ಕಂಬಳ ತಡೆಯಲು ಸಾಧ್ಯವಿಲ್ಲ : ಖಾದರ್‌

Team Udayavani, Jan 24, 2017, 3:45 AM IST

ಬೆಂಗಳೂರು: ಜನವರಿ 28ರಂದು ನಡೆಯುವ ವಿಚಾರಣೆಯಲ್ಲಿ ಹೈ ಕೋರ್ಟ್‌ ಕಂಬಳ ನಿಷೇಧವನ್ನು ಮುಂದುವರೆಸಿದರೆ, ರಾಜ್ಯ ಸರ್ಕಾರ ಸೂಕ್ತ ಕಾನೂನು ತರುವ ಕುರಿತಂತೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೊಂದಿಗೆ ಕರಾವಳಿ ಭಾಗದ ಸಚಿವರು ಚರ್ಚಿಸಿ ತೀರ್ಮಾನ ಕೈಗೊಳ್ಳುತ್ತೇವೆ ಎಂದು ಆಹಾರ ಮತ್ತು ನಾಗರೀಕ ಪೂರೈಕೆ ಸಚಿವ ಯು.ಟಿ.ಖಾದರ್‌ ಹೇಳಿದರು.

“ಉದಯವಾಣಿ’ಯೊಂದಿಗೆ ಮಾತನಾಡಿದ ಅವರು, ಕಂಬಳ ಮತ್ತು ಯಕ್ಷಗಾನ ಸಂಸ್ಕೃತಿಯ ಪ್ರತೀಕ. ಕಂಬಳ
ಆಚರಣೆಯನ್ನು ಯಾರಿಂದಲೂ ತಡೆಯಲು ಸಾಧ್ಯವಿಲ್ಲ ಎಂದರು. ಕರಾವಳಿ ಭಾಗದ ಇನ್ನಿಬ್ಬರು ಸಚಿವರಾದ
ರಮಾನಾಥ ರೈ ಮತ್ತು ಪ್ರಮೋದ್‌ ಮಧ್ವರಾಜ್‌ ಕೂಡ ಕಂಬಳ ಕ್ರೀಡೆಗೆ ಬೆಂಬಲ ಸೂಚಿಸಿ ಮಾತನಾಡಿದ್ದಾರೆ. ಕಂಬಳ ಸಮಿತಿ ಕೋರ್ಟ್‌ನಲ್ಲಿ ವಾದ ಮಾಡಲು ಪೂರಕ ಮಾಹಿತಿ ಮತ್ತು ಸಹಕಾರವನ್ನು ರಾಜ್ಯ ಸರ್ಕಾರ ಈಗಾಗಲೇ ನೀಡಿದೆ. ಕೋರ್ಟ್‌ ಆದೇಶ ನೋಡಿಕೊಂಡು ಮುಂದಿನ ಕ್ರಮದ ಬಗ್ಗೆ ಮುಖ್ಯಮಂತ್ರಿ ಜೊತೆಗೆ ಚರ್ಚಿಸಿ ತೀರ್ಮಾನ ಕೈಗೊಳ್ಳುವುದಾಗಿ ರಮಾನಾಥ ರೈ ಹೇಳಿದ್ದಾರೆ.

ಹೈಕೋರ್ಟ್‌ಗೆ ಮನವಿ: ಕಂಬಳಕ್ಕೆ ನೀಡಿರುವ ತಡೆಯಾಜ್ಞೆ ವಿಚಾರಣೆ ಹೈಕೋರ್ಟ್‌ನಲ್ಲಿ ಜ. 30ಕ್ಕೆ ನಿಗದಿಯಾಗಿದ್ದು, ಆದ್ಯತೆಯ ನೆಲೆಯಲ್ಲಿ ಆ ವಿಚಾರಣೆಯನ್ನು ದಿನಾಂಕಕ್ಕೆ ಮೊದಲೇ ನಡೆಸಲು ನ್ಯಾಯಾಲಯಕ್ಕೆ ಮನವಿ ಮಾಡಲಾಗಿದೆ ಎಂದು ದಕ್ಷಿಣ ಕನ್ನಡ ಜಿಲ್ಲೆಯ ಮೂಡಬಿದಿರೆ ಕಂಬಳ ಸಮಿತಿ ಹೇಳಿದೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಕಂಬಳ ಸಮಿತಿಯ ಅಧ್ಯಕ್ಷ ಶಾಸಕ ಕೆ.ಅಭಯಚಂದ್ರ ಜೈನ್‌, ಕಂಬಳದ ಪರವಾಗಿ ತೀರ್ಪು ಬಂದರೆ ವಿಜಯೋತ್ಸವ ಕಂಬಳ ಅಥವಾ ಕೋರ್ಟ್‌ ಅವಕಾಶ ನೀಡದಿದ್ದರೆ ಹಕ್ಕೊತ್ತಾಯ ಶಾಂತಿಯುತ ಪ್ರತಿಭಟನಾ ಮೆರವಣಿಗೆಯನ್ನು ಜ. 28ರಂದು ಆಯೋಜಿಸಲಾಗಿದೆ ಎಂದರು.

ಕಂಬಳಕ್ಕೆ ಆಗ್ರಹಿಸಿ ತುಳುನಾಡ ರಕ್ಷಣಾ ವೇದಿಕೆ ಜ. 24ರಂದು ಮಂಗಳೂರು ಡಿಸಿ ಕಚೇರಿ ಮುಂಭಾಗ ಪ್ರತಿಭಟನೆ ನಡೆಸಲಿದೆ.