ಕಾರವಾರ- ಗೋವಾ ಕಡಲಲ್ಲಿ ನೌಕಾ ಸಮರಾಭ್ಯಾಸ ಆರಂಭ

Team Udayavani, Feb 5, 2017, 3:45 AM IST

ಕಾರವಾರ: ಇಲ್ಲಿನ ನೌಕಾನೆಲೆ ವ್ಯಾಪ್ತಿಯ ಆಳ ಸಮುದ್ರದಲ್ಲಿ ಭಾರತದ ನೌಕಾಪಡೆಯ 12ಯುದ್ಧ ನೌಕೆಗಳು
ಸಮರಾಭ್ಯಾಸದಲ್ಲಿ ನಿರತವಾಗಿವೆ. ಸಮರಾಭ್ಯಾಸ ಏಳು ದಿನಗಳ ಕಾಲ ನಡೆಯಲಿದೆ ಎಂದು ನೌಕಾನೆಲೆಯ
ಮೂಲಗಳು ತಿಳಿಸಿವೆ. ಭಾರತದ ಪೂರ್ವ ಮತ್ತು ಪಶ್ಚಿಮ ಕರಾವಳಿಯ ಯುದ್ಧನೌಕೆಗಳು ಇಲ್ಲಿಗೆ 200 ನಾಟಿಕಲ್‌ ಮೈಲ್‌ ದೂರದ ಸಮುದ್ರದಲ್ಲಿ ಸಮರಾಭ್ಯಾಸ ಪ್ರಾರಂಭಿಸಿವೆ. ಐಎನ್‌ಎಸ್‌ ವಿಕ್ರಮಾದಿತ್ಯ ಸಮರಾಭ್ಯಾಸಕ್ಕೆ ಸಾಥ್‌
ನೀಡಿದೆ. ಈ ಮುನ್ನ ವಿಕ್ರಮಾಧಿದಿತ್ಯ ಸಮರಾಭ್ಯಾಸದಲ್ಲಿ ಭಾಗವಹಿಸುವುದಿಲ್ಲ ಎನ್ನಲಾಗಿತ್ತು. ಆದರೆ ನೌಕಾಪಡೆ
ತನ್ನೆಲ್ಲ ಸಾಮರ್ಥ್ಯವನ್ನು ಪರೀಕ್ಷೆಗೆ ಒಡ್ಡಿಕೊಳ್ಳಲು ನಿರ್ಧರಿಸಿದೆ.

ನೌಕಾ ಸೈನಿಕರ ಸಾಮರ್ಥ್ಯ ಮತ್ತು ಸಮುದ್ರದ ಮಾರ್ಗದಲ್ಲಿ ಬಳಸುವ ಅಸ್ತ್ರಗಳೂ ಈ ಸಮಾರಾಭ್ಯಾಸದಲ್ಲಿ
ಪ್ರಯೋಗವಾಗಲಿವೆ. ಐಎನ್‌ಎಸ್‌ ಕದಂಬ ನೌಕಾನೆಲೆ ವ್ಯಾಪ್ತಿಯಲ್ಲಿ ನಡೆಯುತ್ತಿರುವ ಅತ್ಯಂತ ದೊಡ್ಡ ಸಮರಾಭ್ಯಾಸವೂ ಇದಾಗಿದೆ.

ಸೀಬರ್ಡ್‌ ನೌಕಾನೆಲೆ ಸ್ಥಾಪನೆಯಾದ ಮೇಲೆ ಇಷ್ಟು ದೊಡ್ಡ ಪ್ರಮಾಣದ ಸಮಾರಾಭ್ಯಾಸ ನಡೆಯುತ್ತಿರುವುದು ಇದೇ ಮೊದಲು. ಮುಂಬೈ, ವಿಶಾಖ ಪಟ್ಟಣದಿಂದಲೂ ಯುದ್ಧನೌಕೆಗಳು ಸಮರ ಕಲೆ ಪ್ರದರ್ಶನಕ್ಕೆ ಆಗಮಿಸಿವೆ. ನೌಕಾಪಡೆ
ಪೂರ್ಣ ಪ್ರಮಾಣದಲ್ಲಿ ತನ್ನ ಸಾಮರ್ಥ್ಯವನ್ನು ಒರೆಗೆ ಹಚ್ಚುತ್ತಿದೆ. ಐದು ಸಾವಿರಕ್ಕೂ ಹೆಚ್ಚು ನೌಕಾ ಸೈಲರ್‌
ಸಮರಾಭ್ಯಾಸದಲ್ಲಿ ಭಾಗವಹಿಸಿದ್ದಾರೆ. ಟ್ರೋಫೆಕ್ಸ್‌ ಸಮಾರಭ್ಯಾಸದ ಕುರಿತು “ಉದಯವಾಣಿ’ ಮೊದಲೇ ವರದಿ
ಮಾಡಿತ್ತು.