ಉ.ಪ್ರ.ಮತದಾರರಿಗೆ ಸ್ಮಾರ್ಟ್‌ ಕನಸು ತೋರಿದ ಸಿಎಂ ಅಖೀಲೇಶ್‌

Team Udayavani, Jan 23, 2017, 10:11 AM IST

ಲಕ್ನೋ: ನಮ್ಮದು ಬಾಯಿಮಾತಿನ ಸರಕಾರವಲ್ಲ, “ಕೆಲಸವಷ್ಟೇ ಮಾತನಾಡುತ್ತದೆ’ ಎಂಬ ಘೋಷವಾಕ್ಯದೊಂದಿಗೆ ಸಮಾಜವಾದಿ ಪಕ್ಷದ ಪ್ರಣಾಳಿಕೆ ಬಿಡುಗಡೆ ಮಾಡಿದ್ದಾರೆ ರಾಷ್ಟ್ರೀಯ ಅಧ್ಯಕ್ಷ ಅಖೀಲೇಶ್‌ ಯಾದವ್‌. ಪಕ್ಷದ ಪರಮೋಚ್ಚ ನೇತಾರರಾದ ಮುಲಾಯಂ ಸಿಂಗ್‌ ಯಾದವ್‌, ಶಿವಪಾಲ್‌ ಯಾದವ್‌ ಮತ್ತು ರಾಮ್‌ ಗೋಪಾಲ್‌ ಯಾದವ್‌ ಅವರ ಅನುಪಸ್ಥಿತಿಯಲ್ಲಿ ಪ್ರಣಾಳಿಕೆ ಬಿಡುಗಡೆ ಮಾಡಿದ ಅವರು, ಬಾಲಕಿಯರಿಗೆ ಸೈಕಲ್‌ ಆಸೆ ತೋರಿಸಿ, ಉತ್ತರ ಪ್ರದೇಶದ ಜನರಿಗೆಲ್ಲಾ ಸ್ಮಾರ್ಟ್‌ ಕನಸುಗಳನ್ನು ಬಿತ್ತಿದ್ದಾರೆ.

ಪ್ರಣಾಳಿಕೆ ಬಿಡುಗಡೆ ಮಾಡುವ ವೇಳೆ ಪ್ರಧಾನಿ ನರೇಂದ್ರ ಮೋದಿ ಅವರ ಅಚ್ಚೇ ದಿನ್‌ ಘೋಷಣೆ ಕುರಿತು ಟೀಕೆ ನಡೆಸಿದ್ದೂ ಅಲ್ಲದೇ, ನಮ್ಮದು ಮಾತನಾಡುವ ಸರಕಾರವಲ್ಲ, ಕೆಲಸ ಮಾಡುವ ಸರಕಾರ ಎಂದು ಪ್ರತಿಪಾದಿಸಿದ್ದಾರೆ. ಸಮಾಜವಾದಿ ಪಕ್ಷದ ಹೆಸರಲ್ಲೇ ನಾನಾ ಯೋಜನೆಗಳನ್ನು ಘೋಷಿಸಿದ್ದಾರೆ. 

ಲ್ಯಾಪ್‌ಟಾಪ್‌, ಕನ್ಯಾ ವಿದ್ಯಾ ಯೋಜನೆ, ಸಮಾಜವಾದಿ ಪಿಂಚಣಿ, ಪೂರ್ವಾಂಚಲ ಎಕ್ಸ್‌ಪ್ರೆಸ್‌ವೇ ಮತ್ತು ಜ್ಞಾನೇಶ್ವರ್‌ ಮಿಶ್ರಾ ಮಾದರಿ ಗ್ರಾಮಗಳ ರಚನೆಯ ಘೋಷಣೆ ಮಾಡಿದ್ದಾರೆ. ರೈತರಿಗೆ ಭಿತ್ತನೆ ಬೀಜ ಮತ್ತು ರಸಗೊಬ್ಬರ ನೀಡುವ ಸಲುವಾಗಿ ಸಮಾಜವಾದಿ ಕಿಸಾನ್‌ ಕೋಶ್‌ ಯೋಜನೆ ಪ್ರಕಟಿಸಿದ್ದಾರೆ. ಹಿಂದಿನ ಐದು ವರ್ಷದ ಸಾಧನೆಗಳನ್ನು ಪ್ರತಿಯೊಬ್ಬರಿಗೂ ಮುಟ್ಟಿಸಿ ಎಂದು ಆಯಾ ಅಭ್ಯರ್ಥಿಗಳಿಗೆ ಸೂಚನೆಯನ್ನೂ ನೀಡಿದ್ದಾರೆ. 

