ವನಿತಾ ಡಬಲ್ಸ್‌: ಸ್ಯಾಂಡ್ಸ್‌-ಸಫ‌ರೋವಾ ಚಾಂಪಿಯನ್ಸ್‌

Team Udayavani, Jan 28, 2017, 3:45 AM IST

ಮೆಲ್ಬರ್ನ್: ಅಮೆರಿಕದ ಬೆಥನಿ ಮಾಟೆಕ್‌ ಸ್ಯಾಂಡ್ಸ್‌-ಜೆಕ್‌ ಆಟಗಾರ್ತಿ ಲೂಸಿ ಸಫ‌ರೋವಾ ಸೇರಿ ಕೊಂಡು 2ನೇ ಬಾರಿಗೆ ಆಸ್ಟ್ರೇಲಿಯನ್‌ ಓಪನ್‌ ವನಿತಾ ಡಬಲ್ಸ್‌ ಪ್ರಶಸ್ತಿ ಜಯಿಸಿದ್ದಾರೆ.

ಶುಕ್ರವಾರ ನಡೆದ ಫೈನಲ್‌ನಲ್ಲಿ 2ನೇ ಶ್ರೇಯಾಂಕದ ಬೆಥನಿ- ಸಫ‌ರೋವಾ ಸೇರಿಕೊಂಡು ಆಂಡ್ರಿಯಾ ಲವಕೋವಾ (ಜೆಕ್‌ ಗಣರಾಜ್ಯ)-ಪೆಂಗ್‌ ಶುಯಿ (ಚೀನ) ಜೋಡಿಗೆ 6-7 (3), 6-3, 6-3 ಅಂತರದ ಸೋಲುಣಿಸಿದರು. ಇದ ರೊಂದಿಗೆ “ಮೆಲ್ಬರ್ನ್ ಪಾರ್ಕ್‌’ ನಲ್ಲಿ ಬೆಥನಿ-ಸಫ‌ರೋವಾ ಜೋಡಿಯ ಅಜೇಯ ಅಭಿಯಾನ 12 ಪಂದ್ಯ ಗಳಿಗೆ ವಿಸ್ತರಿಸಿತು. ಇದೊಂದು ದಾಖಲೆ. ಇವರಿಬ್ಬರು 2015ರಲ್ಲೂ ಇಲ್ಲಿ ಚಾಂಪಿಯನ್‌ ಆಗಿದ್ದರು. ಆದರೆ ಕಳೆದ ವರ್ಷ ಈ ಜೋಡಿ ಕಣಕ್ಕಿಳಿದಿರಲಿಲ್ಲ. ಸಫ‌ರೋವಾ ಗಾಯಾಳಾದದ್ದೇ ಇದಕ್ಕೆ ಕಾರಣ.

ಇದು ಬೆಥನಿ ಮಾಟೆಕ್‌ ಸ್ಯಾಂಡ್ಸ್‌- ಲೂಸಿ ಸಫ‌ರೋವಾ ಜತೆಯಾಗಿ ಗೆದ್ದ 4ನೇ ಗ್ರಾನ್‌ಸ್ಲಾಮ್‌ ಪ್ರಶಸ್ತಿ. 2015ರ ಫ್ರೆಂಚ್‌ ಓಪನ್‌ ಹಾಗೂ ಕಳೆದ ವರ್ಷದ ಯುಎಸ್‌ ಓಪನ್‌ ಕೂಟದಲ್ಲೂ ಇವರು ಚಾಂಪಿಯನ್‌ ಆಗಿದ್ದರು.

ಶುಕ್ರವಾರದ ಸಾಧನೆಗಾಗಿ ಈ ಆಟಗಾರ್ತಿಯರು 660,000 ಆಸ್ಟ್ರೇಲಿಯನ್‌ ಡಾಲರ್‌ ಮೊತ್ತವನ್ನು ಸಮನಾಗಿ ಹಂಚಿಕೊಂಡರು.