ಆಟೋದಿಂದ ಫೋಟೋಗೆ!

Team Udayavani, Feb 3, 2017, 3:45 AM IST

“ನೋಡೋಕೆ ನೀನು ಯಶ್‌ ತರಹ ಇದ್ದೀಯಾ. ನೀನ್ಯಾಕೆ ಹೀರೋ ಆಗಬಾರದು’ ಹೀಗೆ ಅನೇಕರು ಗಿರೀಶ್‌ಗೆ ಹೇಳಿದ್ದಾರೆ. ಹೀಗೆ ಹೇಳುತ್ತಲೇ ಗಿರೀಶ್‌ ಒಳಗಿನ ಸಿನಿಮಾ ಆಸೆ ಮತ್ತಷ್ಟು ಬೆಳೆಯುತ್ತಾ ಹೋಗಿದೆ. ತಾನ್ಯಾಕೆ ಹೀರೋ ಆಗಬಾರದು, ಸಿನಿಮಾದಲ್ಲಿ ನಟಿಸಬಾರದು ಎಂದು ಕನಸು ಕಂಡಿದ್ದ ಗಿರೀಶ್‌ ಈಗ ಹೀರೋ ಆಗಿದ್ದಾರೆ. ಅದು “ಸ್ಟೈಲ್‌ರಾಜ’ ಚಿತ್ರದ ಮೂಲಕ. ಇಂದು ತೆರೆಕಾಣುತ್ತಿರುವ “ಸ್ಟೈಲ್‌ರಾಜ’ ಸಿನಿಮಾದ ಮೂಲಕ ಗಿರೀಶ್‌ ಹೀರೋ ಆಗಿ ಎಂಟ್ರಿಕೊಡುತ್ತಿದ್ದಾರೆ. 

ಈಗಾಗಲೇ ಚಿತ್ರರಂಗಕ್ಕೆ ಬೇರೆ ಬೇರೆ ಕ್ಷೇತ್ರದ ಮಂದಿ ಬಂದಿದ್ದಾರೆ. ಟ್ಯಾಲೆಂಟ್‌ ಹಾಗೂ ಆಸಕ್ತಿ ಇದ್ದವರು ಬರಬಹುದಾದ ಏಕೈಕ ಕ್ಷೇತ್ರವೆಂದರೆ ಸಿನಿಮಾ. ಅದೇ ಕಾರಣದಿಂದ ಗಿರೀಶ್‌ ಕೂಡಾ ಸಿನಿಮಾಕ್ಕೆ ಬಂದಿದ್ದಾರೆ. ಗಿರೀಶ್‌ ಆಟೋ ಓಡಿಸುತ್ತಿದ್ದವರು. ಸುಮಾರು ಐದು ವರ್ಷಗಳ ಕಾಲ ಆಟೋ ಓಡಿಸುತ್ತಿದ್ದ ಗಿರೀಶ್‌ ಈಗ ಹೀರೋ ಆಗಲು ಕಾರಣ ಅವರ ಸ್ನೇಹಿತರಾದ ರಮೇಶ್‌ ಮತ್ತು ಹರೀಶ್‌. ಅವರ ಪ್ರೋತ್ಸಾಹದಿಂದ ಗಿರೀಶ್‌ ಹೀರೋ ಆಗಿದ್ದಾರೆ. ಸಿನಿಮಾಕ್ಕಾಗಿ ಡ್ಯಾನ್ಸ್‌, ಫೈಟ್‌ ಕೂಡಾ ಕಲಿತಿರುವ ಗಿರೀಶ್‌ಗೆ ಈ ಸಿನಿಮಾ ಮೂಲಕ ಚಿತ್ರರಂಗದಲ್ಲಿ ನೆಲೆನಿಲ್ಲುವ ವಿಶ್ವಾಸ ಕೂಡಾ ಇದೆ. 

ಚಿತ್ರದಲ್ಲಿ ಗಿರೀಶ್‌ ಹಳ್ಳಿಯಿಂದ ಬೆಂಗಳೂರಿಗೆ ಬರುವ ಮುಗ್ಧ ಹುಡುಗನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಏನೂ ಗೊತ್ತಿಲ್ಲದೇ ಬೆಂಗಳೂರಿಗೆ ಬರುವ ಹುಡುಗ ಪ್ರೀತಿಯ ಬಲೆಗೆ ಬಿದ್ದು ಏನಾಗುತ್ತಾನೆ, ಜೀವನ ಹೇಗೆ ಪಾಠ ಕಲಿಸುತ್ತದೆ ಎಂಬೆಲ್ಲಾ ಅಂಶಗಳ ಮೂಲಕ ಇವರ ಪಾತ್ರ ಸಾಗುತ್ತದೆಯಂತೆ. “ಸ್ನೇಹಿತರೆಲ್ಲರ ಸಹಕಾರದಿಂದ ಸಿನಿಮಾದಲ್ಲಿ ನಟಿಸಿದ್ದೇನೆ. ಒಳ್ಳೆಯ ಪಾತ್ರ ಕೂಡಾ ಸಿಕ್ಕಿದೆ. ಈ ಸಿನಿಮಾ ಮೂಲಕ ಚಿತ್ರರಂಗದಲ್ಲಿ ನೆಲೆನಿಲ್ಲುವ ವಿಶ್ವಾಸವಿದೆ’ ಎನ್ನುತ್ತಾರೆ ಗಿರೀಶ್‌.

– ರವಿ ರೈ