32 ಪುಟಗಳ ಪ್ರಣಾಳಿಕೆಯ ಮುಖಪುಟದಲ್ಲಿ ಮುಲಾಯಂ ಮತ್ತು ಅಖೀಲೇಶ್‌ಗೆ ಸ್ಥಾನ ಸಿಕ್ಕಿದೆ. ಆದರೆ ಚಿಕ್ಕಪ್ಪ ಶಿವಪಾಲ್‌ ಯಾದವ್‌ ಭಾವಚಿತ್ರದ ಬಳಕೆ ಮಾಡಿಲ್ಲ. ಘೋಷಣೆ ವೇಳೆ ಮುಲಾಯಂ ಸಿಂಗ್‌ ಯಾದವ್‌ ಕಾಣಿಸಿಕೊಳ್ಳದೇ ಹೋದರೂ, ಎಲ್ಲ ಮುಗಿದ ಮೇಲೆ ಬಂದರು. ಟ್ರಾಫಿಕ್‌ ಕಿರಿಕಿರಿಯಿಂದಾಗಿ ನಿಗದಿತ ಸಮಯಕ್ಕೆ ಬರಲಾಗಲಿಲ್ಲವೆಂಬ ಸಬೂಬು ಅವರದ್ದಾಗಿತ್ತು. ಅಲ್ಲದೆ ಆರಂಭದಿಂದಲೂ ಆಂತರಿಕ ಭಿನ್ನಮತದ ಶಮನಕ್ಕೆ ಮಧ್ಯಸ್ಥಿಕೆ ವಹಿಸಿದ್ದ ಅಜಂ ಖಾನ್‌ ಅವರೇ ರವಿವಾರ ಕೂಡ ನೇತಾಜಿ ನಿವಾಸಕ್ಕೆ ಹೋಗಿ ಅವರನ್ನು ಕರೆತಂದರು. 

ಪಂಜಾಬ್‌ನಲ್ಲಿ ಬಿಜೆಪಿಯ ಪ್ರಣಾಳಿಕೆ: ಉತ್ತರ ಪ್ರದೇಶದ ಜತೆಗೆ ಪಂಜಾಬ್‌ನ ವಿಧಾನಸಭೆ ಚುನಾವಣಾ ರಂಗು ಕೂಡ ಏರುತ್ತಿದ್ದು, ಬಿಜೆಪಿ ಪ್ರಣಾಳಿಕೆ ಬಿಡುಗಡೆ ಮಾಡಿದೆ. ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟಿÉ ಅವರು, ರವಿವಾರ ಪ್ರಣಾಳಿಕೆಗಳಲ್ಲಿನ ಭರವಸೆಗಳ ಪಟ್ಟಿ ಬಿಡುಗಡೆಗೊಳಿಸಿದ್ದಾರೆ. ಕಡಿಮೆ ದರದಲ್ಲಿ ಸಕ್ಕರೆ ಮತ್ತು ತುಪ್ಪ, ಬಡವರಿಗೆ ಮನೆ, ದಲಿತರು ಮತ್ತು ಹಿಂದುಳಿದವರಿಗೆ ಭೂಮಿ, ಉಗ್ರಗಾಮಿಗಳ ಉಪಟಳದಿಂದ ನಿಧನ ಹೊಂದಿದವರಿಗೆ 5 ಲಕ್ಷ ರೂ. ಪರಿಹಾರದಂಥ ಘೋಷಣೆ ಮಾಡಿದ್ದಾರೆ. 

ಬಿಜೆಪಿ ಪಟ್ಟಿಯಲ್ಲಿ ರಾಜನಾಥ್‌ ಪುತ್ರ, ರೀಟಾ ಬಹುಗುಣ ಜೋಶಿ
ಲಕ್ನೋ: ಉತ್ತರ ಪ್ರದೇಶ ಚುನಾವಣೆಗಾಗಿ ಬಿಜೆಪಿ ತನ್ನ ಎರಡನೇ ಪಟ್ಟಿಯನ್ನು ಬಿಡುಗಡೆ ಮಾಡಿದ್ದು, ಇದರಲ್ಲಿ ಕೇಂದ್ರ ಗೃಹ ಸಚಿವ ರಾಜನಾಥ್‌ ಸಿಂಗ್‌ ಪುತ್ರ ಪಂಕಜ್‌ ಸಿಂಗ್‌ ಮತ್ತು ಕಾಂಗ್ರೆಸ್‌ನಿಂದ ಬಿಜೆಪಿಗೆ ಬಂದ ರೀಟಾ ಬಹುಗುಣ ಜೋಶಿ ಅವರಿಗೆ ಟಿಕೆಟ್‌ ನೀಡಲಾಗಿದೆ. ರವಿವಾರ ಒಟ್ಟಾರೆಯಾಗಿ 149 ಸ್ಥಾನಗಳ ಅಭ್ಯರ್ಥಿ ಪಟ್ಟಿ ಬಿಡುಗಡೆಗೊಳಿಸಲಾಗಿದೆ. 

