ಶ್ರೀಮಂತರಿಗೆ ದುಬಾರಿ,ಬಡವರಿಗೆ ಅಚ್ಛೇ ದಿನ್

Team Udayavani, Feb 1, 2017, 5:11 PM IST

ವಿತ್ತ ಸಚಿವ ಅರುಣ್ ಜೇಟ್ಲಿ ಅವರು ಬುಧವಾರ ಲೋಕಸಭೆಯಲ್ಲಿ ವಿರೋಧಪಕ್ಷಗಳ ಆಕ್ಷೇಪದ ನಡುವೆಯೇ 2017 18ನೇ ಸಾಲಿನ 21.47 ಲಕ್ಷ ಕೋಟಿ ರೂಪಾಯಿ ಗಾತ್ರದ ಬಜೆಟ್ ಅನ್ನು ಮಂಡಿಸಿದ್ದರು. ಈ ಬಾರಿ ಐತಿಹಾಸಿಕ ಎಂಬಂತೆ ಏಕಕಾಲದಲ್ಲಿ ರೈಲ್ವೆ ಮತ್ತು ಕೇಂದ್ರ ಸಾಮಾನ್ಯ ಬಜೆಟ್ ಮಂಡನೆಯಾಗಿದೆ. ರಕ್ಷಣಾ ಇಲಾಖೆಗೆ 2.74 ಲಕ್ಷ ಕೋಟಿ, ಕೃಷಿ ಮತ್ತು ರೈತರ ಕಲ್ಯಾಣಕ್ಕಾಗಿ 51,026 ಕೋಟಿ ರೂಪಾಯಿ ಅನುದಾನ ಮೀಸಲಿಟ್ಟಿದೆ.  ಹೌದು ಪ್ರಸಕ್ತ ಸಾಲಿನ ಬಜೆಟ್ ಗ್ರಾಮೀಣ ಪ್ರದೇಶದವರಿಗೆ ಅಚ್ಛೇ ದಿನ್ ತರುವಂತಹದ್ದಾಗಿದೆ.(ಯಾವುದು ದುಬಾರಿ, ಯಾವುದು ಅಗ್ಗ ಗೊತ್ತಾ) ರೈತರು, ಗ್ರಾಮೀಣ ಜನತೆ, ಯುವಜನತೆ, ಬಡವರು, ಮೂಲಸೌಕರ್ಯ, ಹಣಕಾಸು ಕ್ಷೇತ್ರ, ಡಿಜಿಟಲ್ ಎಕಾನಮಿ, ಪಬ್ಲಿಕ್ ಸರ್ವಿಸ್, ಆರ್ಥಿಕ ವ್ಯವಸ್ಥೆ, ತೆರಿಗೆ ನಿರ್ವಹಣೆ ಸೇರಿದಂತೆ  ಒಟ್ಟು 10 ಪ್ರಮುಖ ಗುರಿಯನ್ನು ಇಟ್ಟುಕೊಂಡ ಬಜೆಟ್ ಇದಾಗಿದೆ. ಏಪ್ರಿಲ್ ನಿಂದ ನಗದು ವ್ಯವಹಾರದ ಮಿತಿ 3ಲಕ್ಷಕ್ಕೆ ಸೀಮಿತಗೊಳಿಸಲಾಗಿದೆ. ಅಲ್ಲದೇ 3ಲಕ್ಷದವರೆಗೆ ಆದಾಯ ತೆರಿಗೆ ಇಲ್ಲ. 3ಲಕ್ಷದಿಂದ 5ಲಕ್ಷದವರೆಗೆ ಶೇ.5ರಷ್ಟು ತೆರಿಗೆ ಪಾವತಿಸಬೇಕಾಗಿದೆ. ರಾಜಕೀಯ ಪಕ್ಷಗಳ ದೇಣಿಗೆಗೆ ಇಲೆಕ್ಟೋರಲ್‌ ಬಾಂಡ್‌ ಗಳನ್ನು ನೀಡುವ ಸಲುವಾಗಿ ಆರ್‌ಬಿಐ ಕಾಯಿದೆಗೆ ತಿದ್ದುಪಡಿ ತರಲು ಉದ್ದೇಶಿಸಲಾಗಿದೆ. ರಾಜಕೀಯ ಪಕ್ಷಗಳಿಗೆ ನೀಡಬಹುದಾದ ಗರಿಷ್ಠ ನಗದು ದೇಣಿಗೆಗೆ ಈಗಿರುವ 20,000 ರೂ.ಗಳ ಮಿತಿಯನ್ನು  2,000 ರೂ. ಮಿತಿಗೆ ಇಳಿಸಲಾಗಿದೆ. ರಾಜಕೀಯ ಪಕ್ಷಗಳಿಗೆ 2,000 ರೂ. ಮೀರಿದ ದೇಣಿಗೆಯನ್ನು ಇನ್ನು ಮುಂದೆ ಚೆಕ್‌ ಹಾಗೂ ಇ-ವಹಿವಾಟಿನ ಮೂಲಕ ನೀಡಬೇಕಾಗುತ್ತದೆ. ಮದ್ಯದ ದೊರೆ ವಿಜಯ್ ಮಲ್ಯ ಹಾಗೂ ಲಲಿತ್ ಮೋದಿಯಂತಹ ಬಹುಕೋಟಿ ಸುಸ್ತಿದಾರರ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳುವ ನಿಟ್ಟಿನಲ್ಲಿ ಕೇಂದ್ರ ಹೊಸ ಕಾಯ್ದೆಯನ್ನು ಜಾರಿಗೆ ತರಲು ಚಿಂತನೆ ನಡೆಸಿದೆ.