ಪೇಸ್‌ ವಿಶ್ವದಾಖಲೆಯ ಕನಸು ಭಗ್ನ

Team Udayavani, Feb 5, 2017, 3:45 AM IST

ಡೇವಿಸ್‌: ಡಬಲ್ಸ್‌ನಲ್ಲಿ ನ್ಯೂಜಿಲ್ಯಾಂಡ್‌ ತಿರುಗೇಟು
ಪುಣೆ: ನ್ಯೂಜಿಲ್ಯಾಂಡಿನ ಆರ್ಟೆಮ್‌ ಸಿತಾಕ್‌ ಮತ್ತು ಮೈಕಲ್‌ ವೀನಸ್‌ ಅವರು ಡೇವಿಸ್‌ ಕಪ್‌ ಏಶ್ಯ ಓಶಿಯಾನಿಯಾ ಬಣ ಒಂದರ ಡಬಲ್ಸ್‌ ಪಂದ್ಯದಲ್ಲಿ ಲಿಯಾಂಡರ್‌ ಪೇಸ್‌ ಮತ್ತು ವಿಷ್ಣುವರ್ಧನ್‌ ಅವರನ್ನು ನಾಲ್ಕು ಸೆಟ್‌ಗಳ ಮ್ಯಾರಥಾನ್‌ ಹೋರಾಟದಲ್ಲಿ ಸೋಲಿಸಿ ತಿರುಗೇಟು ನೀಡುವಲ್ಲಿ ಯಶಸ್ವಿಯಾಗಿದೆ. ಈ ಸೋಲಿನಿಂದ ಪೇಸ್‌ ಅವರ ಡಬಲ್ಸ್‌ನಲ್ಲಿ ವಿಶ್ವದಾಖಲೆಗೈಯುವ ಕನಸು ನುಚ್ಚುನೂರಾಯಿತು.

ಈ ಗೆಲುವಿನಿಂದ ನ್ಯೂಜಿಲ್ಯಾಂಡ್‌ ಈ ಹೋರಾಟ ಗೆಲ್ಲುವ ಆಸೆಯನ್ನು ಜೀವಂತವಿರಿಸಿಕೊಂಡಿದೆ. ಮೊದಲ ದಿನ ನಡೆದ ಎರಡು ಸಿಂಗಲ್ಸ್‌ ಪಂದ್ಯ ಗೆದ್ದಿರುವ ಭಾರತ ಸದ್ಯ 2-1 ಮುನ್ನಡೆಯಲ್ಲಿದೆ. ರವಿವಾರ ಎರಡು ಮರು ಸಿಂಗಲ್ಸ್‌ ಪಂದ್ಯ ನಡೆಯಲಿದ್ದು ಒಂದರಲ್ಲಿ ಗೆದ್ದರೆ ಭಾರತ ಹೋರಾಟದಲ್ಲಿ ಗೆಲುವು ಕಂಡು ದ್ವಿತೀಯ ಸುತ್ತಿಗೇರಲಿದೆ. ಆದರೆ ನ್ಯೂಜಿಲ್ಯಾಂಡ್‌ ಮರು ಸಿಂಗಲ್ಸ್‌ನ ಎರಡೂ ಪಂದ್ಯ ಗೆಲ್ಲಬೇಕಾಗಿದೆ.

ರವಿವಾರದ ಮರು ಸಿಂಗಲ್ಸ್‌ ಪಂದ್ಯದಲ್ಲಿ ರಾಮ್‌ಕುಮಾರ್‌ ರಾಮನಾಥನ್‌ ಅವರು ಫಿನ್‌ ಟಿಯರ್‌ನೆà ಅವರನ್ನು ಎದುರಿಸಲಿದ್ದಾರೆ. ಇನ್ನೊಂದು ಮರು ಸಿಂಗಲ್ಸ್‌ ಪಂದ್ಯದಲ್ಲಿ ಯೂಕಿ ಭಾಂಬ್ರಿ ಅವರು ಜೋಸ್‌ ಸ್ಟಾಥಂ ಅವರನ್ನು ಎದುರಿಸಲಿದ್ದಾರೆ. ಶುಕ್ರವಾರ ನಡೆದಿದ್ದ ಮೊದಲೆರಡು ಸಿಂಗಲ್ಸ್‌ ಪಂದ್ಯಗಳಲ್ಲಿ ಯೂಕಿ ಭಾಂಬ್ರಿ ಮತ್ತು ರಾಮ್‌ಕುಮಾರ್‌ ರಾಮನಾಥನ್‌ ನೇರ ಸೆಟ್‌ಗಳ ಜಯ ಸಾಧಿಸಿ ಭಾರತಕ್ಕೆ 2-0 ಮುನ್ನಡೆ ದೊರಕಿಸಿಕೊಟ್ಟಿದ್ದರು.

ಡಬಲ್ಸ್‌ನಲ್ಲಿ ಆಘಾತ
ಡಬಲ್ಸ್‌ನ ಫೇವರಿಟ್‌ ಆಟಗಾರ ಪೇಸ್‌ ಈ ಬಾರಿ ವಿಷ್ಣುವರ್ಧನ್‌ ಜತೆಗೂಡಿ ಆಡಿ ಮೊದಲ ಸೆಟ್‌ ಸುಲಭವಾಗಿ ಗೆದ್ದರು. ಆದರೆ ಎದುರಾಳಿಗಳಾದ ನ್ಯೂಜಿಲ್ಯಾಂಡಿನ ಸಿತಾಕ್‌ ಮತ್ತು ವೀನಸ್‌ ಅದ್ಭುತ ಹೋರಾಟ ಸಂಘಟಿಸಿ ಸತತ ಮೂರು ಸೆಟ್‌ ಗೆದ್ದು ಪಂದ್ಯ ಗೆಲ್ಲುವಲ್ಲಿ ಯಶಸ್ವಿಯಾದರು. ಎರಡೂವರೆ ತಾಸಿನ ಈ ಹೋರಾಟವನ್ನು ಅವರು 3-6, 6-3, 7-6 (8-6), 6-3 ಸೆಟ್‌ಗಳಿಂದ ಗೆದ್ದರು.

ಈ ಸೋಲಿನಿಂದ 43ರ ಹರೆಯದ ಪೇಸ್‌ ಅವರಿಗೆ ಡಬಲ್ಸ್‌ನಲ್ಲಿ 43ನೇ ಜಯ ದಾಖಲಿಸಲು ಸಾಧ್ಯವಾಗಲಿಲ್ಲ. ಅವರೀಗ 42 ಗೆಲುವಿನೊಂದಿಗೆ ಇಟಲಿಯ ನಿಕೋಲ ಪೀಟ್ರಾಂಜೆಲಿ ಜತೆ ದಾಖಲೆ ಹಂಚಿಕೊಂಡಿದ್ದಾರೆ. ಒಂದು ವೇಳೆ ಈ ಪಂದ್ಯದಲ್ಲಿ ಜಯ ಸಾಧಿಸಿದ್ದರೆ ಡೇವಿಸ್‌ ಕಪ್‌ ಇತಿಹಾಸದ ಗರಿಷ್ಠ ಸಂಖ್ಯೆಯ ಡಬಲ್ಸ್‌ ಪಂದ್ಯ ಗೆದ್ದ ಗೌರವಕ್ಕೆ ಪೇಸ್‌ ಪಾತ್ರರಾಗುತ್ತಿದ್ದರು.