ಪಂಕಜ್‌ ಸಿಂಗ್‌ಗೆ ನೊಯ್ಡಾ, ಸ್ಥಳೀಯ ಬಿಜೆಪಿ ನಾಯಕ ಹುಕುಂ ಸಿಂಗ್‌ ಪುತ್ರಿ ಮೃಗಾಂಕಾ ಅವರಿಗೆ ಕೈರಾಣಾ, ರೀಟಾ ಬಹುಗುಣ ಜೋಶಿಗೆ ಲಕ್ನೋ ವಿಧಾನಸಭೆ ಕ್ಷೇತ್ರಗಳಲ್ಲಿ ಟಿಕೆಟ್‌ ಒದಗಿಸಲಾಗಿದೆ. ಇತ್ತೀಚೆಗೆ ಪ್ರಧಾನಿ  ಮೋದಿ, ಕುಟುಂಬ ಸದಸ್ಯರಿಗೆ ಟಿಕೆಟ್‌ ಕೇಳಬೇಡಿ ಎಂದು ಹುಕುಂ ಹೊರಡಿಸಿದ್ದರು. 

ಪ್ರಣಾಳಿಕೆಯ ಪ್ರಮುಖ ಅಂಶಗಳು
– ರೈತರ ನಿಧಿ ಸ್ಥಾಪನೆ, ಸಮಾಜವಾದಿ ಕಿಸಾನ್‌ ಕೋಶ್‌ನಲ್ಲಿ ಬೀಜ, ಗೊಬ್ಬರ ಖರೀದಿಗೆ ಅವಕಾಶ
– ಗ್ರಾಮೀಣ ಪ್ರದೇಶಗಳಿಗೆ 24 ಗಂಟೆ ವಿದ್ಯುತ್‌
– ಸಮಾಜವಾದಿ ಸ್ಮಾರ್ಟ್‌ಫೋನ್‌ ಯೋಜನೆಯಡಿ ಎಲ್ಲರಿಗೂ ಸ್ಮಾರ್ಟ್‌ಫೋನ್‌
– ಸಮಾಜವಾದಿ ಪಿಂಚಣಿ ಯೋಜನೆಯಡಿ ಒಂದು ಕೋಟಿ ಮಂದಿಗೆ 1 ಸಾವಿರ ರೂ. ಪಿಂಚಣಿ
– 9ರಿಂದ 12ನೇ ತರಗತಿ ಓದುತ್ತಿರುವ ಹೆಣ್ಣು ಮಕ್ಕಳಿಗೆ ಉಚಿತ ಬೈಸಿಕಲ್‌
– ಬಡ ಮಹಿಳೆಯರಿಗೆ ಉಚಿತ ಪ್ರಶರ್‌ ಕುಕ್ಕರ್‌
– ಬಡ ವಿದ್ಯಾರ್ಥಿಗಳಿಗೆ ಉಚಿತ ತುಪ್ಪ, ಹಾಲಿನ ಪೌಡರ್‌
– ಗರ್ಭಿಣಿಯರಿಗೆ ಪೌಷ್ಟಿಕ ಆಹಾರ ಸೌಲಭ್ಯ
– ಆಗ್ರಾ, ಕಾನ್ಪುರ, ವಾರಾಣಸಿ ಮತ್ತು ಮೀರತ್‌ನಲ್ಲಿ ಮೆಟ್ರೋ ವ್ಯವಸ್ಥೆ
– 60 ಲಕ್ಷಕ್ಕಿಂತ ಕಡಿಮೆ ವಯಸ್ಸಿನ ವಕೀಲರು ದಿಢೀರ್‌ ನಿಧನ ಹೊಂದಿದರೆ 10 ಲಕ್ಷ ರೂ.
– ಕ್ರೀಡಾ ಉತ್ತೇಜನಕ್ಕೆ ಸಮಾಜವಾದಿ ಕ್ರೀಡಾ ಶಾಲೆ