬರೆಯುವ ಹವ್ಯಾಸವೂ ಇದೆ ಯಂತೆ.

– ರವಿ ರೈ